Yngvi Tómasson, framkvæmdastjóri Leikbreytis, segir að samskipti fyrirtækja við viðskiptavinina hafi breyst mikið undanfarin ár og fari nú flest fram í gegnum tölvupóst eða netspjall auk þess sem það sé rík krafa um hraðari svartíma.

„Það er þekkt að þúsaldarkynslóðin vill frekar eiga samskipti í rituðu máli en með símtali og vill snöggan svartíma. Þess vegna vilja mörg fyrirtæki innleiða snjallmenni í sína þjónustu sem geta svarað helstu spurningum viðskiptavinanna samstundis,“ segir Yngvi.

„Við hjálpum fyrirtækjum að innleiða snjallmenni sem við sérsníðum fyrir hvern og einn viðskiptavin. Fyrsta skrefið er oft innleiðing netspjalls og síðan snjallmennis sem getur svarað endurteknum algengum fyrirspurnum um leið og þær berast. Við seljum líka ýmiss konar stuðningskerfi sem greina endurteknar fyrirspurnir,“ útskýrir hann .

„Við förum inn í fyrirtæki og finnum algengustu spurningarnar sem snjallmenni getur strax byrjað að svara. Við greinum grunnþarfir fyrirtækis en hjá mörgum fyrirtækjum þekkjum við þegar algengustu spurningarnar, t.d. hjá verslunum þar sem oft er spurt um skilarétt, opnunartíma og þess háttar. Þegar snjallmennið getur svarað þessum algengustu spurningu þá förum við út í frekari greiningu á hvaða svörum fólk leitast helst eftir hjá þeim fyrirtækjum sem við aðstoðum.“

Snjallmenni í sífelldri þróun

Yngvi hefur verið að þróa og prófa snjallmenni síðastliðin ár og nýtir bæði lausnir sem þegar eru til og þróar sértækar viðbætur fyrir íslenskan markað.

„Auk þess að svara fyrirspurnum höfum við líka leitað leiða til að snjallmennin geti ekki einungis stuðlað að aukinni sölu heldur jafnframt klárað söluna sjálf. Það getur þá jafnvel gert tilboð og unnið úr því. Hugsunin er að snjallmennin geti leitt vefverslun og fyrirtækjavefi,“ segir hann.

„Innleiðing snjallmennis er kjörið tækifæri til að greina betur samskipti við viðskiptavini. Með því að færa allt í ritað mál er hægt að rýna og stórbæta samskiptin og þar með þjónustuna. Í greiningunni getur falist að átta sig á helstu fyrirspurnum, hversu margir leitist eftir hreyfingaryfirliti, spyrjist fyrir um sölumál, hvaða tíma dags flestir hafi samband, allt verðmætar upplýsingar fyrir fyrirtæki.“

Þá er einnig hægt að nota snjallmenni í hina áttina – að fyrirtækin hafi beint samband við kúnnann og bjóði honum þjónustu.

„Það er hægt að nota Facebook til að nálgast ákveðna markhópa og þar erum við með ákveðnar hugmyndir að verkefnum. Til dæmis að góðgerðafélög og fyrirtæki sem selja áskriftir geti tekið á móti nýskráningum í gegnum netspjall og gengið frá skráningunni sjálfvirkt,“ útskýrir hann.

„Við erum líka langt komin með það að geta gengið frá samningum í gegnum netspjall við snjallmenni. Almennt er fókusinn hjá okkur í Leikbreyti sala og þjónusta í gegnum netið. Snjallmenni eru í raun bara ein vídd af þjónustu og sölu.“

Góðar undirtektir

Yngvi segir að almenn ánægja ríki hjá þeim sem þegar noti snjallmennin en mörg fyrirtæki eru að taka fyrstu skrefin í því.

„Fyrsta skrefið er innleiðing netspjalls yfir höfuð. Við höfum verið að stíla á það að fyrirtæki innleiði Facebook Messenger fyrir netspjallið og höfum verið þeim innan handar við það. Fyrirtæki eru oft hrædd við að þessu fylgi gríðarlega mikill kostnaður en í raun eru fyrstu skrefin við innleiðinguna ekki dýr. Við byrjum á að hafa spjallið hálfsjálfvirkt og finnum svo út hvaða hluti má hafa alveg sjálfvirka,“ segir hann. Það má því segja að snjallmennið byrji í hlutastarfi en auki svo við sig smátt og smátt.

„Við horfum á snjallmennin okkar eins og hvert annað vinnuafl sem fyrirtæki geta ráðið í vinnu. Fyrst þurfa þau þjálfun og aðlögun að starfinu sem þau taka að sér og í framhaldi standa þau og falla með því vinnuframlagi sem þau veita. Þannig má bera saman áhættuþætti þess að innleiða snjallmenni við það að ráða starfsmenn en hagræðingin fyrir fyrirtæki er umtalsverð.“ segir Yngvi.

„Við hjá Leikbreyti erum í viðskiptamiðaðri hugbúnaðarþróun og viljum að lausnir okkar bæti þjónustu og auki sölu viðskiptavina okkar. Gildin okkar eru að við berum ábyrgð á vinnunni okkar og lofum gegnsæi í tilboðum og verðlagningu.

Hægt er að sjá allt um snjallmennin og aðra þjónustur hjá Leikbreyti á snjallmenni.is