Hlín Ósk hefur rekið lítið skartgripafyrirtæki Óskabönd-ÓSK í 10 ár ásamt fjölskyldu sinni. Á þessum árum hefur vörulínan stækkað mikið og margar konur þekkja orðið vörumerkið og eiga sitt óskaband. Hlín Ósk opnaði vefverslun fyrir fjórum árum og hefur hún sömuleiðis vaxið og dafnað vel, enda hefur vöruúrvalið aukist mjög mikið.

Féll fyrir orkusteinum

Hlín Ósk segist hafa verið um tvítugt þegar hún fór að búa til eyrnalokka en þá voru stórir lokkar mikið í tísku og eftirspurn eftir þeim. „Ég fann fyrir eftirspurninni og fór að selja lokkana,“ segir hún. „Ég hef alla tíð haft mikla þörf fyrir að skapa eitthvað með höndunum. Sömuleiðis hef ég unnið töluvert úr keramik og gleri, allt frá skarti upp í matarstell. Eftir að ég kynntist orkusteinunum hefur það hráefni átt hug minn allan og því verið uppistaðan í Óskaböndunum. Mér finnst orkusteinar bæði alveg ofboðslega fallegir og fjölbreyttir og svo trúi ég að þeir hafi jákvæð áhrif á okkur mannfólkið,“ segir Hlín Ósk, en skartgripir hennar eru gerðir úr eðalorkusteinum, Swarovsky-kristöllum, sterling, silfri, eðalmálmum, hrauni og stáli. „Þetta eru tímalausar gersemar sem gefa orku og fegurð,“ útskýrir hún.

Skartgripirnir frá Óskaböndum fást í nokkrum verslunum og hafa verið mjög vinsælir. FRÉTTABLAÐIÐ/ANTON BRINK

Fjölskyldan hjálpast að

Óskabönd er lítið fjölskyldufyrirtæki og Hlín Ósk segir að flestir fjölskyldumeðlimir séu virkjaðir á einhvern hátt. „Ég á mörg börn og hafa þau flest hjálpað mér á einhvern hátt í starfseminni. Stelpurnar mínar hafa verið fyrirsætur og aðstoðað við framleiðsluna, tengdadóttir mín hefur líka verið í fyrirsætustörfum hjá mér, en ég legg alltaf mikið upp úr því að hafa fallegar myndir. Ég lét útbúa glæsilegan bækling sem fylgir með öllum gersemunum. Sonur minn hefur einmitt hjálpað með tæknimálin og heimasíðuna. Mér finnst mikilvægt að halda úti góðri vefverslun en það er heilmikil vinna á bak við hana.“

Glæsilegar hálsfestar, hringir og armbönd.

Glæsilegar gjafir

Á heimasíðunni má skoða úrvalið sem Hlín Ósk býður upp á, en skartgripir hennar eru frábærir til gjafa. Hún leggur líka mikið upp úr því að hafa glæsilegar og vandaðar gjafaumbúðir sem gleðja þann sem fær gjöfina. „Það er svo mikið upplifun að fá fallega gjöf og ekki er minna ánægjulegt þegar hún inniheldur gersemar,“ segir Hlín Ósk og bætir við að vöruúrvalið sé orðið mjög mikið og alltaf að bætast eitthvað nýtt við. „Við erum með margar týpur af armböndum, hálsmenum, hringum og eyrnalokkum. Vinsælustu vörurnar eru orkusteinaarmböndin og orkusteinafestarnar, ásamt fíngerðum keðjum í mörgum útfærslum bæði stuttum og síðum. Ég er mjög hrifin af skarti sem hægt er að nota á mismunandi vegu, eins og til dæmis stuttum festum sem einnig er hægt að vefja tvisvar um úlnliðinn og nota sem armband.“

Þegar Hlín Ósk er spurð hvaðan hún fái innblástur fyrir sköpun sína og handverk, svarar hún: „Innblásturinn kemur aðallega frá þessari þörf minni og áhuga á að skapa og búa til með höndunum. Sköpunargleðin og ánægjan sem felst í því að sjá gersemarnar fullskapaðar veitir mér mikinn innblástur, einnig þykir mér alltaf jafn vænt um þegar kúnni kemur til mín og verslar aftur og aftur og er ánægður með þjónustuna og vöruna, það gefur mér mjög mikið,“ segir hún.

Óskabönd bjóða upp á margvíslega skargripi, armbönd, hringi, hálsfestar og eyrnalokka.

Skartgripir breyta kjólnum

Hlín Ósk hefur alla tíð haft mikinn áhuga á hönnun og fallegum hlutum og finnst fylgihlutir og skart geta breytt svo miklu. „Ætli fallegt skart og skór séu ekki í mestu uppáhaldi hjá mér. Kona getur til dæmis breytt einföldum svörtum kjól svo mikið bara með því að bera við hann fallega hálsfesti. Hann verður sem nýr kjóll með flottri hálsfesti, þess vegna geta skartgripir hjálpað til að gera fataskápinn miklu meira spennandi og fjölbreyttari. Allar konur elska að fá fallegan skartgrip að gjöf og ekki er verra ef honum fylgir orka,“ segir Hlín. „Það er líka gaman að geta þess að Óskabönd hafa frá upphafi lagt baráttunni gegn brjóstakrabbameini lið með því að styrkja Bleiku slaufuna. Með hverju armbandi fer hluti til Krabbameinsfélagsins í október og mér þykir það alltaf svo ótrúlega gleðilegt þegar ég get fært félaginu afraksturinn sem hlýst af þessu framtaki,“ segir Hlín Ósk.

Falleg armbönd með orkusteinum sem hafa verið mjög eftirsótt, tilvalin í jólapakkann eða sem tækifærisgjöf.
Glæsileg gjöf sem er afhent í fallegum gjafaumbúðum.