Guðrún Erla Leifsdóttir, ávallt kölluð Erla, er framkvæmdastjóri Timberland á Íslandi. Erla og eiginmaður hennar, Samúel Guðmundsson, keyptu 50 prósenta eignarhlut í TBLSHOP Ísland ehf. árið 2018 og eignuðust það að fullu á síðastliðnu ári. Samúel er stjórnarformaður en reksturinn er alfarið í höndum Erlu. Þá sér dóttir þeirra, Sæunn Sunna Samúelsdóttir, um markaðsmálin. Maggý Lárentsínusdóttir, dóttir Erlu hefur líka hjálpað til við afgreiðslu á álagstímum, en hún stundar nám í hjúkrunarfræði. Svo hefur barnabarn þeirra, Esekíel Örn, 14 ára, fengið að stíga sín fyrstu spor í afgreiðslu í Timberland og vann meðal annars á opnunardaginn. Starfsmannahópurinn er þéttur og segir Erla að hún líti nánast á hann eins og litla fjölskyldu.

„Þeir sem hafa unnið hjá Timberland hafa yfirleitt starfað í nokkur ár og líður vel hjá okkur,“ segir Erla, stolt af starfsmannahópnum sínum.

Vatnsheldir leðurskór í hálfa öld

Timberland varð heimsþekkt fyrir „The Original Yellow Boot“ sem kom á markað 1973 og var fyrsti vatnsheldi leðurskórinn sem gerður hafði verið.

„Næsta ár verður stórt, þegar The Yellow Boot verður 50 ára. Hönnun og smíði skónna tók mörg ár. Takmarkið var að gera vatnshelda leðurskó, því á þeim tíma voru ekki til vatnsheldir skór eins og við þekkjum í dag. Þetta var ekki auðvelt, ég hef heyrt að þeir hafi sett skóna ofan í bala fullan af vatni þegar þeir luku störfum á kvöldin og tóku þá svo upp að morgni til að athuga hvernig til tókst. Að lokum fannst þessi frábæra aðferð, að festa leðrið á skóna án þess að gata það, sem varð grunnurinn að vinsældum skónna. Síðan hafa auðvitað komið ýmsar aðrar gerðir af skóm og alltaf eitthvað nýtt og spennandi ár hvert.“

Hinir heimsfrægu og sívinsælu Timberland skór fást vitaskuld í úrvali í Smáralind, sem og Timberland fatnaður og fylgihlutir. FRÉTTABLAÐIÐ/SIGTRYGGUR ARI

Timberland á Íslandi í 20 ár

„Ég veit nú ekki hvenær fyrst var farið að selja Timberland skó á Íslandi en Timberland opnaði fyrstu verslun sína í Kringlunni 2002 og naut strax mikilla vinsælda. Árið 2011 opnaði verslunin á Laugavegi í gömlu en fallegu húsi sem var aðeins 56 fermetrar. Því miður þurfti að loka Laugaveginum árið 2015 vegna skipulagsbreytinga í miðbæ Reykjavíkur. Það var því tímabært að stíga nýtt skref á tuttugu ára afmæli Timberland á Íslandi og opna nýja glæsilega Timberland verslun í Smáralind,“ segir Erla.

Miklar vinsældir á Íslandi

Timberland náði fljótlega góðri fótfestu á Íslandi og hafa skórnir náð ótrúlegum vinsældum. Margir höfðu kynnst þeim erlendis; Boots í Bandaríkjunum og handsaumuðu bátaskónum í Evrópu.

„Ég held að vinsældir þeirra á Íslandi séu svona miklar vegna þess að fólk veit að þetta eru sterkir og góðir skór. Það koma stundum menn til okkar í Kringluna og segjast vera búnir að eiga skóna í 10 til 15 ár, og þá kannski kominn tími á endurnýjun! Ég segi líka oft þegar fólk er að leita sér að „þægilegum“ skóm að þeir séu allir „þægilegir“, það er bara misjafnt hvað hentar hverjum og einum, því fætur okkar eru auðvitað afar misjafnir.“

Sorglegt að missa gamla húsið

Nú eru verslanirnar tvær á besta stað. Timberland í Kringlunni hefur verið rekin frá árinu 2002, en árið 2011 var opnuð lítil Timberland verslun á Laugavegi.

