Fólk

Allir vinir í eftirpartíinu

Gabríella Sif Beck leiðir Roller Derby liðið Ragnarök. Hún kynntist unnustunni á rúlluskautum og segir fjölbreytileika samfélagsins í kringum sportið hafa heillað.

Gabríella Sif Beck dreif sig á nýliðanámskeið í Roller Derby fyrir einu og hálfu ári. Hún féll fyrir sportinu og er nú fyrirliði íslenska liðsins. Mynd/Anton Brink

Ég var ekkert í íþróttum og sá mig ekki fyrir mér fara inn á þá braut. Það var samfélagið í kringum þetta sem heillaði mig til að byrja með. Svo uppgötvaði ég hvað sportið er klikkaðslega skemmtilegt,“ segir Gabríella Sif Beck, fyrirliði Roller Derby liðsins Ragnaraka. Fjölbreytileikinn hafi höfðað til hennar.

„Roller Derby er svo opið samfélag. Það eru allir velkomnir og þarna blómstra margir sem hafa aldrei fundið sig í neinni annarri íþrótt. Fólk er á öllum aldri og til dæmis margir sem byrja um fertugt og verða geggjað góðir. Þetta er einnig mjög hinseginvænt samfélag. Það skiptir engu máli hvers kyns fólk er, kynhneigð þess eða kynvitund. Svo eru líka allar líkamstýpur velkomnar. Þetta finnst mér gera Roller Derby sérstakt, þó ég vilji ekki gera lítið úr öðrum íþróttum. En Roller Derby er langt frá því að vera einsleitt.“

Ást á rúlluskautum

„Ég þekkti engan í þessu þegar ég fór á fyrstu æfinguna fyrir einu og hálfu ári. Sá bara auglýsingu um nýliðanámskeið og dró vinkonu mína með, þorði ekki að mæta ein. Svo fann ég mig algerlega í þessu, fór beint í stjórn og hef leikið alla leikina síðan ég byrjaði og er núna fyrirliði. Ég kynntist líka unnustu minni í Derbyinu, hún hefur verið í liðinu en er komin út í dómgæsluna núna, þetta er forboðin ást,“ segir Gabríella hlæjandi. Það komist ekki mörg önnur áhugamál að sem ekki snúist um hjólaskauta.

Fram undan er leikur við grjóthart lið frá Texas en á milli æfinga situr Gabríella keramiknámskeið og plokkar bassa. Mynd/Anton Brink

„Ég hef verið með annað hjólaskautaverkefni í gangi í sumar, Chicks in Bowls. Það er í grunninn eins og hjólabrettaliðið er að gera, skeita á römpum en á hjólaskautum. Ég lærði aldrei á hjólabretti. Við erum nokkrar stelpur sem hittumst til að skeita og æfum ný trikk.

Ég er reyndar á keramiknámskeiði núna og búin að búa til eina skál, eða kannski er þetta öskubakki. Keramikið er kannski ekki mín sterka hlið en það er gaman að læra eitthvað nýtt,“ segir Gabríella.

Hún spilar einnig á bassa í frístundum og æfir öðru hvoru með vinum sínum en vill ekki kannast við að þau séu hljómsveit. Á sumrin gengur hún á fjöll og á veturna stundar hún nám í ferðamálafræði í HÍ og starfar hjá What’s On við upplýsingagjöf til ferðamanna.

700 Egilsstaðir

Í Gabríellu leynist landsbyggðartaug en fyrstu ár ævinnar bjó hún á Reyðarfirði.

„Ég er að austan og fjölskyldan býr þar. En ég hef samt búið í Reykjavík nánast allt mitt líf, flutti suður 4 ára en fór alltaf á sumrin til afa og ömmu á Reyðarfirði. Ég hef sterk tengsl þangað og fer oft austur. Númerið mitt í Roller Derby er til dæmis 700, póstnúmerið á Egilsstöðum,“ segir hún og heldur áfram að tala um uppáhaldsáhugamálið.

„Á Íslandi er Roller Derby ekki stórt sport, hér er bara eitt lið en við verðum reyndar með nýliðanámskeið í næstu viku í Kaplakrika.

Hraði og harka einkenna leiki í Roller Derby. Á morgun fer fram fyrsti leikur tímabilsins þegar Ragnarök mæta Honky Tonk Heartbrakers frá Texas.

Yfirleitt koma lið hingað til lands að keppa en við höfum farið út og keppt á alþjóðlegum mótum og í febrúar á þessu ári kepptum við sem landslið á heimsmeistaramóti. Það var stór áfangi fyrir okkur. Þá sáum við hvað Roller Derby samfélagið er stórt á heimsvísu en það eru yfir tvö þúsund Roller Derby deildir út um allan. Það er til dæmis Roller Derby lið í Egyptalandi. Bandaríkin eru stærst enda er íþróttin upprunnin í Texas,“ segir Gabríella. Það er einmitt grjóthart lið frá Texas sem keppir við Ragnarök á morgun, Honky Tonk Heartbreakers. „Þær eru gamlar í hettunni,“ segir Gabríella en það þurfi ekki að þýða að þær verði auðveldari andstæðingar, það sé ekki sjálfgefið að leikharkan minnki með hækkandi aldri leikmanna.

„Við kepptum til dæmis einu sinni á móti kanadísku liði, vil ekki kalla þær ellismelli en konur í eldri kantinum. Það var einn erfiðasti leikur sem ég hef spilað! Þær voru ótrúlega skemmtilegt lið,“ segir Gabríella.

„Þetta er mikil kontaktíþrótt og nauðsynlegt að vera með hjálm og hlífar til að slasa sig ekki. En það eru auðvitað reglur eins og í öllum íþróttum. Keppnin fer fram á sporöskjulaga braut og í hvoru liði eru 5 liðsmenn inná í einu, fjórir þeirra eru varnarmenn og einn er „jammer“ eða hlaupari. Hlauparinn skorar stig, með því að fara fram hjá andstæðingunum í hinu liðinu. Það er hraði og harka í leiknum og miklar tæknifléttur. En svo eru allir vinir í eftirpartíinu.“

Athugasemdir

Auglýsing
Auglýsing

Tengdar fréttir

Fólk

Gaman að djöflast aðeins

Bílar

Góð ráð: Hvernig búa skal bílinn undir veturinn

Fólk

Fataskápur afa breytti öllu

Auglýsing

Nýjast

Nú er komin sátt

Karlmennskan varð Kolbeini næstum að bana

Karlmennskan er hættuleg

Heldur tón­leika í kjallaranum heima hjá sér

Hulda Lind stefnir bjart­sýn á for­síðu Maxim´s

Blá­­skjár, Grýla og Biblían settu æsku fólks í upp­nám

Auglýsing