Tæknifyrirtækið Leikbreytir byggir á áratuga reynslu starfsmanna á sviði stafrænnar þróunar og almennrar fyrirtækjaþjónustu.Ein af nýlegri lausnum fyrirtækisins nefnist Farsímaveski Wallet sem gerir fyrirtækjum kleift að gefa út gjafakort og inneignarnótur í farsímann, bæði Apple Wallet og í Android, segir Yngvi Tómasson, framkvæmdastjóri Leikbreytis. „Þannig sér viðskiptavinurinn alltaf hvað hann á mikið eftir á kortinu og hægt er að senda honum áminningu um að nota kortið bæði almennt og háð staðsetningu.“

Hann segir fyrirtækið hafa þróað ýmsar sérlausnir á móti helstu bókhaldskerfum eins og Navision og DK sem oft halda utan um gjafakort, vildarklúbba og inneignarnótur. „Við gerum fyrirtækjum kleift að gefa allar inneignarnótur út í Farsímaveski sem og gjafakort. Eins höfum við þróað lausnir sem snúa að vildarkerfum, bæði punktasöfnun sem og lausnir um sérkjör eins og gömlu stimpilkortin sem bjóða upp á tíunda kaffibollann frían sem dæmi. Þetta er í raun heildarlausn þar sem færa má flest allt sem er gefið út í dag sem plastkort yfir í Farsímaveskið og bjóða upp á aukna virkni í leiðinni.“

Fækka endurteknum verkefnum

Sjálfur hefur Yngvi starfað í tæknigeiranum síðan hann var sextán ára og því hokinn af reynslu. Áhugi hans liggur þó aðallega í vöruþróun og að nota tæknina til þess að hjálpa fyrirtækjum á viðskiptamiðaðan hátt. Hann átti og rak um tíu ára skeið fyrirtækið Davíð og Golíat sem hann seldi árið 2017. Hann lýsir aðdraganda stofnunar Leikbreytis. „ Ég starfað hjá Nova samhliða því að stunda MBA-nám í HR eftir söluna. Á þessum tíma sá ég gríðarlega mörg tækifæri með nýrri tækni, fyrri reynslu og möguleika með nýjum verkfærum sem námið hafði veitt mér. Það varð í raun ekki aftur snúið og ákvað ég að fara á fullt í að undirbúa stofnun tæknifyrirtækis sem yndi bjóða upp á lausnir sem gætu aðstoðað stafræna vegferð fyrirtækja með áherslu á sjálfvirkni.“

Hann segir upplýsingatæknigeirann vera í raun mjög ungan enn og mikið af tækifærum sem felist í að bjóða fyrirtækjum upp á betri lausnir og betri þjónustu. „Lykilatriðið í öllum okkar lausnum er að finna ekki upp hjólið heldur samþætta lausnir sem eru til og búa til viðskiptamiðaðar vörur fyrir viðskiptavini okkar. Rauði þráðurinn í öllum okkar lausnum er að hjálpa fyrirtækjum að bæta þjónustu, auka sölu og fækka endurteknum verkefnum starfsmanna.“

Hér er gjafakort í farsímaveski, sem sýnir stöðuna á kortinu og strikamerki sem talar við gjafakortakerfi.

Engin útrunnin kort í skúffunni

Yngvi segir ávinning neytenda vera mjög mikinn enda kannist flestir við að vera með skúffu heima hjá sér fulla af gjafakortum sem eru jafnvel útrunnin. „Með því að vera með gjafakortið í eigin síma og í síma makans eru töluvert meiri líkur á að þú notir það þar sem þú eða makinn eruð alltaf með það á ykkur. Eins eru fyrirtækin sem selja gjafakortin komin með tæki frá okkur til að minna fólk á að nota gjafakortin, bæði þegar styttist í að þau renni út og eftir staðsetningu þegar þú ert í nágrenni við verslanir þeirra. Auk þess sést alltaf í símanum hversu há upphæð er eftir á gjafakortinu.“

Þegar kemur að inneignarnótum og skilamiðum hafa fyrirtæki eins og S4S, sem reka Air, Steinar Waage, Ecco og fleiri verslanir, innleitt lausn frá Leikbreyti. „Þar eru allar inneignarnótur sendar í símann hjá viðskiptavinum í stað þess að fá strimil sem líklegur er til að eyðast eða týnast, eins og margir kannast vafalaust við.“

Mikill ávinningur

Ávinningur fyrirtækja sem taka upp tæknina er ekki síður mikill, að sögn Yngva. „Fyrirtæki fá tækifæri til að auka þekkingu sína á viðskiptavinum sem eiga gjafakortin og fá um leið verkfæri til að vera í sambandi við þá, bjóða þeim ný tilboð og minna þá á að nota gjafakortin og inneignarnóturnar.“

Einnig geta fyrirtækin sent notendum sérstök skilaboð eftir staðsetningu, bæði út frá GPS og sérstökum búnaði sem er settur í verslanir og veitingastaði, sem gerir þeim kleift að senda mun hnitmiðaðri skilaboð á gjafakortshafa sem eru staddir þar. „Það er líka hægt að selja gjafakort á netinu og bjóða viðskiptavinum upp á að afgreiða sig sjálfa með kaupum á nýjum gjafakortum sem bæði er hægt að senda út rafrænt á þann sem á að fá gjafakortið eða prenta út og gefa með flösku eða konfektkassa. Lausnirnar okkar má einnig nýta til þess að gefa út viðbótar afsláttarmiða auk þess sem að bæði er hægt að nota Farsímaveskislausnina í hefðbundinni verslun og vefverslun, en oft er ekki hægt að nota gjafabréf og inneignir í vefverslunum. Grunnlausn okkar í Farsímaveskislausnum er í raun ekki bara hugsuð fyrir gjafabréf, vildarklúbba og inneignarnótur þótt það séu vissulega áherslur okkar 2022. Kerfið er fullbúið og tilbúið til að útbúa aðgangsmiða á viðburði, árskort, líkamsræktarkort og svo mætti lengi telja.“

Dæmi um inneignarnótu sem fólk fær beint úr kassakerfi S4S í stað þess að fá strimil sem eyðist eða týnist.

Gleymd kort úr sögunni

Yngvi sér fram á mjög mikinn vöxt næstu árin. „Við reiknum með að allir kaupmenn og fyrirtæki sem selja gjafakort muni færa sig yfir í svipaðar lausnir til að halda utan um gjafakort. Verslanir munu stórauka uppbyggingu vildarklúbba með þessum nýju lausnum og í raun verða allir kaupmenn að vera með í þessari þróun til að verða ekki eftir. Samkeppnin um viðskipti er ekki lengur bara innanlands heldur við netverslanir erlendis líka þar sem risar eins og Amazon nýta sér allar þær upplýsingar og tækni sem þeir hafa til að byggja upp viðskiptavild. Það verður einfaldlega krafa neytenda. Að gleyma Costco-kortinu heima, bensínlyklinum, gjafakortinu, starfsmannapassanum eða aðgangskortinu í sund mun heyra sögunni til því allt er í símann. Með heildarvöruframboði okkar hjálpum við fyrirtækjum að taka gjafakortasöluna og allt í kringum hana á annað stig og auka jafnframt alla sjálfvirkni í kringum sölu nýrra korta og í raun stuðla að umhverfisvænni lausn þar sem gjafakort eru ekki lengur gefin út sem plastkort.“

Nánari upplýsingar á leikbreytir.is.