„Því miður varð að loka þeirri verslun 2015 þegar húsið var selt og ráðgert var að breyta skipulagi á lóðinni. Það var frekar sorglegur endir, því Timberland passaði svo frábærlega í þetta litla gamla hús sem á sínum tíma var eitt mest myndaða hús borgarinnar og stundum kallað „Jólahúsið“ þegar fyrrum eigendur skreyttu það með hvítum seríum fyrir jólin og var það alveg geysilega fallegt.“

Björt og stílhrein

„Svo sérkennilegt sem það er að Timberland passaði vel í 100 ára hús á Laugavegi, þá passar það eiginlega enn betur í Smáralind. Verslunin er mjög björt og stílhrein og bæði föt og skór njóta sín einstaklega vel í þessum nýju húsakynnum. Það er ótrúlega mikil breyting frá Kringlunni, sem er kannski ekki skrítið því innréttingarnar eru upprunalegar og 20 ára gamlar. Viðskiptavinir Smáralindar hafa tekið okkur opnum örmum en undanfarin ár hefur fólk oft spurt hvort við séum ekki líka í Smáralind. Það var því tími til kominn að opna hér líka, þó mörgum finnist mikið að hafa tvær Timberland verslanir í ekki stærra samfélagi. “

Hjónin Erla Leifsdóttir og Samúel Guðmundsson eru eigendur Timberland á Íslandi og opna nú nýja verslun í tilefni 20 ára afmælisins. MYND/AÐSEND

Netverslun fyrir nútímann

Rétt fyrir Covid opnuðu hjónin netverslun sem reyndist mikið lán.

„Fljótlega eftir að við hjónin hófum afskipti af rekstri Timberland á Íslandi vildum við opna netverslun, okkur fannst það einfaldlega hljóta að svara kröfum nútímans. Við réðumst í hönnun og uppsetningu netverslunarinnar sem var tilbúin korter í Covid. Það varð okkar lán, að vera komin á netið áður en faraldurinn hófst fyrir alvöru og bjargaði okkur eins og mörgum öðrum verslunum á erfiðum tímum, því það voru ekki margir á ferðinni í Kringlunni á meðan stífustu samkomutakmarkanirnar ríktu. Í byrjun var þetta allt handvirkt en í fyrra tengdum við birgðakerfið okkar við netverslunina, sem ætti að gefa öruggari og betri svörun. Svona kerfi eru samt alltaf í stöðugri endurnýjun og við reynum að svara kröfum markaðarins í samkeppni við erlenda risa. Okkar sérstaða er samt alltaf þjónustan og persónuleg aðstoð þegar fólk er í vanda varðandi stærðir og fleira. Þar njótum við góðs af þekkingu og reynslu starfsfólksins og sérstaklega Margitu Keire, verslunarstjóra í Kringlunni, sem á marga góða kunningja og vini meðal fastra viðskiptavina okkar en hún hefur starfað hjá Timberland á Íslandi frá árinu 2013.“

Leitast við að láta gott af sér leiða

Timberland leggur mikla áherslu á samfélagsábyrgð og sjálfbærni í öllum rekstrinum.

„Við leggjum mikla áherslu á að koma á framfæri þeim markmiðum og aðgerðum sem Timberland vinnur að, en það er til dæmis að framleiðslan verði kolefnisjöfnuð árið 2030. Þessu takmarki hyggjast þeir meðal annars ná með því að endurnýta plast, ull, leður, nælon og hvaðeina sem notað er í framleiðslunni. Timberland hefur um áratuga skeið verið leiðandi í umhverfis- og samfélagsmálum bæði í gegnum framleiðsluna, með stuðningi við bændur og framleiðendur og einstökum verkefnum þar sem börn og fullorðnir fá gefins skó og fleira. Fjöldi verkefna er í gangi um allan heim. Hér á landi höfum við leitast við að láta gott af okkur leiða með aðstoð við ýmis mannúðarmál, við höfum því miður ekki enn látið verða af því að vinna að skógræktar- eða landræktarstarfi en okkur dreymir um að fara með starfsfólkinu að gróðursetja eða vinna að hreinsun á einhverjum svæðum,“ segir Erla.

„Það er gaman að segja frá því að við höfum haldið í upphaflegu innréttingarnar í Kringlunni á meðan margar verslanir hafa skipt öllu út tvisvar til þrisvar, þetta vil ég þakka því vandaða starfsfólki sem unnið hefur hjá félaginu og gengið vel um innréttingarnar og passað upp á þær í gegnum árin.“

Ný verslun Timberland í Smáralind er björt og stílhrein og með glæsilegt vöruúrval. FRÉTTABLAÐIÐ/SIGTRYGGUR ARI

Starfsfólkið dýrmætast

Leyndardómurinn á bak við velgengni Timberland er starfsfólkið.

