Regla ehf. var stofnað 12. desember 2008 og var markmið félagsins að bjóða upp á viðskiptakerfi með mikla sjálfvirkni til að auðvelda rekstur og minnka vinnu hjá fyrirtækjum af öllum stærðum og gerðum. Það má segja að það hafi tekist afar vel því kerfið er nú í notkun hjá þúsundum ánægðra notenda.

„Regla er hugbúnaður í áskrift á netinu, eða í skýinu og því engin þörf á hýsingu eða rekstri á tölvuþjónum. Þetta leiðir til þess að reksturinn verður hagkvæmari, einfaldari og öruggari,“ segir Sveinn Baldursson, þróunarstjóri afgreiðslukerfisins.

Kerfin sem Regla býður upp á eru íslensk hönnun og hafa ýmsir sérfræðingar komið að þróun þeirra, meðal annars viðskiptafræðingar, bókarar, endurskoðendur, tölvunarfræðingar og löggiltir bókarar.

„Regla býður upp á öflugt kassakerfi sem í rauntíma uppfærir bæði bókhald og vörukerfi, það getur hins vegar vel keyrt án nettengingar ef tenging við veraldarvefinn dettur út tímabundið og hefur það oft komið sér vel fyrir okkar fjölmörgu viðskiptavini. Viðmót kerfisins er skýrt og notendavænt, starfsmenn eiga auðvelt með að læra á það og í því er bein tenging við tímaskráningu,“ segir Sveinn.

Að sögn Sveins er hægt að móttaka allar tegundir af greiðslum í afgreiðslukerfi Reglu, svo sem eins og reiðufé, kortagreiðslur, erlenda mynt, reikningsviðskipti, netgíró, gjafabréf og inneignarnótur. „Fyrir veitingastaði er þægilegt borðakerfi og eldhúsprentun og í kerfinu er einfalt að skipta greiðslum. Fyrir verslanir er afkastamikið talningarkerfi, strikamerkjaprentun og öflugar tengingar við vefverslanir.“

Nýjasta viðbótin við afgreiðslukerfi Reglu er eldhússtjórnunarkerfi (KDS) en með því er hægt að stýra pöntunum frá viðskiptavinum á réttan stað í eldhúsinu og með réttum tímasetningum. Forréttapöntun birtist á snertiskjá hjá starfsmönnum í eldhúsi sem sjá um forrétti og þjónn í sal sér á sínu afgreiðslutæki þegar rétturinn er tilbúinn, á réttum tíma birtist svo pöntun á aðalrétt á réttum stað í eldhúsi og þjónninn hefur alltaf yfirsýn á sínu tæki hvar pöntunin er stödd á hverjum tíma. Sveinn segir að kerfið hafi reynst mjög vel. „Þjónustan við viðskiptavini er betri og fyrirsjáanlegri og færra starfsfólk þarf, bæði í eldhúsi og í sal.“