Fyrirsætan og athafnakonan Ásdís Rán Gunnarsdóttir segist af illri nauðsyn hafa þurft að tryggja sér einkaleyfi á nafninu IceQueen, sem hún hefur notað í rúma tvo áratugi við meðal annars markaðssetningu á ýmsum varningi.

Ásdís Rán tilkynnti þetta á Facebook í dag þar sem hún segist hafa undanfarið hafa orðið vör við að „stúlkur hafa verið að nota nafnið“ og segir eina hafa verið sérlega freka til fjörsins. „Þar á meðal ein sem hefur verið iðin við að kalla sig Icequeen,“ skrifar Ásdís Rán og segir þessa konu nú vera byrjaða að kynna sína eigin hönnun undir nafninu Icequeen, eins og hún hafi gert með sínar vörur árum saman.

Sjá einnig: Ásdís Rán talar undir svartri rós

Ásdís Rán staðfestir í samtali við Fréttablaðið að þessi leyfislausa ísdrottning er fitnesskonan Sara Heimisdóttir. Hún býr í Bandaríkjunum en hjónaband hennar og vaxtaræktartröllsins Rich heitins Piana var á sínum tíma áberandi í fjölmiðlum á Íslandi.

„Mér finnst þetta virkilega leim og kjánalegt að einhver skuli gera svona og ekki getað fundið sitt eigið nafn og byggt það upp í staðinn fyrir að stela vörumerki sem ég hef lagt yfir 20 ára vinnu í,“ segir Ásdís Rán.

 Ásdís Rán segir jafnframt í tilkynningu sinni að sjálfsagt hafi margir talið hana eiga IceQueen sem skráð vörumerki en hinni hafi einhvern veginn ekki fundist hún þurfa „að sækja um það löglega þar sem ég bjóst ekki við því að einhver mundi reyna að nýta sér það eða koma sér á framfæri með svona þekktu og sérstöku nafni“ sem hún hafi átt og notað í yfir tuttugu ár og notað yfir margar vörulínur.

„En svona getur fólk verið ósvífið! Ég vil allavega koma þessu á framfæri og vil biðja þá sem eru að nýta sér nafnið á einhvern hátt að hætta því strax vinsamlegast,“ segir Ásdís Rán, nú löggildur eigandi vörumerkisins IceQueen.