Í dag kemur út lagið Prince með hljómsveitinni Mammút. Lagið var það síðasta sem kom út úr hljóðversvinnu við gerð nýjustu plötu þeirra, Ride the Fire.

„Það hafði blundað bak við augu og eyru gegnum allt upptökuferlið en við fundum því ekki réttan farveg fyrr en í blálokin. Það er uppgjör, leikur, háð. Allar flóðgáttir stóðu opnar eftir sleitulausa vinnu og svefnlausar nætur, þá birtast manni oft bestu lögin. Þau banka upp á þegar ritskoðunin er engin og orkunotkunin hefur færst frá höfði yfir í hendur. Við lágum yfir gítarsólóinu í marga daga og töldum okkur hafa fundið hið fullkomna gítarsánd,“ segir Ása Dýradóttir, bassaleikari sveitarinnar.

Undarlegir tímar

Platan var tekin upp og pródúseruð af Árna Hjörvari Árnasyni, sem er mjög náinn hljómsveitinni.

„Ása var búsett með honum í London áður en vinna við plötuna hófst, og við ákváðum að gera þetta með honum þar sem við vorum nú þegar að vinna mikið að tónlist saman. Hann tók áður upp ábreiðuna okkar af Believe í London árið 2017 og hefur verið okkar allrahanda samstarfsfélagi síðan þá. Auk þess að taka upp Ride the Fire, hefur hann verið okkur innan handar sem hljóðmaður á túr, leikið í myndböndum og syngur svo með mér í viðlagi Prince,“ segir Katrína Mogensen, söngkona Mammút.

„Við gátum ekki ímyndað okkur að taka þessa plötu upp með öðrum en honum, hann er besti pródúserinn og ferðafélagi okkar síðustu árin,“ segir Ása.

Ása og Katrína ákváðu að gera tónlistarmyndband við lagið Prince sjálfar, frekar en að leita annað.

„Við lögðum upp með heljarinnar „storyboard“ og áform um hina og þessa heima, sem við eimuðum svo yfir í einfalt samtal tveggja karaktera. Við vildum prófa að gera þetta bara tvær í rólegheitum, án útskýringa, funda eða ágreinings. Við fengum svo Línu Thoroddsen til að klippa efnið með okkur. Ætli undarlegu tímarnir í ár fái mann ekki í auknari mæli til þess að leita inn á við, skoða verkfærin sín og þróa með sér getu til að nota þau,“ segir Ása.

Vilja ekkert miðjumoð

Útlit plötunnar og fylgiefni hönnuðu meðlimirnir sjálfir.

„Þar sem við erum búin að marínerast í svo mörg ár sem listakollektív og þróa á milli okkar ákveðna lífssýn og heimspeki getur verið erfitt fyrir okkur að innleiða vinnu utanaðkomandi aðila, nema útkoman endi í miðjumoði,“ segir Ása.

„Við Ása og Alexandra erum allar faglærðar ýmist í myndlist eða grafískri hönnun, svo við metum það svo að við séum bestar í verkið. Við höfum alltaf séð um listina og útlit sem fylgir útgáfunum og munum veiða áfram úr þeim sýrupolli sem er á milli okkar. Áfram veginn og treystum engum,“ segir Katrína.

Upphaflega stóð til að Ride the Fire kæmi út í vor og að hljómsveitin myndi svo túra yfir sumarið. Heimsfaraldurinn setti þó strik í reikninginn og útgáfunni var því frestað fram í október.

„Svo krossar maður bara fingur og vonar að sumarfestivölin eigi sér stað 2021, þó að útlitið sé svart. Við höfum eytt árinu í að hlúa að útgáfunni og umgjörð hennar, í bland við að hlúa að börnum og buru, en Mammútabörnin eru núna í þúsundatali og krefjast mikillar athygli, stór og loðin,“ segir Ása.

Skúlptúr eftir Katrínu og mynd eftir Ásu prýðir plötuumslag Ride the Fire.

Traustið mikilvægt

Vinnan að baki plötunni stóð yfir í tvö ár.

„Hún fól í sér samtíning af einstaklingsvinnu milli landa, og afrakstur vinnulota, þar sem við komum saman í stúdíói eða æfingarými í London eða Reykjavík, tókum upp, púsluðum og gerðum endalausar tilraunir. Svo skildust alltaf leiðir inn á milli og hægt var að virða efnið fyrir sér og breyta og bæta þegar næsta lota hófst. Þegar traustið er mikið milli einstaklinga er þetta rosalega þægileg vinnuaðferð,“ segir Ása.

„Já, traustið á ferlið og efnið þarf líka að vera til staðar, engar hugmyndir eru tilgangslausar, annaðhvort þarf að klæða þær í búning eða leyfa þeim að umbreytast í öðrum útsetningum,“ segir Katrína.

Höfðu meira svigrúm

Áður hafa þau líkt plötunni við ferðalag ofan í kanínuholu.

„Við stigum inn í ferlið eins og svampar, svona duglegir svampar. Tilbúin að skoða allt það sem á okkar vegi varð og vinna hörðum höndum. Við lögðum ekki upp með neinn fyrir fram áætlaðan strúktúr eða hljóðheim, heldur notuðum forvitnina og tímann sem vopn,“ segir Ása

„Þessi plata var líka frábrugðin þeirri á undan, Kinder Versions, að því leytinu til að við höfðum meiri tíma og svigrúm til að vinna að henni á okkar forsendum. Við vorum ekki að eltast við ákveðna útkomu heldur bara að njóta leiksins og kafa dýpra,“ segir Katrína.

„Og þar sem allir áætlaðir tónleikar virðast sífellt falla niður, höldum við bara áfram að krukka í eigin sjón-, og hljóðræna drullumalli, það verður gaman að fylgjast með útgáfuflórunni í tónlistarbransanum 2021,“ bætir Ása við.

Lagið Prince kemur út í dag á öllum helstu streymisveitum. Platan Ride the Fire kemur út í október. Útgáfutónleikar verða tilkynntir síðar.