„Ég var mjög upptekinn af tískunni þegar ég var yngri, og jújú, ég er það enn, en á afslappaðri máta. Hér áður keypti ég mér aldrei föt án þess að hafa farið um allan bæ og fundið það rétta og ekki síst rétta merkið. Í dag vil ég enn góð merki og vandaðan fatnað, en mín helsta tískufyrirmynd er Marc Jacobs og þá sérstaklega vegna þess hve hann er frjálslegur í klæðnaði en getur líka verið mjög klassískur.“

Þetta segir Bjarni Viðar Sigurðsson, einn dáðasti keramiker Íslendinga.

Á unglingsárunum lét hann sig dreyma um að læra fatahönnun á Ítalíu.

„Þar lá áhugasviðið en það varð ekkert úr því að ég færi. Í staðinn vinn ég við listsköpun í keramikinu og það er ótrúlegt hversu miklar tískusveiflur eru í því, en rétt eins og í fatatískunni er margt sem heldur velli vegna þess hve klassísk verkin eru. Sjálfur fæ ég iðulega fyrirspurnir frá seljendum, hvort ég vilji senda þeim hina og þessa liti af verkum sem kaupendur vilja tímabundið en ég hef aldrei orðið við því. Ég vil fylgja mínu hjarta og gera nákvæmlega það sem ég brenn fyrir og ég veit að það kemur fram í verkunum,“ segir Bjarni.

Keramikmunir Bjarna eru eftirsóttir víða um heim. FRÉTTABLAÐIÐ/ERNIR
Gullfallegar könnur, háar og lágar, í mismunandi litum og formum. FRÉTTABLAÐIÐ/ERNIR

Í svörtu frá toppi til táar

Bjarni segir fatastíl sinn vera afslappaðan.

„Áður fékk ég oft að heyra að ég væri smá kreisí í fatavali og gleraugum, og ég var það. Ég elskaði allt sem var áberandi og keypti mér oftar en ekki geggjaða og litríka hönnun. Í dag elska ég að komast yfir jakkaföt í dempuðum litum, eins og blávínrauðu jakkafötin frá Sand sem ég keypti í Kaupmannahöfn og voru hönnuð af Ringo Starr. Þau eru minn uppáhalds klæðnaður.“

Þegar Bjarni vill stela senunni velur hann svarta litinn.

„Ég dýrka að klæðast svörtu frá toppi til táar og það er sjaldan sem maður sér karlmenn í öllu svörtu. Með aldrinum er ég þó farinn að ganga meira í litum sem fylgir því að ég nota liti mikið í minni listsköpun,“ segir Bjarni.

Þegar kemur að tísku er hann veikastur fyrir skóm.

„Ég er endalaust upptekinn af skóm og kaupi mér alltaf skó þegar ég finn ekki eitthvað til að versla mér. Nýlega ákvað maki minn að fara í gegnum skósafnið og úr einum skáp af þremur komu 45 pör, þrjú ónotuð og sum sem ný. Sum sem höfðu verið í mestu uppáhaldi voru farin að láta á sjá og svo voru aðrir skór bara ekki lengur ég. Því fengu fimmtán pör að fjúka þar og þegar næstu tveir skápar voru opnaðir kom í ljós að ég var eigandi að fleiri en hundrað skópörum,“ segir Bjarni og hlær að öllu saman.

Hér má sjá Bjarna í blávínrauðu jakkafötunum sem Bítillinn Ringo Starr hannaði fyrir tískuhúsið Sand og er í miklu uppáhaldi hjá Bjarna. FRÉTTABLAÐIÐ/ERNIR

Föt sem lyfta persónuleikanum

Tískuráð sem Bjarni tileinkaði sér fékk hann hjá kunningja sínum í Danaveldi.

„Hann sagði best að klæðast því sem manni líður vel í. Þá skipti ekki máli hver hönnuðurinn væri heldur að flíkin lyfti upp persónuleika manns,“ segir Bjarni.

Hann minnist fyrstu sýningu sinnar í Hafnarborg 2002.

„Þá ákvað ég að vera í hvítum fötum fyrri part dagsins og svörtum kvöldklæðnaði seinni partinn, en fatnaðurinn fór saman við glerungana mína. Sá hvíti var eins og hvítur krumpuglerungur og svörtu fötin eins og svartur og glansandi satínglerungur. Allt samkvæmt nýjustu tísku þá og passaði tilefninu algjörlega.“

Hamingja, gleði og jólaandi

Bjarni opnar sinn rómaðan jólamarkað á vinnustofu sinni að Hrauntungu 20 í Hafnarfirði í dag, fimmtudaginn 17. nóvember.

„Já, þetta er hátíðisdagur. Ég hélt jólamarkaðinn fyrst fyrir sextán árum og var þá með tóman bílskúr, tvær hillur, keyptar kökur, kók og appelsín. Ég var staðráðinn í að gera þetta að einhverju. Margir komu og ég varð steinhissa, segir Bjarni fullur tilhlökkunar.

