Megan Rapinoe og liðsfélagar hennar tryggðu sér heimsmeistaratitilinn í fótbolta með 2-0 sigri á Hollandi, hún var valin besti leikmaður mótsins og varð einnig markahæst en hún skoraði sex mörk á mótinu. Þetta er í fjórða sinn sem bandaríska kvennalandsliðið vinnur heimsmeistaratitilinn.Megan er 34 ára gömul og hefur leikið fyrir sjö félagslið í þremur heimsálfum.

Hún er glaðlynd baráttukona sem hefur barist ötullega fyrir jöfnum kjörum karla og kvenna í fótbolta og mannréttindum hinsegin fólks. Mesta athygli hefur hún vakið fyrir að standa uppi í hárinu á Donald Trump Bandaríkjaforseta. „Ég ætla ekki í fjandans Hvíta húsið,“ sagði hún í júnímánuði spurð hvort hún væri spennt fyrir heimsókn þangað. Í viðtali á CNN horfði hún beint í myndavélina og talaði til forsetans: „Skilaboð þín útiloka fólk. Þú útilokar mig, þú útilokar fólk sem lítur út eins og ég, þú útilokar litað fólk og þú útilokar jafnvel fólk sem styður þig,“ sagði hún. „Þú dásamar tímabil sem var ekki frábært fyrir alla – það var kannski frábært fyrir nokkra útvalda og kannski eru Bandaríkin frábær fyrir nokkra einstaklinga núna, en þau eru það ekki fyrir alltof marga Bandaríkjamenn.“

Megan hefur einnig beint spjótum sínum að Alþjóðaknattspyrnusambandinu, FIFA.
Getty

Megan og liðsfélagar hennar ákváðu einnig að beita hörðu og lögsækja bandaríska knattspyrnusambandið vegna launamisréttis. Kvennalandsliðinu hefur gengið mun betur en karlalandsliðinu þar í landi en þrátt fyrir það fá karlarnir mun meiri peninga frá bandaríska knattspyrnusambandinu. Þetta þykir Megan og félögum hennar eðlilega hið megnasta óréttlæti. Bandaríska knattspyrnusambandið borgar konum 38% af því sem það borgar körlunum og ekki er hægt að beita rökum sem algeng eru sem réttlæting fyrir misréttinu víða um heim, sem er minna áhorf og minni tekjur. Því velgengni kvennanna skilar sambandinu milljón dollurum meira í tekjur.

Bandarísku þingkonurnar Dianne Feinstein og Patty Murray notuðu tækifærið eftir sigur landsliðsins og lögðu fram frumvarp um sanngjörn laun íþróttafólks. Verði það samþykkt verður það ólöglegt hjá bandarískum íþróttasamböndum að mismuna eftir kyni.

Innilegt faðmlag Megan og Sue Bird eftir viðureignina við Hollendinga.
Getty

Megan hefur einnig beint spjótum sínum að Alþjóðaknattspyrnusambandinu, FIFA og gagnrýnt það að heildarfjárhæðin sem lið í karlaflokki fengu fyrir þátttöku á heimsmeistaramótinu var 400 milljónir dollara en lið í kvennaflokki fengu aðeins tæpar 30 milljónir dollara.

Landsliðskonur fylktu liði á Manhattan í vikunni og fögnuðu með íbúum New York og þar hélt Megan ræðu sem vakti athygli um allan heim því hún bað fólk um að sýna samstöðu þrátt fyrir ólíkar skoðanir og lífsstíl. „Þetta er mitt ákall til allra, við verðum að gera betur. Við verðum að elska meira, hata minna. Við verðum að hlusta meira og tala minna. Við verðum að átta okkur á því að þetta er ábyrgð okkar allra.“Í kjölfarið skrifaði Andrew Mark Cuomo, ríkisstjóri New York, undir frumvarp um sömu laun fótboltafólks í New York-ríki. Laun knattspyrnukarla- og kvenna verði héðan í frá jöfn. „Það eru engin rök fyrir því hvers vegna konurnar eru með lægri laun en karlarnir. FIFA og bandaríska knattspyrnusambandið hafa komið illa fram við landsliðskonurnar,“ sagði hann í ræðu sinni.

Þorsteinn Þorvaldsson, áhugamaður um fótbolta.
Valli

Ungir álitsgjafar Fréttablaðsins völdu uppáhaldsleikmenn og lið mótsins.

Þorsteinn Þorvaldsson

Aldur: 12 ára Lið: KR

Uppáhaldsliðið

Bandaríkin

Uppáhaldsleikmenn

  1. Megan Rapinoe
  2. Alex Morgan
  3. Ellen White

„Mér finnst Megan Rapinoe hafa verið best því hún skoraði flest mörkin ásamt Alex Morgan og Ellen White. Og svo var Megan bara mjög góð heilt yfir í öllum leikjunum.“

Halla Elísabet KR-ingur og einn af álitsgjöfum Fréttablaðsins.

Halla Elísabet Viktorsdóttir

Aldur: 11 ára Lið: KR

Uppáhaldsliðið

Bandaríkin

Uppáhaldsleikmenn

  1. Alex Morgan
    2. Megan Rapinoe
    3. Betsy Hassett

Betsy Hassett frá Nýja-Sjálandi spilar með liðinu mínu KR á Íslandi.

Óttar er í marki hjá Víkingi og var ánægður með frammistöðu Sari van Veenendaal.

Óttar Sveinsson

Aldur: 9 ára Lið: Víkingur

Uppáhaldsliðið

Holland

Uppáhaldsleikmenn

  1. Alex Morgan
  2. Megan Rapinoe
  3. Sari van Veenendaal

Sólveig Harpa leikur með ÍR, enska liðið var í uppáhaldi hjá henni en Megan var uppáhaldsleikmaðurinn.
Valli

Sólveig Harpa Magnúsdóttir

Aldur: 11 ára Lið: ÍR

Uppáhaldsliðið

England

Uppáhaldsleikmenn

  1. Megan Rapinoe
  2. Lucy Bronze
  3. Ellen White

„Ég hélt með Englandi, frekar svekkt að þær næðu ekki á pall. Samt glöð fyrir hönd USA að þær skyldu vinna því þær voru líka mjög flottar.“

Megan var vinsæl hjá Þórbergi sem og öðrum ungum álitsgjöfum Fréttablaðsins.

Þórbergur Rúnarsson

Aldur: 10 ára Lið: Víkingur

Uppáhaldsliðið

Bandaríkin

Uppáhaldsleikmenn

  1. Megan Rapinoe
  2. Sari van Veenendaal
  3. Crystal Dunn

„Megan var besti leikmaðurinn Líka markmaður Hollendinga, hún var svaka góð og Crystal stóð sig vel í vörninni.“