„Nýtt leikár Þjóðleikhússins hófst af krafti í haust með metnaðarfullum sýningum og aðsókn er í hæstu hæðum. Dagskrá leikársins er viðameiri en oftast áður og óhætt er að segja að mikil fjölbreytni einkenni leikárið. Gjafakortasala er komin á fullt skrið og líklegt að gjafakort í Þjóðleikhúsið verði í mörgum jólapökkum þetta árið. Þó leikhústöfrarnir gerist á sviðinu, þá viljum við líka að töfrarnir teygi sig um allt hús. Því er kærkomið að hafa getað tekið allt framhúsið í gegn til að bæta og stækka upplifun leikhúsgesta,“ segir Magnús Geir Þórðarson, þjóðleikhússtjóri.

Framúrskarandi listamenn á Stóra sviðinu

„Leikárið er óvenjulega stórt og metnaðarfullt,“ segir Magnús Geir. „Verkin eru ólík innbyrðis, þó óhætt sé að segja að íslensk verk séu áberandi, sem og sterkar kvennasögur. Við erum með óvenjulega fjölbreytt úrval verkefna fyrir börn og fjölskyldur.“

Gjafakort Þjóðleikhússins eru frábær jólagjöf fyrir hvern sem er og í raun gjöf sem heldur áfram að gefa.

Óhætt er að segja að jólasýningin Framúrskarandi vinkona, sem byggir á sögum Elenu Ferrante og er í leikstjórn hins heimsþekkta leikstjóra Yael Farber, verði einn af hápunktunum í leikhúslífinu í vetur. „Við erum stolt af því að hafa fengið þennan einstaka leikstjóra til að stýra stórum leikhópi Þjóðleikhússins í þessu metnaðarfulla verkefni. Svo er tilvalið fyrir gesti að panta sér ítalska matarveislu í tengslum við sýninguna. Við finnum fyrir miklum spenningi fyrir sýningunni en sala hefst í lok mánaðarins,“ segir Magnús Geir.

„Kardemommubærinn í leikstjórn Ágústu Skúladóttur hefur verið sýndur fyrir troðfullu húsi allar helgar og svo verður áfram fram eftir vetri, enda þurfa allar kynslóðir að fá að kynnast þessu vinsælasta barnaverki íslensku þjóðarinnar. Sýningar eru enn í fullum gangi á verðlaunasýningunni Vertu úlfur, sem var valin sýning ársins og sópaði til sín öllum aðalverðlaununum á Grímuhátiðinni í vor. Unnur Ösp Stefánsdóttir leikstýrði Birni Thors í sögu Héðins Unnsteinssonar. Nashyrningarnir í leikstjórn Benediks Erlingssonar hlaut mikið lof gagnrýnenda og leikhúsunnenda þegar sýningin var frumsýnd í vor, en snýr nú aftur í takmarkaðan tíma.

Vertu úlfur hefur slegið í gegn og sópaði til sín öllum aðalverðlaununum á Grímuhátiðinni í vor.

Glænýtt, íslenskt leikrit, Ásta, sem byggir á ævi og höfundarstarfi Ástu Sigurðardóttur, var frumsýnt í Kassanum í byrjun september. Höfundur og leikstjóri er Ólafur Egill Egilsson en Guðmundur Óskar og Matthildur Hafliðadóttir sömdu nýja tónlist við texta Ástu sem flutt er lifandi í sýningunni. Sýningin hefur notið mikillar hylli og þegar er uppselt fram í janúar og til að mæta eftirspurn flyst sýningin nú á Stóra sviðið,“ segir Magnús Geir.

Sannkölluð aðventustemning í leikhúsinu

„Um þessar mundir frumsýnum við Jólaboðið, sem Gísli Örn Garðarsson leikstýrir. Verkið byggir á þekktu leikverki Thornton Wilder en birtist hér í nýrri leikgerð sem er sprúðlandi skemmtileg og full af leikhústöfrum. Við gægjumst inn um gluggann hjá sömu fjölskyldu í Reykjavík á aðfangadagskvöld í 100 ár,“ segir Magnús Geir. „Það er mikill jólaandi í sýningunni og falleg jólatónlist. Jólaboðið verður aðeins sýnt fram að þrettándanum.

