Helgarblaðið

Allt hægt ef viljinn er fyrir hendi

Glódís Perla Viggósdóttir, miðvörður íslenska kvennalandsliðsins, útskrifaðist með BA-gráðu í sálfræði fyrir skömmu. Hún skipuleggur sig vel og setur sér lítil markmið sem er auðvelt að ná í þeim tilgangi að ná stærri markmiðum.

Fréttablaðið/Ernir

Glódís Perla Viggósdóttir spilar með einu stærsta liði Svíþjóðar, Rosengård. Hún er 23 ára gömul en hefur þó spilað með A-landsliðinu í sex ár og leikið á sjötta tug leikja með liðinu.

Glódís sýndi stjörnutakta í leik kvennalandsliðsins á móti Slóveníu nýverið og skoraði tvö mörk. Hún hefur haft nóg að gera í Svíþjóð og lauk nýverið BA-gráðu í sálfræði við Háskólann á Akureyri.

Glódís tók sér tíma til þess að koma sér fyrir úti í Svíþjóð áður en hún hóf háskólanám í sálfræði. Hún stundaði námið af kappi í þrjú ár. „Það hefur gengið bara mjög vel. Ég er reyndar ansi heppin að eiga almennt ekki í miklum erfiðleikum með nám svo það hefur létt aðeins á mér,“ segir Glódís sem lumar á góðum ráðum fyrir þá sem hafa mikið fyrir stafni en vilja líka mennta sig.

„Ég held að skipulag sé lykillinn að velgengni í flestu sem maður vill gera. Ég veit um marga sem eru að vinna samhliða námi og eiga jafnvel börn líka sem er töluvert meira en það sem ég geri á daginn þannig þetta er ákveðið púsluspil en ef viljinn er fyrir hendi þá er vissulega allt hægt,“ segir Glódís.


Týpan sem glósar úr glósunum og svo einu sinni enn...

„Mér finnst rosa gott að setjast á kaffihús ef ég þarf að læra því þá tek ég þann möguleika í burtu að geta bara farið upp í sófa og horft á þætti eða slakað á … og þá vel ég kaffihús frekar en bókasafn því mér finnst líka þægilegt að hafa smá svona klið í kringum mig enda ólst ég upp við að læra heima í eldhúsi eða stofu þar sem við vorum þrjár systur og mamma og pabbi að elda eða spjalla. Mér finnst alltaf best að vera búin að setja mér ákveðið skipulag sem inniheldur lítil markmið eins og að á þessum degi ætla ég að klára þessa tvo kafla og þá reyni ég að gera það eins hratt og ég get, enda mikil keppnismanneskja. Svo er ég týpan sem glósa og glósa svo upp úr glósunum mínum og helst glósa svo einu sinni í viðbót upp úr því rétt áður en ég fer í próf,“ segir hún og bætir við að lykillinn að árangri sé þó alltaf sá að hafa áhuga á náminu. „Ég held að lykillinn sé aðallega að hafa áhuga á því sem maður er að læra því það léttir rosalega á og síðan bara að skipuleggja sig, setja sér markmið og vera jákvæður.“


Með kærastanum, Kristófer.

Stefnir á frekara nám

„Ég er að hugsa um að skrá mig í einkaþjálfaranám í haust en annars hef ég ekkert ákveðið. Mér finnst sálfræðin líka mjög áhugaverð og gæti farið í mastersnám í einhverju tengdu henni á næstu árum,“ nefnir hún og segir enda sálfræðina gagnast vel í boltanum.

„Já, alveg að vissu leyti, ég skrifaði til að mynda lokaritgerðina mína um hugræna færni íslenskra knattspyrnukvenna sem var mjög áhugavert og las ég mikið um tengsl hugrænna þátta og árangurs í íþróttum í þeirri vinnu sem auðvitað tengist beint inn á mitt daglega líf.“

Hún segir andann í kvennalandsliðinu góðan. Hópurinn sé samstilltur og einbeittur þegar hann komi saman. „Okkur hefur gengið mjög vel hingað til en við vitum líka að við getum gert betur. Erum búnar að koma okkur í algjöran úrslitaleik um að komast á HM á móti Þýskalandi 1. september sem verður gríðarlega erfitt en skemmtilegt verkefni sem bíður okkar þá,“ segir Glódís og segir mikilvægan leik fram undan.

„Við erum að fara að spila gríðarlega mikilvægan leik á móti Þýskalandi 1. september og svo á móti Tékklandi nokkrum dögum seinna sem bæði eru mjög góð lið.“


 

Sömu styrkleikar

Styrkleika liðsins segir hún felast í hugarfarinu. „Við erum Íslendingar og höfum bilaða trú á okkur sjálfum og því sem við getum gert og ég held að það sé aðalstyrkleiki okkar. Fyrir utan það erum við taktískt góðar, spilum góðan varnarleik og erum sterkar í föstum leikatriðum.“

Og að sjálfsögðu fylgist Glódís með gengi félaga sinna í karlalandsliðinu. Styrkleikar þeirra séu svipaðir þeirra í kvennalandsliðinu.

„Þeir eru bara gríðarlega flottir og búnir að ná frábærum árangri með því að koma sér á HM en við sem Íslendingar erum ekki sátt þar heldur viljum við alltaf meira. Held að styrkleikar þeirra séu mjög svipaðir okkar styrkleikum í kvennalandsliðinu. Þeir spila góðan varnarleik, eru grjótharðir og erfitt að brjóta þá niður og svo eru þeir sterkir í skyndisóknum og föstum leikatriðum. Veikleikar gætu verið meiðsli mikilvægara leikmanna en ég hef reyndar fulla trú á því að Frikki og allt teymið sem þeir eru með hjálpi þeim að vera 100% þegar þess þarf!“

Hvernig er dæmigerður dagur úti í Svíþjóð? 

„Ég vakna klukkan 8 og bý mér til ommilettu í morgunmat og borða hana yfir einhverjum góðum þætti. Legg síðan afstað á æfingu um níu leitið, mæti niður á völl og rúlla áður en fundur fyrir æfingu byrjar og svo æfing 10.30. Eftir æfingu er oft hádegismatur á vellinum þar sem við borðum saman og kannski fundum, ef ekki fer ég oftast og fæ mér góðan hádegismat einhverstaðar með einhverjum stelpum úr liðinu eða kærastanum mínum. Svo bara sé ég hvað dagurinn býður upp á, ef ég hef þurft að læra þá geri ég það, ef það er gott veður förum við oft út á strönd eða setjumst í einhvern park og slökum á eða ég fer heim og legg mig ef mér finnst ég eða líkaminn minn þurfa þess. Svo þegar líður á kvöld er aðal fókusinn á að elda einhvern góðan kvöldmat.

Athugasemdir

Auglýsing
Auglýsing

Tengdar fréttir

Helgarblaðið

Umhverfið allt ein kennslustofa

Helgarblaðið

Langar að prófa fjallaskíði

Helgarblaðið

Serena Williams breytir tennis

Auglýsing

Nýjast

Lýtaaðgerðirnar voru mistök

María Rut og Ingileif selja; „Fyrsta íbúðin okkar saman“

Biggi í Dimmu hvetur til snið­­göngu Euro­vision

Draumahöll Huldu í Módern til sölu

Góð ráð: Hvernig búa skal bílinn undir veturinn

Fataskápur afa breytti öllu

Auglýsing