1.153 sóttu um í kórinn hans Daða fyrir Euro­vision

Alls sóttu 1.153 um að vera í kór Daða Freys í Euro­vision-laginu sem hann vinnur nú hörðum höndum að því að klára fyrir Eurovision í vor. Um­sóknar­frestur rann út á mið­nætti í gær og kemur fram á sam­fé­lags­miðlum Daða Freys að met­þátt­taka hafi verið.

Daði er á fullu að fara yfir inn­sendingar að sögn um­boðs­manns hans, en fram kemur á Twitter að allar inn­sendingar verði notaðar. Það má því búast við miklum fjöl­breyti­leika í laginu sem Daði Freyr er að semja, í anda keppninnar sjálfrar.

Hér að neðan má sjá aug­lýsingu sem Daði Freyr setti inn þann 4. janúar um að hann væri að leita að fólki í kór fyrir lagið.