Nemendur sem hafa útskrifast frá Söngskólanum í Reykjavík starfa núna um allan heim. Söngskólinn útskrifar nemendur með ýmsar prófgráður en boðið hefur verið upp á söngnám fyrir stúlkur og drengi, allt frá tíu ára aldri. Að sögn Ásrúnar Davíðsdóttur aðstoðarskólastjóra hefur eftirspurn eftir námi fyrir yngri nemendur aukist mikið og verður því aldurinn lækkaður niður í átta ára.

„Stór þáttur í náminu er þjálfun í því að koma fram og tjá sig, í söng, leik og hreyfingum,“ útskýrir Ásrún. „Ungdeildir skólans hafa undanfarin ár tekið þátt í alls konar uppfærslum. Þau hafa flutt ýmiss konar tónlist sem vinsæl er hjá þessum aldurshópum, ekki síst þar sem einnig er lagt upp úr leikrænni þjálfun, dansi og hreyfingum. Meðal annars hafa krakkarnir sett upp stytta útgáfu af Ávaxtakörfunni eftir Þorvald Bjarna. Sýningin var sett upp í samvinnu við Barnamenningarhátíð í Reykjavík,“ segir hún.

„Ungdeildin tók einnig þátt í jólatónleikum Eivarar í Hörpu en uppselt var á alla tónleikana. Nemendur Ungdeilda ljúka yfirleitt grunnprófi áður en þeir flytjast í almenna deild skólans þegar þau ná 16 ára að aldri. Námið veitir nemendum ómælda gleði og byggir upp sjálfstraust, ungviðið bókstaflega blómstrar og það kemur ljóslega fram á tvennum tónleikum sem deildin heldur árlega, auk uppfærslna sem þau taka þátt í með Nemendaóperu skólans,“ bætir Ásrún við.

Soffía H. Bjarnleifsdóttir, Ásrún Davíðsdóttir og Viðar Gunnarsson voru að vinna við undirbúning skólaársins þegar ljósmyndarann bar að garði. ?FRÉTTABLAÐIÐ/ERNIR

„Stór þáttur í námi nemenda við Söngskólann er þjálfun í að koma fram á tónleikum en náminu fylgir að sjálfsögðu fræðsla í öllum greinum er snúa að tónlist og flutningi hennar, eins og tónfræði, tónheyrn, nótnalestri, fræðslu um sögu tónlistar og flutning í aldanna rás. Allir nemendur þjálfast í að koma fram og syngja fyrir áheyrendur og fá tilsögn þar að lútandi, bæði í einkatímum og fyrir samnemendur. Nemendur sem komnir eru í framhaldsdeild, taka þátt í uppfærslum Nemendaóperu Söngskólans, sem hefur verið starfrækt frá árinu 1982. Settar hafa verið upp hátt í 50 uppfærslur, bæði í Reykjavík og á ýmsum stöðum á landsbyggðinni. Sýning síðasta skólaárs var Þinn Falstaff sem byggð var á óperuatriðum eftir Mozart, Beethoven, Verdi og Bizet. Sýningin var sýnd bæði í Iðnó í Reykjavík og Hofi á Akureyri en auk þess hefur Nemendaóperan sýnt í Hörpu, Leikhúskjallaranum, Salnum Kópavogi og Íslensku óperunni ásamt fleiri stöðum,“ upplýsir Ásrún.

„Fyrir utan almennt söngnám býður skólinn upp á ýmis námskeið. Má þar nefna söngnámskeið utan venjulegs vinnutíma fyrir söngáhugafólk á öllum aldri, ýmis meistaranámskeið og fyrirlestra fyrir söngnemendur, söngvara og söngkennara. Í vetur mun óperudeild skólans taka upp þá nýbreytni að vera með „galakvöld“ þar sem nemendur koma fram á búningatengdum tónleikum,“ bætir hún við.

Söngskólinn í Reykjavík var fyrstu 5 árin staðsettur að Laufásvegi 8, þá flutti hann að Hverfisgötu 45. Þaðan flutti hann á Snorrabraut 54 en síðastliðinn vetur fékk skólinn nýtt aðsetur að Laufásvegi 49-51. „Skólinn er núna staðsettur í yndislegu umhverfi sem varð kveikja að útitónleikum hjá okkur. Nemendur sungu fyrir nágranna og aðra gesti og oft varð úr skemmtilegur fjöldasöngur. Við buðum upp á heitt súkkulaði og stemmingin var frábær,“ segir Ásrún. „Tónleikarnir gengu undir nafninu UNDIR HLYNI þar sem við erum með verðlaunahlyn hér í garðinum,“ segir hún.

Ásrún minnir á að seinni partinn í ágúst fari fram áheyrnarprufur hjá Söngskólanum. „Þá er hlustað eftir því hvort röddin er óskemmd og með góða þroskamöguleika á söngsviðinu. Einnig þarf gott tóneyra. Undirbúningsmenntun hjálpar til þótt hún sé ekki skilyrði fyrir inngöngu.

Margir nemendur Söngskólans hafa skapað sér stóran sess í óperuheiminum og má meðal annars nefna Kristin Sigmundsson, Garðar Thór Cortes og Þóru Einarsdóttur. Einnig hafa margir þekktir söngvarar í rytmísku deildinni stundað nám við Söngskólann eins og Emilíana Torrini, Eivör Pálsdóttir, Kristjana Stefánsdóttir, Sigríður Thorlacius og Svavar Knútur.

Nánar má fræðast um starf skólans á heimasíðunni www.songskolinn.is. Skrifstofan er opin frá 10-16 og síminn er 552 7366.