Kristín María segir að Golfsambandið haldi 18 Íslandsmót í golfi fyrir kylfinga á öllum aldri víðs vegar um landið. „Hluti af mínu starfi er að vinna að undirbúningi fyrir mótin svo þau fari fram við sem bestar aðstæður. Þar að auki erum ég og fleiri fulltrúar GSÍ á staðnum og sjáum um framkvæmd Íslandsmótanna með góðum stuðningi frá golfklúbbum þar sem mótin fara fram. Mótin eru fjölbreytt en eru öll til þess gerð að finna bestu kylfinga landsins hverju sinni,“ segir hún.

Kristín er ein fárra kvenna, ungra kvenna, á Íslandi sem eru mótastjórar. Hún segir það mjög ánægjulegt hversu víðtækur áhugi á golfi sé á Íslandi. „Það er afar ánægjulegt að í ár er metfjöldi kylfinga, eða rúmlega 22.000. Mesta hlutfallslega fjölgunin í ár var hjá kylfingum á aldrinum 16-39 ára, en einnig hefur fjölgað í elsta aldurshópnum, 70 ára og eldri. Þetta sýnir fram á hvað íþróttin er aðgengileg fólki á öllum aldri, en hver og einn getur spilað golf á sínum forsendum hvort sem það er keppni, fyrir hreyfingu, félagsskap eða til að njóta náttúrunnar. Golf er ein af örfáum íþróttagreinum þar sem ömmur og afar geta leikið með barnabarni og allt þar á milli.

Konur eru 33 prósent af félögum í golfhreyfingunni sem er með hærra hlutfalli í Evrópu en það er áhugavert að konur á Íslandi spila oftar golf en karlar. Það eru vissulega fleiri karlar í golfhreyfingunni en konum á öllum aldri sem stunda íþróttina fer fjölgandi. Konur og karlar geta auðvitað leikið golf saman enda getur hver og einn kylfingur valið sér teig við hæfi til að leika af. Því geta allir keppt við golfvöllinn út frá sinni getu og högglengd, óháð kyni,“ segir Kristín María.

Hún segir að sér finnist mjög gaman að leika golf í golfhermum og framboðið af þeim hafi aukist til muna. „Margir golfklúbbar og einkaaðilar hafa bætt við golfhermum sem bætir æfingaaðstöðu kylfinga yfir vetrartímann vissulega, bæði til æfinga og leiks. Það er frábær viðbót þar sem tímabilið hérlendis er stutt og margir enn með mikinn áhuga á golfi þegar líður á veturinn,“ segir hún og bætir við að það besta við golfið sé að allir geti verið með. „Sama hvort viðkomandi er barn, ungmenni, á miðjum aldri eða eldri borgari, þá er eitthvað í boði fyrir alla. Margir golfklúbbar bjóða upp á sérkjör fyrir ungmenni og eldri borgara, flestir klúbbar eru með námskeið hjá golfkennurum og geta leitt byrjendur í gegnum fyrstu skrefin í golfinu.“

Það eru 62 golfklúbbar víðs vegar um landið með 65 golfvelli, svo flestir ættu að komast í golf hvar sem viðkomandi er búsettur. Það er mikill kostur að geta sameinað hreyfingu, útivist, einbeitingu og félagsskap á golfvellinum.

Hefur áhugi á golfi aukist með góðum árangri afreksfólks á þessu sviði?

„Við höfum horft upp á frábæran árangur atvinnukylfinga síðustu ár, sérstaklega kvennamegin. Samhliða því hefur umfjöllun um kylfingana aukist og ekki ólíklegt að sýnilegar fyrirmyndir geti spilað þátt í því að kylfingum hefur fjölgað hérlendis. Þó eru margir þættir sem spila inn í fjölgunina en ég tel að góður árangur atvinnukylfinganna eigi einhvern þátt í því.“

Golf getur verið fyrir alla og upplagt fyrir ungt fólk, það er hægt að byrja með því að skrá sig á námskeið en hér á landi eru góðir þjálfarar og margir kröftugir að útskrifast úr PGA kennaraskólanum. Fólk getur skráð sig á námskeið hvort sem um einstakling er að ræða eða heilan vinahóp. Eins er hægt að byrja að fara á æfingasvæði að slá, vippa og pútta eða að skrá sig einfaldlega í golfklúbb.

Á heimasíðunni golf.is er flokkur sem heitir „Komdu í golf“ en þar má finna efni um atriði sem gott er að vita fyrir kylfinga sem eru að stíga sín fyrstu skref.