Fyrir skemmstu frumsýndum við glænýja jólasýningu fyrir yngstu börnin, Láru og Ljónsa – jólasögu, eftir Birgittu Haukdal og Góa, sem einnig leikstýrir. Þetta er tilvalin sýning fyrir yngstu börnin, enda þekkja þau persónurnar vel og hér birtast þær í fyrsta sinn á sviði og með glænýrri tónlist. Þegar er uppselt á yfir 30 sýningar og verið að bæta við aukasýningum. Á aðventunni verður einnig boðið upp á sýningar á Leitinni að jólunum eftir Þorvald Þorsteinsson, en sýningin er nú sýnd í 17. árið í röð,“ segir Magnús Geir. „Þá mun Þjóðleikhúsið bjóða upp á jólaskemmtun á tröppum leikhússins síðustu helgarnar fyrir jól og þangað er öllum fjölskyldum boðið.“

Leikritið Ásta var frumsýnt í byrjun september, en það byggir á ævi og höfundarstarfi Ástu Sigurðardóttur.

Glænýr stórsöngleikur og flugbeitt gamanverk Tyrfings

„Við hlökkum óskaplega til að frumsýna Sjö ævintýri um skömm, eftir Tyrfing Tyrfingsson í febrúar,“ segir Magnús Geir. „Tyrfingur hefur verið í hópi okkar fremstu höfunda á síðustu árum en sýningar hans hafa aldrei áður verið á Stóra sviðinu. Í aðalhlutverkum eru Ilmur Kristjánsdóttir, Sveinn Ólafur Gunnarsson, Ólafía Hrönn Jónsdóttir, Kristín Þóra Haraldsdóttir og Steinunn Ólína Þorsteinsdóttir, og Stefán Jónsson leikstýrir.

Í vor frumsýnum við glænýjan söngleik, Sem á himni, en það er langt síðan nýr söngleikur af þessari stærðargráðu hefur verið frumsýndur hér á landi,“ segir Magnús Geir. „Þetta er hjartnæm, áhrifarík og átakanleg saga með undurfagurri tónlist sem er flutt af stórum hópi af okkar fremstu leikara og söngvara, ásamt 14 manna hljómsveit sem spilar í gryfju.“ Unnur Ösp Stefánsdóttir leikstýrir, en með henni er landslið listrænna stjórnenda og meðal þeirra sem eru í stórum hlutverkum eru Elmar Gilbertsson, Salka Sól Eyfeld, Katrín Halldóra Sigurðardóttir, Guðjón Davíð Karlsson og Valgerður Guðnadóttir.

Í janúar verður nýtt íslenskt barnaleikrit, Umskiptingurinn, eftir Sigrúnu Eldjárn frumsýnt á Litla sviðinu. Þarna er á ferð gáskafull saga fyrir börn og fjölskyldur en leikstjóri er Sara Martí Guðmundsdóttir og Ragnhildur Gísladóttir semur nýja tónlist við verkið.

Jólaboðið er frumsýnt í kvöld, en verkið byggir á þekktu leikverki eftir Thornton Wilder.

Ást og upplýsingar er nýlegt verk eftir Caryl Churchill, eitt fremsta leikskáld Breta. Una Þorleifsdóttir leikstýrir þessu ferska og frumlega verki þar sem tekið er á samskiptum fólks á tímum þar sem ofgnótt upplýsinga litar líf okkar allt. Síðar í vor mun Þorleifur Örn Arnarson leikstýra nýju verki sem nefnist Án titils, en verkið er samið af leikhópnum í samstarfi við leikstjórann og leikskáldið Jón Atla Jónasson. Þar verður það krufið hvernig manneskjan tekst á við áföll og vinnur úr þeim.

Endurnýjaður leikhúskjallari að springa af lífi

„Þjóðleikhúskjallarinn á sér langa og merka sögu en að okkar mati hafði hann á vissan hátt misst sérkenni sín og styrk á undanförnum árum. Því fórum við í stefnumótun fyrir áherslur í Kjallaranum og endurbætur á aðstöðunni. Nú er Kjallarinn kominn í nær upprunaleg form og þar mætir hann okkur stórglæsilegur en sprúðlandi af lífi. Við höfum leyft okkur að kalla Kjallarann „klassabúllu“ og það lýsir ágætlega framboðinu sem þar er boðið upp á. Nú sitja áhorfendur við borð og njóta veitinga meðan á sýningum stendur og eru í mikilli nálægð við leikara og listamenn,“ segir Magnús Geir.

Í leikhópi Þjóðleikhússins eru margir af fremstu listamönnum þjóðarinnar. MYND/AÐSEND

Í kjallaranum er boðið upp á kabaretta, uppistönd, spunasýningar Improv-hópsins, sýningar af ýmsu tagi að ógleymdu hinu nýja Hádegisleikhúsi. „Hádegisleikhúsið hefur farið frábærlega af stað og nýlega frumsýndum við Rauðu kápuna, en svo koma tvö ný verk eftir áramót. Í Hádegisleikhúsinu getur fólk skotist í hádeginu og á innan við klukkustund notið stuttrar, skemmtilegrar leiksýningar og fengið hádegismat. Þetta er tilvalið fyrir vinahópa, vinnustaði og fólk sem vill brjóta upp hversdaginn,“ segir Magnús Geir.

