Fimmtudaginn 8. júlí opnar glænýr Fjallakofi dyr sínar fyrir viðskiptavinum. „Við erum að flytja úr Kringlunni og upp í Hallarmúla 2, í helmingi stærra húsnæði til þess að mæta síauknum fjölda viðskiptavina sem sækir hingað vörur og þjónustu. Verslunin var gjörsamlega búin að sprengja utan af sér fermetrana í Kringlunni og er því kominn tími á flutninga. Verslunin verður enn starfandi í Kringlunni 7 en með breyttu sniði sem verður auglýst síðar,“ segir Halldór Hreinsson, framkvæmdastjóri Fjallakofans.

Happatalan sautján

„Fjallakofinn opnaði upprunalega í 17 fermetra húsnæði á annarri hæð í Bæjarhrauni í Hafnarfirði. Nú 17 árum síðar erum við að flytja í 1700 fermetra húsnæði í Hallarmúla. Það má segja að talan sautján sé nokkurs konar happatala hjá okkur. Hér í Hallarmúlanum getum við boðið upp á enn betri aðstöðu fyrir viðskiptavini og þægilegri aðkomu. Þá eru 24 bílastæði bara rétt við innganginn.

Við erum mjög stolt að hafa fengið hér inni og spennt að opna nýja verslun hér, en húsið á sér ríka sögu. Hér var Penninn staðsettur til fjölda ára og það er góður andi í húsnæðinu. Þá bíðum við full eftirvæntingar eftir að geta tekið á móti viðskiptavinum í þessu fallega og rúmgóða húsi,“ segir Halldór.

Starfsfólk Fjallakofans kemur flest úr ferðageiarnum og býr að mikilli þekkingu á útivist. Hópurinn er eins og ein stór fjölskylda, enda ríkir þar góður andi. Myndir/Ásmundur

Opnunartilboð alla helgina

Í tilefni opnunarinnar í Hallarmúla verða sérstök opnunartilboð og ýmislegt húllumhæ um að vera í versluninni. „Þetta verður þriggja daga veisla sem hefst á fimmtudag og lýkur á sunnudag. Fólk getur græjað sig upp fyrir sumarið á góðum afslætti og það má því segja að Verslunarmannahelgin hefjist að ákveðnu leyti í Fjallakofanum.“

Klettar í lífi karlanna

Fjallakofinn er í eigu þeirra Halldórs, framkvæmdastjóra og meirihlutaeiganda, Jóns Hreiðars Andréssonar, rekstrarstjóra og Hilmars Más Aðalsteinssonar, innkaupastjóra. Allir hafa þeir mikla reynslu af verslunarrekstri og útivist. Til að mynda byrjaði Halldór að vinna í verslun foreldra sinna aðeins 11 ára, en þá var lagður grunnurinn að velgengninni sem Melabúðin nýtur enn þann daginn í dag. „Þar vann ég öll sumur og hjálpaði foreldrum mínum að byggja upp verslunina. Þá kom ég að rekstri Skátabúðarinnar og var verslunarstjóri í 15 ár.“ Einnig hefur hann komið að rekstri Fálkans og Útilífs.

„Síðustu 17 ár hef ég svo unnið með Dísu konunni minni að uppbyggingu Fjallakofans. Ég held við getum allir þrír verið sammála að konurnar okkar, þær Arndís Frederiksen konan mín, Ásdís Ósk Ómarsdóttir kona Jóns og Sigrún Hallgrímsdóttir kona Hilmars, hafa verið klettar í lífi okkar og veitt okkur sterkt bakland til að geta staðið undir rekstri Fjallakofans í öll þessi ár.“

Verslunin í Hallarmúla er sérlega rúmgóð og húsnæðið er um tvöfalt stærra en húsnæðið í Kringlunni.

Allt fyrir útivistina

Fjallakofinn er með bókstaflega allt fyrir útivistina, hvort sem um er að ræða fyrir göngur, útilegur, hjólaferðir, skíði eða annað. „Ég segi stundum að ef það fæst ekki hjá okkur, þá er það ekki nauðsynlegt,“ segir Halldór og brosir.

Fjallakofinn hefur þar að auki ávallt lagt upp úr því að bjóða upp á fyrsta flokks vörumerki. Þar eru Scarpa, Patagonia, Marmot og Arc´teryx allra sterkust á markaðnum. „Scarpa er ítalskt fjölskyldufyrirtæki og skórnir frá þeim standa alltaf fyrir sínu. Ég hef unnið með þeim í 36 ár og get sagt að þeir eru sannir skósmíðameistarar af guðs náð. Hönnun skónna byggir á gríðarlegri þekkingu og þeir eru einungis framleiddir úr fyrsta flokks leðri og öðrum efnum. Þeir hafa alltaf verið langsterkasta vörumerkið okkar og selja sig að miklu leyti til sjálfir. Enda þegar fólk hefur kynnst Scarpa þá koma fáir aðrir skór til greina. Þetta eru einfaldlega bestu gönguskórnir á markaðnum og það er ekkert annað merki sem hefur tærnar þar sem Scarpa hefur hælana.

