Líður þér illa eða hefur þú áhyggjur af einhverjum í kringum þig? Þá getur þú haft samband beint við barnaverndina þar sem þú býrð – en þú getur líka alltaf hringt í Neyðarlínuna 112.

Tilkynningar á virkum dögum Á vinnutíma getur þú haft samband við starfsfólk barnaverndar þar sem þú býrð. Á heimasíðunni bvs.is getur þú fundið allar upplýsingar um barnaverndarnefndir en mundu að þú getur líka hringt í Neyðarlínuna 112.

Tilkynningar á kvöldin, um helgar eða á hátíðisdögum Þegar barnaverndin þar sem þú býrð er lokuð, oftast eftir klukkan 16.00 á virkum dögum, getur þú haft samband við:

  1. Bakvakt barnaverndar Þú getur fundið símanúmer á heimasíðum sveitarfélaga eða á bvs.is
  2. Neyðarlínuna 112

Það verður hlustað á það sem þú hefur að segja og þér verður leiðbeint með hvað verður gert. Neyðarlínan er ALLTAF opin og það er ALLTAF hægt að hafa samband, alveg sama á hvað tíma dagsins það er og hvort sem það er um helgar eða á hátíðisdögum eins og til dæmis jólum eða í sumarfríinu.

Það er betra að láta vita en að þegja Margir hugsa „ég er örugglega að gera of mikið úr hlutunum“ eða eru ekki vissir um að vandinn sé nógu alvarlegur. Starfsfólk barnaverndar ákveður hvort vandinn sé alvarlegur eða ekki og hvort bregðast þurfi við. Þess vegna er best að láta vita, þó maður sé í vafa.

Ef þú hefur orðið fyrir einhverju heima hjá þér eða annars staðar sem hræðir þig eða sem lætur þér líður illa, eða ef þú eða einhver sem þú þekkir hafið upplifað erfiðleika heima eða annars staðar – hafðu þá samband við barnaverndina eða Neyðarlínuna 112. Þú getur líka haft samband ef þú ert ekki viss!

Þú færð ráð og leiðbeiningar Bæði barnaverndin og Neyðarlínan munu hlusta á það sem þú hefur að segja og ákveða hvort þú eða sá sem þú hefur áhyggjur af þarf að fá aðstoð strax. Þau gefa þér líka ráð og leiðbeina þér um framhaldið. Ef þú hringir í 112 mun starfsfólkið þar koma því sem þú segir frá, áfram til viðeigandi barnaverndarnefndar. Svo mun starfsfólkið þar hafa samband við þig annaðhvort strax eða eftir skamman tíma.

Alls bárust barnaverndarnefndum yfir tíu þúsund tilkynningar vegna meira en fimm þúsund barna í vanda á árinu 2019 og meira en þúsund tilkynningar bárust barnaverndinni í gegnum Neyðarlínuna 112. Aðalástæður þess að fólk hefur samband eru vanræksla á börnum, ofbeldi gagnvart þeim og það sem kallað er áhættuhegðun barna. Vanræksla á börnum getur verið af ýmsu tagi.

Vanræksla getur verið Þegar ekki er hugsað nógu vel um barn, ekki fylgst nógu vel með því, öryggi þess ekki tryggt, námi þess ekki sinnt eða barn er ekki stutt nægjanlega mikið.

Ofbeldi getur verið Þegar barn verður vitni að eða verður fyrir ofbeldi innan fjölskyldunnar (heimilisofbeldi), þegar alltaf er verið að tala niður til þess eða verið að skamma það, þegar barn er lamið, slegið eða farið illa með líkama þess t.d. einkastaði þess.

Áhættuhegðun getur verið Þegar börn misnota áfengi, neyta vímuefna, beita ofbeldi, eru í afbrotum eða stefna heilsu sinni í alvarlega hættu.

Mikilvægt er að hafa í huga að þetta eru aðeins dæmi um hvað getur verið að en það getur líka verið eitthvað annað sem er næg ástæða til þess að láta barnavernd vita.

Mundu að ekkert barn á skilið að búa í aðstæðum þar sem það er hrætt eða óttaslegið – láttu vita – hringdu í 112.

Páll segir mikilvægt að treysta innsæinu og vera vakandi þegar kemur að velferð barna. Það sé alltaf ákjósanlegra að leyfa börnum að njóta vafans. FRÉTTABLAÐIÐ/ERNIR