Rúmfatabúðin Rúmföt.is sérhæfir sig í vönduðum rúmfötum. Verslunin selur fyrsta flokks rúmföt sem öll eru úr hágæða efnum.

Arftaki Fatabúðarinnar

„Á þessum tveimur árum höfum við fengið frábærar móttökur. Alveg ótrúlega góðar, verð ég að segja. Fólk sem kann að meta gæði og verslaði áður fyrr í Fatabúðinni og Verinu þakkar mér reglulega fyrir að hafa opnað svona vandaða rúmfatabúð,“ segir Björn Þór Heiðdal, eigandi verslunarinnar. Björn segist ekki vera í verslunarrekstri til að græða peninga, heldur er drifkraftur hans að selja frábær rúmföt á sanngjörnu verði.

„Auðvitað þarf búðin að leggja smá á vörurnar til að ganga vel, en vörurnar verða að standa fyrir sínu. Ég gæti aldrei selt bara eitthvað til að græða. Það selja margar búðir rúmföt og ef mikið liggur við geturðu jafnvel keypt rúmföt um miðja nótt í völdum stórmörkuðum ásamt snakkpoka og ítalskri rúllupylsu. Sjálfur myndi ég frekar sofa undir snakkpoka en rúmfötunum sem þar fást.“

Verslunin hefur stækkað og plássið í búðinni er orðið næstum því þrisvar sinnum meira en það var áður.

Góð þjónusta

„Það sem veitir mér ánægju er að gleðja fólk og partur af því er að veita góða þjónustu. Ég man eftir einni konu sem hafði keypt rúmföt hjá okkur. Þegar hún var búin að þvo rúmfötin og máta þau við rúmið fannst henni liturinn ekki passa.

Ég tók þau til baka og hún fann önnur sem henni leist betur á. Ég er ekki viss um að ég gæti labbað inn í dýrustu búðir bæjarins og beðið um að fá að skipta notuðum rúmfötum fyrir mig.“

Hildur Þórðardóttir hjálpaði við að hanna nýju búðina. FRÉTTABLAÐIÐ/SIGTRYGGUR

Fólk er duglegt að versla

Björn segir töluverðar framkvæmdir hafa verið í versluninni í haust sem eru ekki enn þá alveg búnar en það styttist í það. Verslunin hefur stækkað og plássið í búðinni er orðið næstum því þrisvar sinnum meira en það var áður.

„Þrátt fyrir COVID er alltaf nóg að gera hjá okkur. Það er sem betur fer ekki allt á niðurleið og fólk er duglegt að versla,“ segir Björn. Hann segir tilvalið að kíkja við í versluninni og næla sér í gæðarúmföt í jólapakkann, eða á jólasængina í ár og tryggja þannig góðan og óslitinn nætursvefn á næsta ári.

Hágæða barnarúmföt í miklu úrvali. Nú sofa allir undurvært.
Vönduð sérofin damask-rúmföt úr egypskri bómull frá Ítalíu.

Handsaumaður rúmfatnaður

„Við bjóðum upp á rúmföt frá allra bestu og vönduðustu vefurum Ítalíu. Meðal annars erum við með rúmföt frá ítalska merkinu Quagliotti sem vefur dúka og sængurföt fyrir bresku drottninguna. Fyrir rúmum tólf árum ákvað Hotel Ritz í París að bjóða gestum sínum upp á rúmföt frá Quagliotti, eftir ítarlega leit að bestu rúmfötum í heimi.

Öll fremstu hótelin, eins og The Mark í New York, MGM í Macau, The Peninsula í Hong Kong, Armani í Mílanó og 101 Reykjavík, bjóða gestum sínum upp á Quagliotti-rúmföt,“ segir Björn.

Hér má sjá fallegt gæða sængurver frá Kína, en Rúmföt.is er með gott úrval af fyrsta flokks barnarúmfötum.

Rúmföt.is býður einnig upp á handsaumaðan rúmfatnað úr gæðaefnum sem þekkt eru fyrir að veita mikil þægindi í svefni. Björn segir sérstöðu verslunarinnar ekki einungis liggja í þeim gæðaefnum sem rúmfötin eru saumuð úr.

„Þau eru líka mörg hver saumuð á staðnum af henni Möggu saumakonu, eða Margréti Guðlaugsdóttur eins og hún heitir fullu nafni,“ segir hann.

„Ég saumaði meðal annars fyrir Fatabúðina á sínum tíma en einnig fyrir búðirnar Höfnina, Erlu við Snorrabraut og Kristínu, en þær eru allar löngu farnar. Síðust til að fara var Fatabúðin og var mikil eftirsjá að henni,“ segir Magga, sem er öllum hnútum kunnug þegar kemur að vönduðum saumaskap.

„Sjálfur er ég að þessu vegna þess að ég einfaldlega elska góð rúmföt!“ segir Björn.


Verslunin á Nýbýlavegi 28 er opin frá 12-17 virka daga og 11-15 um helgar. Nánari upplýsingar má finna á rumfot.is. Sími: 565-1025.