Þegar komið er inn á heimili Ingu Tinnu upplifir maður ótrúlega kyrrð og núllstillingu. Inga keypti íbúðina nýja og er búin að hanna hana í samstarfi við mig, en samt gera hana að sinni. Hún er ótrúlega dugleg athafnakona sem er búin að koma á laggirnar tveimur fyrirtækjum á skömmum tíma, Icelandic Coupons og dineout.is.

Þegar ég heimsótti Ingu Tinnu bauð hún upp á sushi frá Fiskfélaginu. Dineout.is virkar þannig að viðskiptavinurinn fer inn á síðuna og getur þá séð flesta veitingastaði landsins, ásamt því að panta borð með einföldum hætti. Þá er hægt að sjá hvaða tímar eru lausir á veitingastöðunum. Þetta er lýsandi fyrir framtakssemi Ingu Tinnu í því ástandi sem nú ríkir í heiminum. Hún setti forritara sína í að gera viðauka við síðuna þannig að núna býður dineout appið upp á að viðskiptavinur geti smellt á möguleikann „taka heim“ eða pantað mat frá veitingastað. Matreiðslumenn afgreiða hann til viðskiptavina eins og þeir væru á staðnum. Síðan er hægt að setja matinn á fallega diska heima og láta sem maður sé úti að borða.

Heimaskrifstofunni er haganlega fyrirkomið.

Inga Tinna starfaði sem flugfreyja hjá Icelandair í nokkur ár meðfram því að reka þessi tvö fyrirtæki en á ferðalögum sínum hefur hún haft tækifæri til að eignast fallega hluti fyrir heimilið og sjálfa sig.

Heimilið er griðastaður hennar, enda leggur Inga Tinna áherslu á að hafa fallega minjagripi sem hún hefur eignast á ferðalögum sínum í kringum sig og leyfir listinni að njóta sín. Hún er fagurkeri og hefur ótrúlega mikinn áhuga á listgripum og velur gjarnan unga listamenn sem eru að gera góða hluti. Þannig fjárfestir hún í list þeirra snemma á ferlinum.

Sir Arnar Gauti og Inga Tinna sitja hér við borðstofuborðið með girnilegt sushi og Sparkling tea.

Íbúðin hennar er hlý og notaleg. Hver hlutur fær að njóta sín á gráum veggjum sem fara í gegnum alla íbúðina sem er máluð í 3% gljástigi Lady Colour með lit sem heitir „París grár“ sem fæst í Húsasmiðjunni. Liturinn fer vel við listaverkin sem Inga Tinna hefur komið sér upp. Hún er til dæmis mjög hrifin af Pétri Gaut listamanni, en það er litapallettan í myndum hans ásamt formunum sem heillar hana.

Inga Tinna leggur áherslu á smáa sem stærri hluti á heimilinu, það á líka við um eldhúsið.

Við útbjuggum í sameiningu heimaskrifstofu sem er sömuleiðis afsöppunarrými með fallegri list á veggjum, í bland við uppáhaldshlutina hennar. Inga Tinna leyfir fallegri hönnun í tísku að njóta sín í hillum frekar en að vera með þá inni í skáp.

Það sem er svo yndislegt við Ingu Tinnu er að hún er ótrúlega mikil fjölskyldumanneskja og ég hef alltaf dáðst að henni fyrir það. Þá eru foreldrar hennar alltaf í fyrsta sæti en það segir margt um þessa stórglæsilegu athafnakonu.

Sir Arnar Gauti

Frá heimilinu er glæsilegt útsýni til fjalla.
Svefnherbergið er fallegt í gráum tónum.
Stóllinn Barcelona sómir sér vel með listaverkinu eftir Pétur Gaut. Takið eftir litunum.
Sushi-bitarnir eru glæsilegir frá Fiskfélaginu. Borðbúnaðinn keypti Inga Tinna í Japan.
Eldhúsinnréttingin var filmuð svört að hluta. Stólarnir eru frá Dialma Brown á Ítalíu.
MacIntosh stóllinn tónar vel við glæsilegu myndina, sem er eftir Hendrikku Waage.