Sækja umbúðirnar til fólks

„Síðustu þrjú ár höfum við verið að auka og efla þjónustuna okkar, sérstaklega þann hluta sem snýr að því að sækja umbúðir til veitingastaða og húsfélaga. Við komum á staðinn og setjum upp ílát sem henta stærð og umfangi og svo komum við og sækjum þau og setjum ný ílát þegar þau fyllast,“ segir Kristinn Ólafsson, framkvæmdastjóri Grænna skáta.

„Margir gefa okkur umbúðirnar en við bjóðum líka upp á að greiða út skilagjaldið og þá borgum við að hámarki 11 krónur fyrir hverja einingu, en skilagjaldið er 18 krónur, svo við höldum eftir 7 krónum fyrir fyrir okkar þjónustu.

Við getum bæði komið og sótt ílátin reglulega í samráði við fólk, og líka boðið upp á ílát sem eru búin skynjurum, þannig að við sjáum hvenær við þurfum að koma,“ útskýrir Kristinn.

„Við bjóðum líka upp á þessa þjónustu fyrir félagasamtök og fyrirtæki og umfangið hefur verið að aukast hratt. Hótel og veitingaaðilar hafa einnig leitað til okkar í auknum mæli, en þeir hafa verið að átta sig á hversu þægilegt það er að fá okkur til að sjá um þennan hausverk.“

Kristinn segir fyrirtækjaþjónustu Grænna skáta í raun vera viðbót við almenna sorphirðu.

„Við erum byrjaðir að hasla okkur völl í þeim bransa. Það er nýtt fyrir mörgum að hægt sé að fá einhvern til að sækja þennan endalausa straum af umbúðum og margir vilja losna við vinnuna og sóðaskapinn sem því fylgir, en samt fá peninga út úr umbúðunum.“

Grænir skátar hafa því þríþættan megintilgang.

„Við viljum auka umhverfisvitund, afla fjár fyrir skátana, sem rennur óskert í uppeldis- og félagsstarf ungs fólks á vegum íslenskra skáta víðs vegar um landið, og veita þeim vinnu sem þurfa stuðning í vinnu í samvinnu við verkefnið Atvinna með stuðningi hjá Vinnumálastofnun. Nú erum við með yfir þrjátíu starfsmenn í mismunandi starfshlutfalli og langflestir starfsmenn okkar koma úr þessu verkefni. Við leggjum áherslu á þessa grunnþætti í öllum ákvörðunum og vinnu innan fyrirtækisins.“

Sparar tíma, vinnu og sóðaskap

„Fólk skilar líka umbúðum til okkar í grenndargámana og þær fáum við að eiga, en við tökum einnig við umbúðum í flöskumóttökunni í Hraunbæ 123, sem við rekum í samvinnu við Endurvinnsluna og þar er opið alla daga vikunnar. Þangað er hægt að skila umbúðum á sama hátt og fólk er vant og fá allt andvirði umbúðanna, en við fáum umboðsgjald frá Endurvinnslunni fyrir að sjá um stöðina,“ útskýrir Kristinn.

Hann hvetur alla sem vilja losna við vesen og sóðaskap í kringum flöskur og dósir að hafa samband við Græna skáta.

„Við erum jú sérfræðingar á þessu sviði og fólk styður samhliða góðan málstað,“ segir Kristinn kátur.

Nánari upplýsingar má finna á dosir.is