Patagonia er annað merki sem við erum stolt að bjóða upp á í Fjallakofanum. Patagonia lætur eitt prósent af öllum sínum hagnaði renna til umhverfisverndar og skilgreinir sig sem umhverfis- og náttúruverndarstofnun frekar en eiginlegt fyrirtæki. Þeir standa afar framarlega í heiminum þegar kemur að loftslags- og umhverfismálum og láta sig allt varða á þessu sviði, allt frá verndun Atlantshafslaxins við strendur Íslands til stíflugerðar í Slóvakíu.“

Marmot er svo bandarískt fyrirtæki sem býður upp á afar vandaðan útivistarfatnað og Arc´teryx er kanadískt hágæða fatamerki sem er eitt það þekktasta á alþjóðamarkaði.

„Við höfum ávallt kappkostað að ráða til starfa vandað, metnaðarfullt fólk sem er tilbúið að gefa mikið af sér til þess að þjóna viðskiptavinum Fjallakofans. Það má segja að þetta sé stór fjölskylda sem hér ræður ríkjum og við reynum að hlúa að og hlusta vel á hvern einasta starfsmann til þess að geta haldið í góðan anda innan fyrirtækisins. Því helst okkur vel á starfsfólki og það eru ansi mörg grá hár hér á höfði sem er teikn um þroska, en aldursbilið er samt alveg frá 17 ára til 70 ára. Við sækjumst fyrst og fremst eftir fólki með reynslu en flestir hér koma úr björgunarsveitunum, skátunum eða ferðafélögum og búa að ómetanlegri reynslu sem hefur reynst okkar viðskiptavinum afar vel.“

Scarpa skórnir hafa verið langvinsælasta söluvaran hjá Fjallakofanum í mörg ár enda bestu gönguskórnir.

Aukinn áhugi kominn til að vera

Fjallakofinn býður einnig upp á leigu á búnaði fyrir hverskyns útivist. „Erlendir ferðamenn hafa verið okkar helstu viðskiptavinir þegar kemur að leigu á gönguskóm, útivistarfatnaði og öðrum búnaði. Íslendingar eru þá meira í að leigja jökla- og fjallaskíðabúnað.

Frá því að faraldurinn hófst hefur svo orðið sprenging í útivist hjá Íslendingum. Ástandið ýtti mörgum út í náttúruna að sækja sér andlega hressingu enda er útivera besta meðalið við nær hvaða kvilla sem er. Þá má segja að Fjallakofinn sé eins og vandað apótek sem býður upp á bestu lyfin, sem eru án efa Scarpa skórnir. Við erum nú nálægt því að tvöfalda söluna á þessum frábæru skóm sem og ýmsum öðrum búnaði sem er nauðsynlegur fyrir útivistina. Þá hefur einnig orðið mikil aukning í netverslun og er hún að skora sterkt hjá yngri sem og eldri viðskiptavinum sem geta auðveldlega stundað sín viðskipti þegar þeim hentar, hvenær sem er dagsins. Það er alveg klárt að þessi aukni áhugi Íslendinga á allri almennri útivist hvort sem er að sumri eða vetri er kominn til að vera.“

Það fæst allur nauðsynlegur búnaður fyrir allar mögulegar tegundir útivistar í Fjallakofanum.

Ævintýraferðir Fjallakofans

Fjallakofinn býður upp á spennandi ævintýraferðir á ári hverju og eru nokkrar komnar á skrá fyrir haustið. „Við bjóðum upp á fjölbreyttar göngu, hjóla- og skíðaferðir á Íslandi og erlendis, allt árið um kring. Í september förum við í Dónárdraum, en um er að ræða eina fjölförnustu og vinsælustu hjólreiðaleið Evrópu sem liggur meðfram Dóná frá Passau í Þýskalandi austur til Vínarborgar í Austurríki. Ferðin er 9 dagar og með í för er hinn frábæri og fróði fararstjóri, Brandur Jón Guðjónsson. Einnig verður farið í tíu daga hjólaferð um Kvarnerflóann í Króatíu. Þá verðum við með einkabát sem ferjar okkur á milli stærstu eyjanna í flóanum. Með í för verða þeir Brandur Jón Guðjónsson & Robert Cigar. Einnig verður í boði átta daga hlaupaferð í Austurríki með Óskari Jakobs þar sem gist er í fjallabænum St. Michael í Lungau, skammt frá Salzburg.“

Útivistin er meðalið við öllum helstu kvillum og Fjallakofinn er apótekið þar sem bestu lyfin fást.

Nánari upplýsingar á fjallakofinn.is. Sími: 510-9505. Verslanir eru á Laugavegi 11 og Kringlunni 7 (sem er að loka). Ný verslun opnar í Hallarmúla 2 á morgun, fimmtudaginn 8. júlí.