Díana prinsessa vissi upp á hár hvernig hún vildi bregðast við því þegar Karl Bretaprins fór í frægt sjónvarpsviðtal þann 29. júní árið 1994 þar sem hann viðurkenndi að hafa haldið framhjá eiginkonu sinni í fyrsta sinn á opinberum vettvangi.
„Hefndarkjóllinn. Það er eins og maður sé bara mættur aftur,“ segir Guðný Ósk Laxdal, sérfræðingur í bresku konungsfjölskyldunni, í fyrsta þættinum af Crownvarpinu, viðhafnarhlaðvarpi Fréttablaðsins um The Crown. Kjóllinn frægi hefur síðan oft verið kenndur við hefnd.
Hún segist elska hvernig Elizabeth Debicki hafi farið með hlutverk Díönu í fimmtu seríunni. Þá hafi hún verið ánægð með hvernig hinn frægi kjóll hafi verið sýndur í þáttunum.
„Af því að Díana vissi alveg hvernig átti að spila leikinn. Þarna kemur viðtalið út hjá Karli og hún veltir fyrir sér: Hvernig næ ég að vera á forsíðum blaðanna á morgun? Velur þennan kjól og að sjálfsögðu var hún á öllum forsíðum!“
Hlusta má á þáttinn hér fyrir neðan. Hann er mættur á Spotify undir merkjum Bíóvarpsins.
