Það er engin tilviljun að heilsulindin Fontana sé staðsett einmitt við Laugarvatn, enda er baðsaga svæðisins rík og á rætur að rekja til jarðfræði vatnsins. Ekki skemmir náttúrufegurðin fyrir enda er Laugarvatn eitt fallegasta bæjarstæði landsins. Þeir eru ófáir Íslendingarnir sem bera sterkar taugar til gufunnar við Laugarvatn og sögu hennar. „Upp úr 1930 byrjuðu menn að nota hverinn þar sem Fontana er staðsett, um sama leyti og Héraðsskólinn var byggður. Í fyrstu var tjald sett yfir hverinn sem myndaði hið eiginlega náttúrulega gufubað. Síðar var byggð betri aðstaða og þannig skapaðist hefð fyrir gufunni sem hefur fylgt staðnum og hvernum til dagsins í dag,“ segir Guðmundur Fannar Vigfússon, sölu- og markaðsstjóri Fontana.

Guðmundur Fannar Vigfússon er sölu- og markaðsstjóri Fontana.

„Gufan er eins náttúruleg og hugsast getur. Í gufunni úr hvernum eru virk efni sem finnast ekki í venjulegum vatnsgufum en gestir sitja bókstaflega fyrir ofan heitan hverinn og njóta gufunnar beint úr hvernum. Okkur finnst þetta alveg einstakt og teljum að ekki séu margir staðir í heiminum þar sem fólk geti setið beint fyrir ofan heitan hver, heyrt hann bubbla og notið gufunnar frá honum,“ segir Fannar.

Gufan í Fontana er eins náttúruleg og hugsast getur. Gestir sitja bókstaflega fyrir ofan heitan hverinn og njóta gufunnar beint úr hvernum.

Listin að slaka á

Fontana samanstendur af gufunni frægu, sánabaði, fjórum mismunandi heitum og misdjúpum laugum, sem ganga undir nöfnunum Lauga, Sæla, Viska og Bullunga, og svo Laugarvatni sjálfu. Það vekur athygli gesta að í lauginni Sælu er að finna listaverk eftir Erlu Þórarinsdóttur. „Í grynnri hluta laugarinnar eru verk sem höfða til barna og leikja með rennsli vatns. Í dýpri enda laugarinnar er hins vegar höfðað til hvíldar. Verkin eru mótuð úr svörtu graníti og hafa börn mjög gaman af því að leika sér við verk Erlu í lauginni.

Laugarvatn er svo stór hluti af baðupplifuninni í Fontana. Hægt er að ganga frá laugunum út á bryggju og vaða þaðan út í frískandi vatnið. Heitar uppsprettur við ströndina gera það að verkum að yfirborðsvatnið getur verið hlýtt og notalegt við ströndina en kólnar þegar utar dregur.

Mikil þróun á baðmenningu landsins hefur átt sér stað undanfarin ár og við hjá Fontana fylgjum þeirri þróun af metnaði. Á næstu misserum munum við vinna að stækkun og breytingum á heilsulindinni. Framkvæmdir eru ekki byrjaðar en það er stefnt að því að stækka og breyta í nánustu framtíð.

Við mælum alla jafna með því að fólk bóki fyrir fram áður en það mætir til okkar í böðin, en það er ekki nauðsynlegt. Fólk getur líka mætt í Fontana án bókunar og notið gufunnar og lauganna.“

Einstök baðupplifun

Laugarvatn er einn af áfangastöðum Gullna hringsins, vinsælustu dagleiðar ferðamanna, sem samanstendur af Þingvöllum, Geysi og Gullfossi. „Laugarvatn er í hjarta þessarar leiðar og er Fontana við Laugarvatn stórgóð viðbót við afþreyingu þeirra sem ferðast þessa leið. Það var í raun grunnurinn að tilkomu heilsulindarinnar, að hægja á ferðamanninum og gefa honum kost á að slaka á og njóta tilverunnar í fallegu umhverfi.

Okkar gestir upplifa einstaka nálægð við náttúruna og njóta einnig stórfenglegs útsýnis yfir vatnið. Auk þess er fjallasýnin mögnuð á góðviðrisdögum og í góðu skyggni. Hér er rólegt og fallegt umhverfi og njóta gestir okkar alls þess besta sem staðurinn hefur upp á bjóða. Gestir geta slakað einstaklega vel á í fallegu umhverfi. Það er einstök upplifun að sitja ofan á heitum hver og finna hitann og gufuna frá jörðinni. Ekki skemmir svo aðgengið að Laugarvatni fyrir, þar sem hægt er að kæla sig niður eftir heita gufuna og laugarnar.

Önnur einstök upplifun sem við bjóðum upp á hér í Fontana á Laugarvatni er hverabakað rúgbrauð. Hver hleifur er bakaður í 24 tíma alls og við förum tvisvar á dag að grafa upp nýbakað rúgbrauð og berum svo fram með smjöri og reyktum silungi. Fyrir erlenda gesti okkar er þetta einstök upplifun, að sjá hvernig við nýtum orku jarðar og jarðvarma til rúgbrauðsbaksturs.“

Nánari upplýsingar má finna á www.fontana.is.