„Það er sama hvernig veðrið er, það er alltaf nærandi að líta út á þetta fallega umhverfi við Lækinn á Sólvangi Hafnarfirði,“ segir Hrönn. Hún fullyrðir að Sólvangur sé byggður á fallegasta bæjarstæðinu í Hafnarfirði og bara við það að horfa út um gluggann á þessu gamla húsi finni maður orku fyrir sálina.

„Dagskráin er byggð upp með það að markmiði að fólk læri um eigin heilsu og vellíðan þannig að það geti bætt heilsu sína marktækt bæði líkamlega og andlega. Hver og einn fær dagskrá sem hentar hverjum og einum og við útskrift er lögð áhersla á að einstaklingurinn hafi úrræði til að viðhalda og bæta heilsu og vellíðan eftir dvölina á eigin heimili,“ segir Hrönn.

Eru að fjárfesta í forvörnum

„Miðað er við að fólk sé að jafnaði í fjórar vikur í endurhæfingunni og það dvelji allan sólarhringinn á heilsusetrinu. Þeir sem geta notfært sér þjónustuna þurfa að vera orðnir 67 ára skjólstæðingar Heimahjúkrunar á höfuðborgarsvæðinu og Heimaþjónustu Reykjavíkur og mun heimahjúkrun og heilsugæslan hafa milligöngu um að sækja um endurhæfinguna. Heilbrigðisyfirvöld eru með þessari nýsköpun að fjárfesta í forvörnum og heilsueflingu aldraðra og eiga hrós skilið fyrir þar sem dvölin verður að fullu niðurgreidd af Sjúkratryggingum Íslands.“

Hrönn segir að þeir sem starfa í endurhæfingunni í Sóltúni Heilsusetri verði auðvitað hjartað í starfseminni. „Þetta eru heilbrigðisstarfsmenn með aðstoðarfólki, svo sem hjúkrunarfræðingar, sjúkraliðar, félagsliðar, sjúkraþjálfari, íþróttafræðingur, iðjuþjálfi, læknir og félagsráðgjafi þar sem hver og einn leggur sitt af mörkum til að styrkja skjólstæðingana. Það skemmtilega er að þeir sem við höfum verið að ráða hafa allir einhverja styrkleika til að leggja af mörkum við endurhæfinguna, óbilandi áhuga á heilsu, hollustu og félagslegri virkni, margir eru í einhverju námi sem tengist starfinu, íþróttafræði, sjúkraþjálfun, sjúkraliðanámi, íþrótta- og heilsufræði og hjúkrunarfræði, nokkrir eru lærðir heilsunuddarar og einn er guðfræðingur.

Aðstoðarfólkið kemur til með að vinna gefandi og fjölbreytt starf undir handleiðslu þessara fagaðila, ásamt því að veita skjólstæðingum aðstoð með athafnir daglegs lífs. Lögð verður mikil áhersla á leiðsögn, fræðslu og tæki sem dugar einstaklingum til að halda áfram að bæta lífsgæði sín þegar heim er komið og sem dæmi má nefna að stefnt verður að notkun velferðartækni sem Sóltún Heima heimaþjónusta hefur notað frá 2017 á heimilum fólks með frábærum árangri en það er danskt styrktaræfingakerfi sem heitir DigiRehab. Þjálfunin er miðuð að því að styrkja viðkomandi markvisst með sérsniðnu prógrammi. Kosturinn við það er að einstaklingurinn kynnist því á heilsusetrinu og getur haldið áfram með prógrammið á eigin spýtur þegar heim er komið til að efla og viðhalda styrk eða að gera æfingarnar með aðkeyptri leiðsögn tvisvar í viku í 20 mínútur.

Orðatiltækið góð heilsa er gulli betri á einkum vel við á efri árum og það er sérstaklega mikilvægt að setja heilsuna í forgang þegar aldurinn færist yfir með öllum tiltækum ráðum. Þannig stuðlum við að bættum lífsgæðum og búum lengur heima sjálfstæð. Setjum okkur þau markmið að verða eldri og betri og gerum eitthvað í því,“ segir Hrönn.

Nánari upplýsingar fást í netfanginu heilsusetur@solvangur.is og á solvangur.is