Þetta er í annað sinn sem þau Mikael og Berglind stýra Krakkaskaupinu og stóðu þau frammi fyrir verðugri áskorun í þetta skiptið, að pakka árinu 2020 í gleðibúning fyrir yngstu kynslóð landsins.

Við heyrðum í þeim Mikka og Beggu í miðjum tökum á lokalagi Skaupsins sem þau bæði flytja og semja textann við og var ekki annað að heyra en að gleðin væri í fyrirrúmi.

„Þetta eru síðustu tökudagarnir og það er allt að smella,“ segir Berglind. „Við sömdum textann í lokalaginu en svo var það Darri Tryggvason sem gerði stefið fyrir okkur.“

Jarðskjálftinn kom á færibandi

Handritaskrif Skaupsins hafa staðið yfir frá því í haust. „Maður þarf svolítið að grafa til að finna eitthvað annað en COVID til að gera grín að í ár,“ segir Mikki og bendir á að eitt og annað hafi þó gerst á árinu.

Mikael Kaaber segir vinagjafajólarúntinn mikilvægan þátt jólanna.

„Við vorum til dæmis að skrifa sitt í hvoru lagi, Berglind í sumarbústað og ég sat uppi í Perlu, þegar kemur á færibandi jarðskjálfti. Við vorum að tala saman á Skype þegar allt fór að titra,“ segja þau og þakka almættinu fyrir þennan fína efnivið í brandara. „Viðbrögð þingmanna hjálpuðu nú aðeins til þar. En auðvitað er gott að enginn slasaðist.“

Helmingur efnisins er sketsar frá þeim tveimur en hinn helmingurinn aðsent efni frá krökkunum í landinu. „Krakkarnir eru oft að taka fyrir efni sem við mundum ekki eftir og er oft á alvarlegri nótum, fjalla um pólitík og svo framvegis, sem við erum einmitt ekki að taka fyrir. Þau eru mikið að tala um COVID og Trump,“ segir Mikki en þau eru sammála um að markmiðið sé að öll fjölskyldan geti skemmt sér yfir þættinum. „Þetta er því ekki bara piss og kúkur, heldur aðeins meira með því,“ segir Berglind og hlær.

Skatan ekki spes en ómissandi

Mikael er fastheldinn á hefðir þegar kemur að jólahátíðinni.

Hvernig verða jólin og áramótin?

Ég eyði yfirleitt jólum og áramótum með fjölskyldunni og nánustu ættingjum. Við erum ekkert svo mörg og pössum inn í þessa umtöluðu „jólakúlu“ þannig að þetta verður bara nokkuð hefðbundið.

Hvaða jólahefð má ekki rjúfa?

Fyrst er það að fá sér skötu á Þorláksmessu. Skata er vissulega ekkert spes á bragðið en jólin koma ekki án þess að setja þennan viðbjóð upp í sig. Vinajólagjafarúnturinn sem ég tek eftir að ég er kominn heim úr bænum á Þorláksmessu. Svo er það að horfa á alla Hvar er Völundur með Ólafi bróður fyrir aðfangadag og að fá rúllupylsu um daginn á aðfangadag.

Hvað er á jólagjafaóskalistanum?

Úff, þetta er ein erfiðasta spurningin sem ég fæ. Mér finnst ég eiga allt. En, ég á ekki góða sæng. Þannig að ég bað bara um það.

Hvað er skemmtilegast við gamlárskvöld?

Mér finnst æðislegt að horfa á skaupið og taka þátt í umræðum eftir það. En, flugeldarnir eru uppáhalds. Ég fer og sprengi smá þegar klukkan slær tólf með fjölskyldunni en held svo flugeldasýningu fyrir vinina um eittleytið.

Náttföt og bíómyndamaraþon

Berglind segir allt stefna í kósíheit í faðmi fjölskyldunnar þessi jólin.

Hvernig verða jólin og áramótin?

Berglind væri alveg til í náttföt í jólagjöf enda stefnir allt í kósíjól.

Heyrðu, þar sem tímarnir eru nú svolítið öðruvísi núna þá stefnir þetta allt í bara voða mikil kósíheit. Þetta verður bara náttföt og bíómyndamaraþon í faðmi fjölskyldunnar, en svo eru það líka bara bestu jólin.

Hvað er í matinn á aðfangadag?

Ætli það verði ekki bara klassíski hryggurinn. Hamborgarhryggurinn klikkar allavega aldrei þannig að ég held að hann verði aftur í ár.

Hvað er á jólagjafaóskalistanum?

Þegar stórt er spurt! Mamma hættir ekki að spyrja mig að sömu spurningu og ég er ekki enn þá komin með svar. Ég veit eiginlega aldrei hvað mig langar í en ég er alltaf sátt við hvað sem er. Reyndar þegar ég pæli í því þá væri ég ekkert á móti nýjum náttfötum, alltaf gott að eiga ný náttföt um jólin.

Hvort er sælla að gefa eða þiggja?

Mér finnst alltaf sælla að gefa og örugglega eru langflestir sammála mér í því. Það er svo gaman að finna fallegar gjafir fyrir fólkið í kringum sig og ég hef alltaf verið mikið fyrir að gefa persónulegar gjafir.