Veitingastaðurinn KORE var opnaður þann 1. júní 2018 í Granda Mathöll og ári síðar, þann 1. maí, á Kringlutorgi. Í júní í fyrra var systurstaður KORE, Chikin, í Ingólfsstræti, svo opnaður. „Þetta hefur í raun verið algjört ævintýri frá fyrsta degi sem enn sér ekki fyrir endann á,“ segir Atli Snær, sem er eigandi veitingastaðanna, ásamt Jóni Þorberg Óttarssyni.

Innblástur í borg englanna

KORE býður upp á einstakan kost í skyndibita- og veitingastaðaflóru Reykjavíkur. „Sérstaða okkar er sú að við vinnum með hráefni sem hreinlega hafa ekki sést á veitingastöðum hér heima. Við erum í raun ekki harðkjarna kóreskur staður, heldur sækjum við innblástur í kóreska matargerð. Við vinnum mikið með kóresk hráefni, en höfum hins vegar alltaf sagt að það sé smá LA-tvist á matnum okkar, en í borg englanna er einmitt algengt að sjá kóreska og mexíkanska matargerð renna saman, líkt og gerist hjá okkur á KORE. Síðast en ekki síst er allt okkar hráefni unnið frá grunni, eftir okkar eigin uppskriftum, sem er töluvert frábrugðið mörgum skyndibitastöðum hérna heima. Annars reynum við bara almennt að hafa gaman af því sem við erum að gera og úr verður ljúffeng samsuða af metnaði, gleði og sköpunarkrafti.“

KORE fyrir alla

KORE er með gómsætan skyndibita fyrir alla, hvort sem fólk vill kjöt, grænmeti eða vegan mat. „Það er okkur mjög mikilvægt að bjóða upp á fjölbreyttan matseðil, þannig að sem flestir geti fundið sér eitthvað við hæfi hjá okkur, óháð mataræði. Við höfum aukið verulega úrval fyrir grænmetisætur/vegan. Einnig höfum við verið að bæta úrvalið fyrir þá sem vilja hollari útgáfu af sínum daglega KORE-skammti.“

Hver er vinsælasti rétturinn á matseðli KORE?

„Vá, þetta er eins og að spyrja hvað er uppáhalds barnið þitt! En, það hlýtur samt að vera gangnam style vefjan okkar eða taco-in. Síðan koma reyndar filthy fries sterkar inn á sunnudögum,“ segir Atli.

Filthy Fries með bulgogi-nauti, beikonbitum, vorlauk, chilli, kimchi-mæjó, ostasósu og kimchi kemur sterkt inn á sunnudögum.

Stór fastakúnnahópur

KORE hefur verið einn af vinsælustu skyndibitastöðum mathallanna á Granda og í Kringlunni frá upphafi. „Maður verður eiginlega bara hálfklökkur þegar maður stoppar og pælir í því hve móttökurnar hafa verið frábærar, hvert sem við förum. Á töluvert skömmum tíma höfum við byggt upp stóran hóp fastakúnna sem við elskum út af lífinu. Ég vil sérstaklega biðja að heilsa honum King Krúsa, sem er daglegur fastagestur hjá okkur.

Að okkar mati þá er samblanda af þeirri vinnu sem við leggjum upp með og frábært starfsfólk mikilvægasti liðurinn í því að reka farsælan veitingastað. Á hverjum einasta degi leitum við og starfsfólkið okkar ráða til að bæta mat, þjónustu og finna lausnir. Það er sú stöðuga vinna sem skilar sér á endanum til gestsins að okkar mati. Við leggjum einnig mikið upp úr að allir gestir fari sáttir frá okkur og við reynum að halda uppi góðum samskiptum við alla okkar gesti sem hjálpar við að veita öllum okkar gestum jákvæða upplifun.

Þá höfum verið iðnir að halda „pop-up“ viðburði, þar sem við förum inn á aðra veitingastaði og komum með klikkaðar útgáfur af KORE-matseðlinum. Síðast fórum við til Grænlands og Færeyja í slagtogi með Blazroca og Dj Moonshine þar sem við matreiddum sel í taco. Grænlendingurinn slafraði því í sig og núna eru kóresk sela-taco orðin að þjóðarrétti Grænlands!“ segir Atli.

Ko-Bop skálar fást á KORE í Kringlunni, ýmist með kjöti eða vegan. Þessir hrísgrjónaréttir hafa slegið í gegn hjá KORE-unnendum landsins.

Nýjir KORE-staðir og handhæg heimsendingarþjónusta

Að sögn Atla er stefnan sett á að opna nýja staði bráðlega. „Við höfum fengið töluverðar fyrirspurnir frá þeim sem búa í útjöðrum höfuðborgarsvæðisins og eins frá landsbyggðinni. Við setjum því stefnuna á að opna tvo, þrjá nýja staði á árinu.“

KORE er einnig með einstaklega handhæga heimsendingarþjónustu í gegnum vefsíðuna kore.is. „Við erum með mismunandi matseðla í Kringlunni og á Granda, en það er hægt að panta allt sem er á boðstólum af matseðlinum í Kringlunni. Þá bjóðum við upp á fría heimsendingu á öllum okkar veislubökkum. Við sendum alla okkar veislubakka og mat til fyrirtækja sjálf. En almenn heimsending frá stöðunum okkar er þjónustuð af Nágrönnum sem er nýleg og einstaklega hentug heimsendingarþjónusta.“

Fried Tiger Balls eru stökkar djúpsteiktar risottokúlur með beikoni og osti. Kimchi-mæjó og pikklað daikon til hliðar.
Margverðlaunaðir alvöru kóreskir kjúklingavængir með pikkluðu daikon til hliðar. Þessir slá alltaf í gegn.

Gul veganúar-viðvörun á KORE

„Við erum alltaf með einhver tilboð í gangi. Núna erum við með sérstakan veganúar-afsláttarkóða sem veitir grænkerum afslátt af heimsendum grænmetisréttum. Svo höfum við verið að bjóða upp á afslætti af heimsendingum þegar gular viðvaranir hafa verið í gangi, sem hefur verið nokkuð oft í vetur.“

Pantaðu þinn daglega skammt á kore.is. KORE er staðsettur í Mathöll á Granda og á Kringlutorgi.