Midgard var stofnað 2010. Í fyrstu var aðaláherslan á prívat ferðir fyrir útlendinga. „Árið 2015 keyptum við iðnaðarhúsnæði hér á Hvolsvelli sem hafði verið í lítilli notkun í mörg ár, gerðum það upp og opnuðum dyrnar á Midgard Base Camp árið 2017,“ segja þær stöllur Hildur og Björg.

Gleði, sjálfbærni, fjölskylda, umhyggjusemi og ævintýri

„Midgard Base Camp hýsir í dag alla starfsemi okkar: gistinguna, veitingastaðinn og ferðaþjónustuna. Hönnunin á rýminu er lífleg og á að endurspegla gildin okkar: gleði, sjálfbærni, fjölskyldu, umhyggjusemi og ævintýri. Midgard Base Camp er orðið ein helsta miðstöð ævintýra og menningar á Suðurlandi: Útivistarnámskeið, fyrirlestrar, uppistand og fullt af tónleikum, bæði með listamönnum úr héraði og öðrum, eins og Bríeti, Hjálmum, Moses Hightower, Góssi, Ásgeiri Trausta og mörgum öðrum. Á veitingastaðnum er maturinn unninn frá grunni, við notum hráefni úr nærumhverfinu og tryggjum góðan mat fyrir grænkera. Draumurinn er að það verði sjálfsagður hluti af ferðalagi Íslendinga um Suðurland að koma við í mat á Midgard, fá sér góðan drykk og skemmtilegan og áhugaverðan mat í upplífgandi umhverfi.“

Kvennaferðir vinsælar

„Síðustu tvö ár hafa reynt á sköpunargleðina til að aðlagast breyttum aðstæðum. Áður voru um 80% okkar gesta frá Bandaríkjunum en í dag er helmingur gesta, bæði í gistingu og ferðum, Íslendingar. Við höfum lagt aukna áherslu á gönguferðir síðustu tvö ár og erum að þróa nýjar og skemmtilegar vörur. Göngurnar okkar á Fimmvörðuháls og Grænahrygg hafa verið feikilega vinsælar. Ferðirnar eru svolítill lúxus, fólk gistir hjá okkur, við flytjum það á staðinn, vísum því veginn og eldum fyrir það í lok ferðar, á meðan fólk slakar á í heitum pottum eða í bjórjóga. Kvennaferðir hafa verið vinsælar hjá okkur síðustu 3 ár og okkur þykir það frábær hópur að ferðast með. Í sumar ætlum við að halda okkur við uppáhaldssvæðið okkar, Fjallabak, og bjóða upp á fleiri göngur þar. Við skelltum nýverið á heimasíðuna tveggja daga lúxus kvennaferð á Laugaveginn með óvæntum uppákomum og gleði, sem við erum mjög spenntar fyrir og erum vissar um að verði algjört æði!“

Mjög fjölbreyttur gestahópur

Midgard hefur unnið með kvikmyndatökufyrirtækjum og hentar staðurinn vel fyrir slík verkefni. Skólahópar sem eru að læra um endurnýjanlegar orkulindir og sjálfbærni eru einnig stór hluti af gestum þeirra.

„Við teljum Ísland vera eina bestu skólastofuna fyrir sjálfbærnimenntun og viljum gjarnan vinna meira með slíka fræðslu í okkar ferðum. Síðast en ekki síst þá vitum við að það sem við bjóðum upp á hentar vel fyrir vinnufundi, fyrirtækjaferðir, afmæli og brúðkaup. Auðvelt er að leigja allt húsið og fá okkur til að skipuleggja og framkvæma óvæntar uppákomur og ferðir. Kokkunum finnst mjög gaman að vinna með matarhugmyndir fyrir mismunandi hópa og við hreinlega elskum að koma fólki á óvart í upplifun í mat og ferðum,“ segja þessar hugmyndaríku konur.

Þess má til gamans geta að hin tengdadóttirin, Rannveig Ólafsdóttir, rekur Iceland Bike farm á Kirkjubæjarklaustri, ásamt Guðmundi Fannari Markússyni, sambýlismanni sínum. Tengdamæðgurnar eru því að verða allsráðandi á Suðurlandi! ■