Sigrún Ásta Einarsdóttir, framkvæmdastjóri markaðs- og þróunarsviðs hjá A4, segir ýmsar áskoranir fylgja því að vinna heima. „Okkur skortir aðstöðu, plássið er minna og við höfum ekki það sama við höndina og á vinnustaðnum.“

Hún nefnir fjögur atriði sem vert er að hafa í huga þegar vinnan færist inn á heimilið:

1. Vera með vinnusvæði

2. Hafa verkefnalista

3. Skipuleggja vinnudaginn

4. Vera í góðu sambandi

Það er auðveldara að skipta á milli vinnu og einkalífs þegar hægt er að ganga frá vinnudóti.

Skilgreint vinnusvæði

Það sem skiptir hvað mestu máli við það að vinna heima er aðstaða. Meðal þess sem A4 býður upp á eru vörur sem hjálpa þér að skapa þitt eigið vinnurými, þar sem þú getur lagt frá þér vinnuna í loks dags.

„Nú standa margir frammi fyrir því að þeir eru ekki með aðstöðu heima hjá sér en þurfa að vinna heima. Ég er ein af þessum heppnu sem er með skrifstofu en margir þurfa að vinna á eldhúsborðinu. Hvað tekur við þegar klukkan er orðin fjögur og fjölskyldulífið á að taka við? Þá viltu ekki vera með vinnuna úti um allt heima hjá þér og þá er svo gott að geta tekið dótið til hliðar, sett í bakka og hann fer bara upp í hillu.“

Sigrún hvetur fólk til að viðhalda sinni rútínu eftir fremsta megni. „Ég er sjálf búin að vera að fara yfir þetta með mínu fólki, þegar það er að vinna heima, að vera með skilgreint vinnusvæði og halda sinni rútínu, eins og að vakna og klæða sig í fötin sem það myndi vera í í vinnunni. Ég mála mig til dæmis áður en ég sest niður, eins og ég sé að fara í vinnuna. Ég sest niður á ákveðnu svæði og þá er ég í vinnunni.“

Gerðu verkefnalista

Þá er áríðandi að hafa góða yfirsýn yfir daginn og mælir Sigrún með því að fólk notist við verkefnalista. „Ég byrja daginn á að setjast niður með minnisbókina og set niður þann verkefnalista sem ég ætla að vinna yfir daginn. Deildin mín er með stöðufundi í upphafi dags þar sem við setjumst niður og svo aftur í lok dags og förum yfir það hvernig dagurinn gekk, og hvað okkur tókst að gera.“

Skipuleggðu vinnudaginn

Það er gagnlegt að teikna upp daginn svo að tíminn nýtist. „Þegar maður er búinn að setjast niður með minnisbókina, með blað og penna, þá er maður búinn að kortleggja hvað maður ætlar að gera og getur þá frekar farið að raða niður deginum: hvað ætla ég að gera fyrir hádegi og hvað ætla ég að gera eftir hádegi og sjá þetta fyrir sér. Þess vegna erum við búin að vera að benda fólki og fyrirtækjum á hvaða vörur við erum með sem geta hjálpað þeim og þeirra starfsfólki að vinna heima.“

Vertu vel tengd/ur

Góð og regluleg samskipti við vinnufélagana eru svo afar mikilvæg. „Svo til að halda góðum afköstum þá skiptir auðvitað miklu máli að vera í góðu sambandi. Vera með spjallið opið, alveg eins og þú myndir spyrja vinnufélagann við hliðina á þér og snúa þér að honum, þá geturðu snúið þér að honum á spjallinu. Ég myndi ráðleggja stjórnendum að vera með stöðufundi, sjá framan í fólk og bjóða því góðan daginn, þá er maður enn þá hluti af teymi þó maður sitji ekki við hliðina á þeim.“

Í A4 er allt sem þú þarft fyrir heimaskrifstofuna.

Skýr skil milli lífs og vinnu

Sigrún segir áríðandi að hugsa vel um sjálfan sig og aðra á tímum sem þessum. „Við verðum að passa upp á andlega og líkamlega heilsu, á þessum tíma og þessum vikum sem fram undan eru. Ég hef hvatt mitt fólk til að fara í göngutúra og leyft því að ákveða hvort þau vilji gera eitthvað fyrir eða eftir hádegi, fá sér ferskt loft og brjóta upp daginn,“ segir hún.

„Það er ekki öllum gefið að vinna heima hjá sér í lengri tíma og við viljum ekki að heimilið verði vinnustaður allan sólarhringinn. Þegar þú missir þennan verknað, að fara heim eftir vinnu og setjast upp í bílinn til að keyra heim, þá glatarðu þessum mörkum sem skilja að vinnu og einkalíf og það getur verið erfitt að sleppa vinnunni.“

Það geti því reynst mörgum hægara sagt en gert að ljúka vinnudeginum. „Þú stendur upp þegar klukkan er orðin kortér yfir fjögur og hvað þá? Stendurðu upp til að undirbúa kvöldmatinn? Þú hefur kannski ekki möguleikann til að setja vinnuna til hliðar. Ýtir dótinu bara til hliðar og kemur fjölskyldunni við matarborðið,“ segir hún.

„Það er þessi áskorun sem svo margir standa frammi fyrir. Margir sem eru ekki komnir með aðstöðu, hafa kannski verið á leiðinni að koma sér upp aðstöðu og þurfa núna að bregðast við. Við erum með allt það litla og stóra sem þarf fyrir heimaskrifstofuna og hvetjum fólk til að skoða úrvalið á A4.is.“