„Ég er nokkuð viss um að þetta er stærsti einstaklings-jólamarkaður hér á landi. Hann byrjaði sem tveggja daga en undanfarin ár hefur hann staðið yfir í fjóra daga og með kvöldopnun. Bæði ungir sem aldnir koma á markaðinn og mér er mikið í mun að börnin hafi líka gaman af, enda hef ég heyrt hjá þeim sem koma með börnin sín að þau segi: „Vei! Þetta er fyrsti dagurinn af jólunum, að fara til Bjarna!“ Andrúmsloftið er þrungið hamingju, gleði og jólaanda, og öllum líður vel og finna sitthvað við hæfi í mat, kökum, drykk og auðvitað keramikinu líka,“ segir Bjarni sem dregur líka út einn heppinn vinningshafa á dag í veglegu jólamarkaðshappdrætti sem hann kallar Keramik í kassa.

„Börnin fá líka glaðning frá mér og það skemmtilegasta er að krakkar sem komu hingað lítil fyrir sextán árum eru nú orðin fullorðið fólk að kaupa sér muni í búið eða herbergið sitt. Mér þykir undurvænt um að sjá þessa einstaklinga koma aftur og aftur og eiga þessa jólahefð með mér. Minningin á alltaf að vera góð og falleg.“

Kertastjakarnir hans Bjarna eru allir einstakir í sinni röð og setja sérlega flottan brag á heimilið. FRÉTTABLAÐIÐ/ERNIR
Dásamlegir bollar og enginn einasti eins. FRÉTTABLAÐIÐ/ERNIR

Bakar frekar fram á nótt en að kaupa tilbúið

Á jólamarkaði Bjarna svigna borðin af dýrindis keramikhönnun í bland við lostætar hnallþórur og heimagerðar veitingar.

„Margir vina minna segja að ég ætti að einfalda málið og kaupa tilbúnar smákökur eða deig til að baka úr en það kemur ekki til greina. Frekar baka ég fram á nætur svo að nóg sé til fyrir mína gesti. Það verður að vera heimabakað og nú býð ég líka upp á marengstertur. Ég byrjaði að baka margens að gamni mínu fyrir nokkrum árum og þær áttu alls ekki að verða fastur liður en það er svolítið hættulegt að koma með nýjar hefðir því þær vilja oftast halda sér í jólahlýjunni á vinnustofunni.“

Í dag er bílskúrinn sem hýsti fyrstu jólamarkaði Bjarna farinn og í staðinn risin 90 fermetra viðbygging sem er vinnustofa listamannsins, opin, hlý og björt.

„Þegar maður heldur jólamarkað í sextánda sinn þýðir ekkert annað en að vera með nýja hönnun og í ár er þar engin undantekning. Reyndar er svo margt nýtt að sumt af eldri munum mínum hefur þurft að víkja. En það nýja getur líka verið það gamla í nýjum búningi, eins og eldfjöllin og margfætlurnar sem ég framleiði sérstaklega fyrir jólamarkaðinn en eru hönnun sem ég gerði í námi mínu 1988. Þá má nefna nýja kertastjaka, vasa og skálar, og margir koma til að fylla á stellin sín og það sem þeir eiga fyrir,“ greinir Bjarni frá.

Sjálfur hrífst hann af keramikverkum Claudi Casanovas.

„Þau eru hrein og bein náttúran, og það er einmitt það sem ég hrífst mest af í eigin verkum, þegar ég næ að gera glerunga sem líkjast náttúrunni sem mest. Oft og tíðum er það erfitt en þegar það lukkast er mikil gleði og hamingja.“

Að jólamarkaðnum liðunum ætlar Bjarni að ljúka vinnu við verk fyrir nýjan veitingastað í miðborg Reykjavíkur.

„Ég er einnig að vinna verk fyrir danska markaðinn en þar er mikil eftirspurn eftir verkum mínum og sem ég þarf að mæta með vinnutörn í desember og fram á nýárið. Síðan er að senda verkin til Danmerkur og fylgja þeim eftir þar. Næsta haust ætla ég að opna mitt eigið gallerí í miðbænum og þá er gott að hafa tímann fyrir sér því markaðurinn hér heima er gríðarlega stór. Þá þarf ég að vinna að verkefni fyrir nýjan sölustað í Bandaríkjunum sem ég hef ekki haft tíma til að sinna því enn. Það er því ekki rólegur tími framundan nema síður sé og að venju ég að undirbúa næsta jólamarkað í mars eða apríl. Svo öflugur er hann orðinn.“

Jólamarkaður Bjarna í Hrauntungu 20 í Hafnarfirði, opnar í dag fimmtudaginn 17. nóvember og verður opinn fram á sunnudaginn 20. nóvember frá klukkan 10 til 18. Allir hjartanlega velkomnir.

Vinnustofa Bjarna er opin, björt og hlý, og þar verður tekið á móti gestum með heimabökuðum jólatertum og smákökum, drykkjum, jólahappadrætti og glaðningi fyrir börnin á jólamarkaðnum. FRÉTTABLAÐIÐ/ERNIR