Egla-möppurnar eru mikilvægur þáttur í starfsemi Múlalundar, vinnustofu SÍBS, sem veitir um 80 manns með skerta starfsorku vinnu árlega.

Nýju möppurnar enn umhverfisvænni og án plasts

Nýju Egla-möppurnar eru eingöngu úr pappa og pappír, auk járnsins og er pappírskápa límd utan á endurunninn pappa. Þær eru því án plasts og henta vel til endurvinnslu í lok notkunar. „Nýju möppurnar eru sérstyrktar, járnin eru þau sömu og áður, og við vonumst til þess að þær endist jafn vel og hefðbundnar Egla-möppur. Það er þó klárt að þær þola t.d. bleytu síður en gömlu möppurnar, sem yfirleitt er ekki vandamál. Pappírinn í möppunum er evrópskur, vottaður pappír. Þær eru því enn umhverfisvænni kostur en eldri gerðin,“ segir Sigurður Viktor Úlfarsson, framkvæmdastjóri Múlalundar.

Mikil ending fyrir umhverfið

Hefðbundin Egla-mappa er samsett úr sterkri plastkápu sem límd er utan á endurunnið pappaspjald og hún síðan járnuð. Það þýðir að við lok notkunartíma möppunnar þarf að flokka möppuna sem almennt sorp. Það jákvæða er að Egla-möppur eru mjög sterkar og endingargóðar. „Fjölmörg fyrirtæki og einkaaðilar nýta sömu möppurnar aftur og aftur, ár eftir ár. Við teljum að þessi langa ending geri þær mjög umhverfisvænar þegar allt er talið. Plastið sem notað er í möppurnar er evrópskt plast sem tryggir að öll íblöndunarefni eru skráð og þekkt,“ segir Sigurður.

Nýju Egla- möppurnar eru úr pappa og pappír og því plastlausar

Tvær stærðir og tveir litir til að byrja með

Til að byrja með verður boðið upp á nýju möppurnar í fjórum útfærslum, svörtum og hvítum, með 5 cm eða 8 cm breiðum kili. „Svartir og hvítir litir passa við alla aðra liti á skrifstofunni og hafa lengi verið vinsælustu litirnir meðal viðskiptavina Egla. Um áramótin stefnum við á að bæta a.m.k. bláum við,“ segir Sigurður. „Verðið verður lítið eitt hærra á nýju möppunum sem orsakast af hærra innkaupsverði.“ Hefðbundnar Egla-möppur eru í boði í nokkrum stærðum í 8 litum.

Límdir kjölmiðar

Til að losna alveg við plastið á nýju möppunum er kjölmiðunum ekki rennt ofan í plastvasa á kilinum, heldur eru þeir límdir á möppuna. Hægt verður að fá aukamiða sem límdir eru yfir þá gömlu eða þeim eldri skipt út fyrir nýja.

Vilji fyrirtæki framleiða eigin kjölmiða til að líma, þá getur Múlalundur séð um það fyrir viðskiptavini.

Þá verður á næstu mánuðum í fyrsta skiptið hægt að fá Egla-möppur án kjölmiða og þá annaðhvort láta letra upplýsingar eða merki á kjölinn eða hafa hann alveg auðan. „Sumum viðskiptavinum finnst það flottara og nútímalegra, og þá bjóðum við að sjálfsögðu upp á þann möguleika,“ segir Sigurður Viktor.

Múlalundur býður áfram upp á aukakjölmiða bæði á nýju og eldri gerðirnar, til að renna í plastvasana eða líma á nýju möppurnar. Þeir skapa enn meiri vinnu á Múlalundi.

Múlalundur tekur að sér fjölbreytt verkefni. FRÉTTABLAÐIÐ/ANTON BRINK

Áletrun eða fleiri göt

Óski viðskiptavinir eftir því er margt í boði þegar laga þarf Egla-möppur að sérþörfum viðskiptavina. Stöðluðu möppurnar eru tveggja gata en óski viðskiptavinir eftir því eru í boði bæði þriggja og fjögurra gata Egla-möppur.

Múlalundur býður einnig upp á að letra fyrirtækjamerki og upplýsingar á Egla-möppurnar, sem skapar enn meiri vinnu á Múlalundi.

