Menningarveisla sem haldin er á sumrin býður upp á tónleika, listasýningar, myndasýningar, umhverfissýningar, skoðunarferðir og fleira. Einnig er starfandi Íþróttafélag, skátafélag, leikfélag og félagsmiðstöðin Loftið. Sólheimar eru elsta starfandi umhverfissamfélag eða „Eco village“ á Norðurlöndum sem leggur stund á lífræna ræktun. Á Sólheimum búa um 100 manns og eru 43 þeirra fatlaðir. Starfsemin á Sólheimum er fjölbreytt, sem dæmi má nefna skógrækt og garðyrkjustöðvar þar sem stunduð er lífræn ræktun. Verslun, Listhús, kaffihús og gistiheimili. Listvinnustofur eru á Sólheimum með kertagerð, listasmiðju, keramiki, vefstofu, jurtastofu og smíðastofu. Einnig er íþróttahús og sundlaug á Sólheimum.

Morgunfundur

Ég tel að margir hefðu gott af því að upplifa hreina mannelsku, náungakærleik byggðan á mannrækt og jafningjagrundvelli, eins og tíðkast á Sólheimum. Kirkjuklukkur Sólheimakirkju hringja alla virka daga klukkan 9 og morgunfundur íbúa og starfsmanna hefst. Fundurinn er hefð sem verið hefur í 90 ár, til að upplýsa hvað er að gerast og þakka fyrir góða hluti. Sumir mæta fyrir fundinn og stunda morgunleikfimi og jóga.

Íþróttafélagið Gnýr

Allt íþróttastarf er undir merkjum Íþróttafélagsins Gnýs, sem var stofnað 1983.

Við hvetjum til heilbrigðs lífernis, með góðu framboði á reglulegri hreyfingu sem bætir heilsu, vellíðan og getur verið einn hluti af meðferð við mörgum algengum sjúkdómum og lífsstílstengdum vandamálum. Það eru margir skemmtilegir hreyfimöguleikar í íþróttahúsinu, eins og boccia, bandí, badminton, körfubolti í sal, en í kjallara er tækjasalur, boxpúði og nuddaðstaða. Úti er frisbíkarfa, fótboltavöllur og golfæfingabraut. Um sextán manna hópur stundar boccia reglulega og tekur þátt í nokkrum mótum HSK og Íþróttasambands fatlaðra árlega.

Kvennahlaup Sólheima og Sjóvár er fastur liður og ávallt vel sótt. Annað hlaup er Sólheimahlaup og Frískir Flóamenn.

Hjólað í sýndarveruleika

Nú er svo komið að sumir íbúar eru farnir að eldast en vilja áfram stunda skemmtilega hreyfingu sem hægt er að stunda allt árið, því var hrundið af stað ósk um stuðning við að fjárfesta í tveimur hjólum sem tengd verða við skjá og hægt verður að hjóla hvar og hvert sem er í sýndarveruleika.

Skátafélag Sólheima

Skátafélag Sólheima er 35 ára. Stofnendurnir, Gummi Páls og Gaui litli, settu mark sitt á starfið og ég verð að nefna skáta eins og Kristján Má Ólafsson, sem heilsaði að skáta sið alla daga og Árna Alexandersson, legómeistara Íslands, þeir lifðu sem skátar en báðir eru þeir fallnir frá.

Rótað í moldinni

Sesselja kynntist fræðum og aðferðum mannspekingsins Rudolfs Steiners. Undirritaður var sendur til Englands á námskeið í vistræktun, „permacultur“ 2012, hjá Patrick Whitefield heitnum, sem var einn af þessum alvöru leiðtogum sem minntu svo oft á að mannkynið þurfi að aðlagast náttúruöflunum, móðir jörð getur vel lifað og blómstrað sem aldrei fyrr án okkar. Þegar heim kom og samkvæmt kenningum og aðferðum, fór ég að róta í moldinni og Tröllagarður varð til. Garðurinn er gerður af íbúum Sólheima fyrir íbúa Sólheima. Það er fátt eins dásamlegt og að skjótast í Tröllagarð og sækja krydd og salat fyrir kvöldmatinn.

Sundlaug Sólheima

Sundlaug sem er 6 x 12 metrar ásamt heitum potti. Sundlaugin hefur verið lokuð í tæp tvö ár vegna viðgerða. Verklok eru áætluð í lok sumars 2020 og nýtt sturtu- og skiptiklefahús er áætlað árið 2021.

Leikfélag Sólheima

Leikfélagsstarfið er einstakt þar sem um 40 fatlaðir og ófatlaðir íbúar Sólheima taka þátt í sýningunni árlega.