Góðan daginn, faggi, er nýtt verk Bjarna Snæbjörnssonar í leikstjórn Grétu Kristínar en verkið hefur hlotið frábærar viðtökur og er sýnt fyrir fullu húsi. Sömuleiðis hefur sketsasýningin Kanarí notið mikilla vinsælda. Örn Árnason er nýbúinn að frumsýna verk sitt, Sjitt ég er sextugur, sem er persónuleg, fjörug og einlæg, en umfram allt bráðskemmtileg sýning.

Í vor frumsýnir Þjóðleikhúsið glænýjan söngleik, Sem á himni. Það er langt síðan nýr söngleikur af þessari stærðargráðu hefur verið frumsýndur hér á landi, en 14 manna hljómsveit flytur tónlist sýningarinnar ásamt leikurunum.

Til viðbótar við þetta fjölbreytta úrval leiksýninga í Þjóðleikhúsinu, þá fer leikhúsið í leikferðir um allt land með leiksýningar, meðal annars í skóla og leikskóla. Þá er leikhúsið að þróa mörg ný verk sem eru sýnd á Loftinu sem „verk í þróun“ og undir vorið verður nýtt íslenskt leikrit, Prinsinn, eftir Maríu Reyndal og Kára Viðarsson frumsýnt á Rifi og svo sýnt um allt land.

Tilhlökkun, upplifun og ógleymanlegar minningar

„Það er mikill kraftur í Þjóðleikhúsinu þessa dagana og algerlega frábært að finna þær góðu viðtökur sem dagskráin er að fá meðal leikhúsgesta. Það er augljóst að fólk er spennt fyrir því sem fram undan er. Gjafakort eru auðvitað frábær jólagjöf – í raun gjöf sem heldur áfram að gefa. Með gjafakorti gefur maður þeim sem manni þykir vænst um ávísun á ógleymanlega stund,“ segir Magnús Geir. „Gjafakortin okkar eru opin og renna aldrei út. Þannig getur sá sem kortið fær valið þá sýningu sem hann sjálfur vill helst sjá og þegar hann vill.

Þeim merka áfanga var fagnað í október að Kardemommubærinn var sýndur í 50. sinn og að sjálfsögðu var það fyrir fullu húsi, eins og alltaf.

Við höfum séð að sumir bjóða allri fjölskyldunni saman í leikhús, sem mér finnst ótrúlega fallegt. Í haust höfum við séð stóra fjölskylduhópa koma á Kardemommubæinn þar sem afar og ömmur hafa boðið allri stórfjölskyldunni í leikhús og þannig skapað sameiginlegar minningar. Ég gæti trúað því að margar slíkar fjölskyldur kjósi líka að koma saman á söngleikinn Sem á himni,“ segir Magnús Geir.

Fleiri spennandi jólatilboð

Til viðbótar við hin hefðbundnu opnu gjafakort, þá er boðið upp á sérstaka tilboðspakka á tilteknar sýningar. Þannig er hægt að fá ítalska leikhúsveislu sem samanstendur af miðum á Framúrskarandi vinkonu og ítalskar veitingar til að njóta fyrir sýningu og í hléi. Sams konar tilboð er á miða og veitingar á Sem á himni. Að endingu er hægt að fá miða og geisladisk með nýjum, ferskum útsetningum á lögunum í Kardemommubænum.

Nashyrningarnir í leikstjórn Benediks Erlingssonar hlaut mikið lof gagnrýnenda og leikhúsunnenda þegar sýningin var frumsýnd í vor.

Leikhúsunnendur hafa úr fjölbreyttu úrvali sýninga að velja í Þjóðleikhúsinu í vetur og eflaust eru margir sem vilja gjarnan upplifa leikhústöfrana. „Leikhúsið er list augnabliksins. Leiksýningarnar eru síbreytilegar og engar tvær sýningar eru eins. Töfrarnir gerast hér og nú, fyrir augum okkar og með þátttöku okkar. Þegar vel tekst til er ekkert stórkostlegra en gott leikhús. Það er heilandi og sameinandi, “ segir Magnús Geir. „Hver sýning er einstök og við stefnum að því að hreyfa við hverjum einasta leikhúsgesti, þannig að stund hans í leikhúsinu sé ógleymanleg í alla staði. Við hlökkum mikið til að taka á móti leikhúsgestum okkar á næstu mánuðum og lofum þeim einstöku leikhúsi.“ ■

Jólasýningin Framúrskarandi vinkona verður einn af hápunktunum í leikhúslífinu í vetur.