Bandaríski uppistandarinn og leikarinn Amy Schumer fékk sér andlitslyftingu en lét svo leysa upp fylliefnið í kinnunum sínum þar sem hún var óánægð með útkomuna.

Schumer, sem fagnaði fertugsafmæli sínu í sumar, birti mynd af sér á húðsjúkdóma- og lýtalæknastofu Jodi LoGerfo.

„Ég prófaði að þétta húðina en þá kom í ljós að ég er alveg nógu þétt. Guði sé lof að það sé hægt að leysa þessar fyllingar upp því ég leit út eins og Malificent.“

Læknirinn útskýrði á Instagram að aðgerðin væri nokkuð einföld; hún þyrfti bara að sprauta ensíminu hýalúrónídasa í kinnarnar til að leysa upp fylliefnið.

Schumer hefur haft í nógu að snúast en í fyrra framleiddi hún sjónvarpsþætti með eiginmanni sínum, Amy Schumer learns to cook, á sjónvarpsstöðinni Food Network.

Hún leikur í kvikmyndinni The Humans, sem kom nýlega út í Bandaríkjunum og vinnur nú að nýju handriti fyrir Hulu þætti, Love, Beth, sem hún ætlar einnig að leikstýra.

Skets-þættirnir hennar, Inside Amy Schumer, sem skutu henni upp á stjörnuhimininn, fara bráðum aftur í gang eftir rúmlega fimm ára pásu.