„Ég held óhætt að segja að án starfsfólksins værum við ekki upp á marga fiska. Það hefur verið gæfa okkar að hafa frábært starfsfólk sem leggur metnað í að sinna kröfum viðskiptavina og veita frábæra þjónustu. Það krefst auðvitað mikillar þolinmæði og samviskusemi að þjálfa upp nýtt starfsfólk og kenna ungu fólki að meta þau gildi sem eru í hávegum höfð hjá Timberland. Mér sýnist þær Margita í Kringlunni og Katla, sem nú er verslunarstjóri í Smáralind, vera mjög ákveðnar og samstíga í því að sú frábæra þjónusta sem við höfum veitt í Kringlunni verði einnig veitt í Smáralind,“ segir Erla.

Góður starfsmannahópur er gulls ígildi, að mati Erlu.

„Katla Jóhannsdóttir, sem er verslunarstjóri í Timberland í Smáralind, er frábær starfsmaður. Hún er rétt nýorðin tvítug og rúllar því upp að vera verslunarstjóri. Hún hóf störf hjá Timberland aðeins 15 ára gömul og sýndi strax á fyrsta degi að þarna var frábær sölumaður á ferð. Hún hefur svo unnið hjá okkur með skólanum og á sumrin og því þekkir hún vörurnar vel og getur óhikað mælt með þeim hvar sem er og hvenær sem er. Hún er einstaklega ábyrgðarfull, harðdugleg og samviskusöm, hefur mikið frumkvæði, tekur áskorunum fagnandi og leysir öll þau verkefni sem mér dettur í hug að leggja fyrir hana. Það er ómetanlegt að hafa svona starfsmann í litlu fyrirtæki þar sem fáar hendur þurfa að sinna mörgum ólíkum verkefnum. Hún hafði auðvitað frábæra fyrirmynd í Margitu Keire, en þær hafa unnið saman þessi ár og eru mjög góðar vinkonur. Katla stundar nám við Háskólann í Reykjavík á viðskiptabraut og mun halda áfram að sinna náminu í haust og við erum því að leita að nýjum verslunarstjóra í hennar stað.“

Timberland ekki bara skór

Vöruúrvalið í verslununum er gríðarlega fjölbreytt og vandað.

„Í verslunum okkar í Kringlunni og Smáralind bjóðum við skó fyrir alla fjölskylduna og höfum mjög breitt úrval, þó það sé mjög mikill munur á framboðinu haust og vor. Á sumrin eru sandalar og léttir gönguskór áberandi en á veturna leðurskór og stígvél eða boots. Auk þess höfum við fjölbreytt úrval af frábærum herrafatnaði, bolum og skyrtum sem framleiddar eru úr lífrænni bómull og hör, ullarpeysur og sl. vetur fengum við meira að segja endurunna ull. Yfirhafnirnar eru léttar á sumrin en þyngri og þykkari á veturna. Framboð á kvenfatnaði er einungis brot af því sem herrafatnaðurinn er. Upphaflega var það fjölskylda sem hóf að framleiða Timberland skóna, en árið 2011 var fyrirtækið selt til VF Corporation sem er með höfuðstöðvar í Bandaríkjunum, en fyrirtækið er leiðandi í framleiðslu á skóm og fatnaði og framleiðir meðal annars Napapijri, North Face, Vans, Dickies og fleira.“

FRÉTTABLAÐIÐ/SIGTRYGGUR ARI

Veit fátt ánægjulegra en viðskiptavin með bros á vör

Erla er bæði meyr og full þakklætis fyrir þær viðtökur sem verslanir þeirra hafa fengið.

„Þakklæti yfir að hafa fengið að taka þátt í rekstri Timberland á Íslandi og gefa þeim fjölmörgu sem til okkar koma tækifæri til þess að nota þessar frábæru vörur. Með því teljum við okkur líka leggja okkar af mörkum við að framfylgja markmiðum Timberland um betri nýtingu auðlinda og grænni heim fyrir alla. Ég veit fátt ánægjulegra en viðskiptavin sem fer út með bros á vör eftir að hafa fundið sína óskaskó.“ ■

Verslanir Timberland eru í Kringlunni og Smáralind. Sjá vefverslunina á timberland.is