Alþingi hefur fengið lánuð tvö rafmagnsreiðhjól til reynslu í tvær vikur. Þetta kemur fram á vef þingsins í færslu sem var birt fyrir helgi.
Þar kemur fram að þingmenn og starfsmenn skrifstofunnar geta fengið hjólin lánuð í lengri og skemmri ferðir. Er tilgangurinn að hvetja til notkunar á reiðhjólum og kanna grundvöll fyrir því að þingið kaupi rafhjól til útlána.
Alþingi tekur þátt í verkefninu Græn skref í ríkisrekstri og í því felst meðal annars að hvetja fólk til að nota umhverfisvæna samgöngumáta til og frá vinnu og á vinnutíma, hvort heldur er í stuttar vinnutengdar ferðir eða skottúra í einkaerindum.