„Töluvert margar stofnanir og fyrirtæki nýta sér þetta. Með því auka þær upplýsingaöryggi, því þá er skýrt ef mappa frá þeim er komin þangað sem hún á ekki að vera. Merkingarnar eru fallegar og möppur oft áletraðar útlitsins vegna.

Sumir viðskiptavinir láta gera eigin kjölmiða og setja þannig sinn svip á rýmið sem mappan er í, “ bætir Sigurður við.

Box í sama útliti fyrir allt hitt

Hluti af Egla-línunni eru svokölluð tímaritabox, sem hægt er að nota undir skýrslur og önnur gögn sem ekki er hægt að gata og setja inn í möppu. Kjölurinn á þeim lítur út eins og Egla-mappa og því verða hillur mjög snyrtilegar þegar einungis sést í kilina og engar lausar skýrslur eru á víð og dreif um hillurnar.

Hefðbundnar Egla-möppur má einnig fá minni, fyrir A5 gögn bæði standandi og liggjandi, og fleiri stærðir. Þá býður Múlalundur gatapoka sem passa í allar möppurnar svo vel fari um gögnin.

Vörurnar skapa störf fyrir fólk með skerta starfsorku.

Gott fyrir umhverfið

Múlalundur framleiðir fjölbreyttar vörur, þ.m.t. möppur af öllum stærðum og gerðum, plastmöppur í skóla auk þess að selja allar skrifstofuvörur sem fyrirtæki þurfa á einum stað, þar með talið penna, fundarbækur, dagbækur og margt fleira.

Undanfarin misseri hefur verið unnið að umhverfismálum á Múlalundi. Plastið sem Múlalundur notar í möppur, plastvasa, barmmerki og fleira er evrópskt plast sem er vottað og skráð í evrópska gagnagrunna. Það tryggir að öll íblöndunarefni eru þekkt. Plastið er einnig vottað til notkunar í leikfangaframleiðslu þar sem gert er ráð fyrir að börn stingi því upp í sig. „Til að fá slíka vottun í Evrópu þarf hreinleikinn að vera mjög mikill,“ segir Sigurður.

„Glæra plastið sem við notum í plastvasa, gatapoka og möppur á Múlalundi er 100% endurunnið plast sem annars hefði endað í ruslinu. Annað plast er að stórum hluta, á bilinu 40-60%, endurunnið. Með þessu minnkum við umhverfissporið verulega.

Með því að framleiða gæðavöru sem endist um árabil, úr endurunnu hráefni, teljum við okkur vera að leggja töluvert af mörkum til betri heims. Við það bætist svo að vörurnar skapa störf fyrir fjölda fólks með skerta starfsorku og hafa þannig enn meiri jákvæð samfélagsleg áhrif.“

Vefverslunin vinsæl

Á heimasíðunni mulalundur.is, er rekin stór vefverslun. „Þar geta viðskiptavinir valið úr glæsilegu úrvali og bæði verð og úrval kemur flestum á óvart. Það er einfalt að versla á netinu og við sendum vörurnar strax daginn eftir,“ útskýrir Sigurður, en fari pöntun yfir 16 þúsund krónur er frí heimsending um allt land. Fyrir minni pantanir er lágt sendingargjald, 2.150 krónur.

Á Múlalundi er sífellt leitað nýrra verkefna svo skjóta megi fleiri og styrkari stoðum undir reksturinn.

Virkir á vinnumarkaði

Á Múlalundi er aðstaða til að taka á móti mun fleira starfsfólki en forsenda fjölgunar er aukin viðskipti og verkefni. „Þetta er hörkuduglegt fólk og það þarf að hafa nóg að gera. Vinnudagur og verkefni eru löguð að getu hvers og eins.

Nýjar og enn umhverfisvænni Egla-möppur styðja við starfsemi Múlalundar og tryggja að í fyrirtækjum sé „röð og regla með Egla“, eins og við segjum á Múlalundi, í góðri sátt við umhverfið,“ segir Sigurður ánægður.


Múlalundur vinnustofa SÍBS er við Reykjalund í Mosfellsbæ. Sími 562 8500 netfang [email protected] Sjá nánar á mulalundur.is