Það er sannkallað jólaævintýri að taka sér ferð á hendur um fagurt landslag Suðurnesjanna og njóta gómsæts jólamatar og kvöldskemmtunar við höfnina í Grindavík, þar sem ríkir sjarmerandi og svolítið óhefluð hafnarstemning,“ segir einn af ástsælustu meistarakokkum landsins, sjálfur Siggi Hall.

Siggi er kominn í jólaskap og ætlar af sinni alkunnu snilld að matbúa hátt í fjörutíu jólakrásir á dýrindis jólahlaðborð Bryggjunnar í Grindavík. Honum til aðstoðar verður matreiðslumaðurinn Dag Kristoffersen sem unnið hefur í mörg ár hjá Íslandshótelum, meðal annars sem yfirkokkur á Hótel Heklu.

„Ég er búinn að matreiða jólamat á jólahlaðborð Íslendinga í hartnær þrjátíu ár en ákvað að ganga til liðs við góða félaga mína á Bryggjunni fyrir hálfu öðru ári. Við buðum upp á jólahlaðborð á aðventunni í fyrra og seldist upp öll sex kvöldin og yfir þúsund manns mættu. Það skal engan undra því þetta kalla ég skemmtijólahlaðborð með úrvali jólarétta, líflegri stemningu og skemmtilegri jólatónlist undir borðhaldinu sem svo breytist í fjörugt jólapartí þegar líður á kvöldið,“ segir Siggi, en stuðtríó Magga Kjartans, Helgu Möller og Axel Ó munu flytja jólalög og leika fyrir dansi á jólahlaðborði Bryggjunnar.

Siggi Hall segir jólahlaðborð vera eins og jólin sjálf, með hefðbundnum jólamat í dálæti þjóðarinnar en alls verða um fjörtíu réttir á jólahlaðborði Bryggjunnar. FRÉTTABLAÐIÐ/EYÞÓR

Bestu bitar bæjarins

Siggi ætlar að tefla fram mörgum af sínum eftirlætis jólaréttum á jólahlaðborði Bryggjunnar.

„Gestum Bryggjunnar ætla ég að bjóða upp á jólamat í sérstöku dálæti, þar á meðal danska „flæske­steg“, séríslenska síldarrétti og íslenska villigæs. Á boðstólum verður hefðbundinn jólamatur af fínustu sort og við vinnum allan mat frá grunni,“ upplýsir Siggi í einum mesta útgerðarbæ landsins.

„Við njótum þess að matbúa jólarétti úr fersku sjávarfangi bæjarins, enda er Grindavík einn stærsti framleiðandi bleikju og sjóbirtings, í algjörlega sjálfbæru og umhverfisvænu landeldi. Því verðum við að sjálfsögðu með bestu bita bæjarins á jólahlaðborðinu, sjóbirting sem við látum reykja sjálfir og grafna bleikju,“ segir Siggi sem jafnframt leggur á jólahlaðborðið allt frá jólalegum forréttum yfir í kalkún, nautalund, purusteik, hangikjöt, hamborgarhrygg og tilheyrandi meðlæti sem kórónar hina fullkomnu jólamáltíð.„Við verðum með allt sem hugurinn girnist í munn og maga og æðislegt hlaðborð með ómótstæðilegum jólaeftirréttum, eins og Pavlovu í jólaskapi, ris à l’amande og fleira gómsætt og tilheyrandi á jólum.“

Matreiðslumaðurinn Dag Kristoffersen eldar jólamatinn með Sigga Hall á Bryggjunni í Grindavík. FRÉTTABLAÐIÐ/SIGTRYGGUR ARI

Hafnarfílingur og fjör

Bryggjan í Grindavík státar af einum skemmtilegasta veislusal landsins sem tekur á annað hundrað manns í sæti og er rúmt um alla. Salurinn er nútímalegur en inn af honum sést í netagerðina og bryggjuna fyrir utan.

„Það er mjög skemmtilegur hafnarfílingur á Bryggjunni og fer vel um fólk,“ segir Siggi og hlakkar til hlaðborðskvöldanna í desember.

„Jólahlaðborð eru jafn hefðbundin og jólin sjálf heima. Flestir vilja borða sömu jólaréttina yfir hátíðardagana og þeir sem koma á jólahlaðborð vilja gera vel við sig í mat og drykk, borða þar til það er að springa af vellíðan og góðum mat, en líka njóta stundarinnar með sínum nánustu eða jafnvel vinnufélögum, og skemmta sér í góðra vina hópi,“ segir Siggi sem hefur yndi af jólahlaðborðum og matarstússinu í kringum þau.

„Jólahlaðborð er norrænn siður og vinsæll á öllum Norðurlöndunum. Maturinn er víðast hvar með svipuðu sniði en þó með sín sérkenni eins og Íslendingar sem leggja á borð sitt séríslenska hangikjöt, laufabrauð og síldarréttina. Eitt eiga þau svo öll sameiginlegt og það er hrísgrjónagrautur sem eftirréttur og í mörg hundruð ár hefur jólagrautur í hátíðarbúningi verið snæddur á skandinavískum jólum.“

Stóri salur Bryggjunnar tekur á annað hundrað manns og er sjarmerandi að geta horft yfir í netagerðina og njóta útsýnis yfir höfnina í Grindavík. Takið eftir sviðinu þar sem hljómsveit leikur fyrir dansi. FRÉTTABLAÐIÐ/SIGTRYGGUR ARIi

Heimsfræg humarsúpa

Bryggjan er komin á heimskortið fyrir matreiðslu á heimsmælikvarða.

„Á sumrin iðar höfnin af mannlífi og gestir stinga sér inn á Bryggjuna til að fá sér ferskasta fiskinn beint af kajanum og heimsfræga humarsúpu sem í útlenskum blöðum hefur verið sögð sú besta í heimi,“ segir Siggi og víst er að jólastund á Bryggjunni svíkur heldur engan.

„Grindavík er íslenskt sjávarpláss eins og þau gerast best og þar er ákaflega sjarmerandi að njóta kvöldstundar og jólastemningar suður með sjó. Þar sjást norðurljósin dansa yfir djúpinu þegar þau skína, þar er heillandi að horfa og hlusta á brimið sem skellur utan í bryggjuna og horfa út á óravíddir Atlantshafsins yfir indælu atlæti og góðum mat á Bryggjunni.“

Jólahlaðborð Bryggjunnar verður helgarnar 4. og 5. desember og 11. og 12. desember. Borðapantanir í síma 426 7100 og á netfanginu info@bryggjan.com. Verð 9.900 krónur en 8.900 fyrir hópa. Sjá bryggjan.com