„Rætur Icewear liggja í íslensku ullinni. Hún er einstök á heimsvísu því ullin af íslensku sauðkindinni er sú eina af 380 ullartegundum í heiminum sem hefur tvenns konar hár, tog og þel, stutt og löng hár, sem gefur henni einstakan léttleika og mikið loft. Ég fer ekki ofan af því að íslenska ullin sé eitt það besta hráefni sem völ er á í einangrun fyrir útivistarfatnað.“

Þetta segir Ágúst Þ. Eiríksson, eigandi Icewear, sem er einn stærsti framleiðandi útivistar- og prjónafatnaðar á Íslandi.

„Það má segja að hjá Icewear standi nú yfir ákveðin bylting hvað varðar nýtingu á íslensku ullinni, því það að nota íslenska ullareinangrun í útivistarflíkur er einstök nýsköpun sem getur haft jákvæð áhrif á ullarframleiðslu og verðmætasköpun útflutnings til lengri tíma litið. Við settum fyrstu vörurnar í línunni á markað í fyrra og hafa viðtökurnar farið fram úr okkar björtustu vonum. Ég held að það sé hægt að segja að þetta sé mesta bylting sem hefur átt sér stað með íslensku ullina síðan íslenska lopapeysan kom á markað,“ segir Ágúst.

Í dag, 1. desember, er eitt ár liðið frá því að Icewear kynnti til sögunnar íslensku ullareinangrunina í nýrri útivistarlínu og hafa viðtökur farið langt fram úr væntingum.

Ein í heimi með tog og þel

Vart er liðið ár síðan Icewear kynnti íslensku ullareinangrunina til sögunnar, en meðbyrinn og eftirspurnin varð strax mikil.

„Íslenska ullin á sér hvergi hliðstæðu og ekki hægt að nálgast hana nema af íslensku sauðkindinni, sem hefur lifað af síbreytilegt íslenskt veðurfar í gegnum aldirnar og þróað með sér ull sem er bæði með tog- og þelhár, sem hafa sinn eiginleikann hvort fyrir sig og þennan léttleika sem íslenska ullin býr yfir. Annað sauðfé í heiminum er aðeins með tog- eða þelhár, ekki bæði,“ útskýrir Ágúst.

Á sama hátt og íslenska ullin verndar sauðkindina þá verndar hún einmitt þá sem klæðast henni í rysjóttri tíð vegna þessara einstöku eiginleika hennar. Það er engin önnur ull sem leitast við að viðhalda hitastigi líkamans, sama hvernig viðrar, en sú íslenska.

„Þegar við sáum flíkur fylltar með merino-ull, laust niður þeirri hugmynd að engin ull önnur en sú íslenska hefði betri eiginleika til að vera notuð sem fylling í úlpur og útivistarfatnað. Ullin okkar er 40 prósentum léttari en önnur ull, andar betur en bæði pólýester og dúnn og heldur á manni yl þó maður blotni,“ greinir Ágúst frá.

Viðheldur hitastigi líkamans

Icewear er leiðandi á heimsvísu þegar kemur að íslensku ullarfyllingunni.

„Við vitum að orðstír íslensku ullarinnar á bara eftir að auka enn frekar á eftirspurnina og finnum við það reyndar nú þegar. Flíkur með íslenskri ullareinangrun hafa fengið frábærar viðtökur, bæði hér innanlands sem og erlendis. Sjálfur prófaði ég eina af fyrstu prótótýpunum árið 2020, klæddist henni í öllum veðrum og í sem minnstu innanundir. Þá fann ég strax að íslenska ullin er ein besta einangrunin sem hægt er að setja í útivistarfatnað,“ segir Ágúst.

Ágúst nefnir dæmi um viðskiptavin sem keypti sér úlpu með íslenskri ullareinangrun í Reykjavík.

„Skömmu síðar kom hann aftur og keypti sams konar úlpu handa maka sínum með þeim orðum að þetta væri eina úlpan sem hann hefði átt sem hann svitnaði ekki í þegar hann færi úr kulda í hita. Það er akkúrat þessi eiginleiki sem gerir ullina svona einstaka, það er að segja að viðhalda hitastigi líkamans hvort sem ytri aðstæður eru kaldar eða heitar.“

Ný útivistarlína Icewear er einangruð með íslenskri ull og samanstendur af litríkum yfirhöfnum en einnig má finna úrval af ullarpeysum með þjóðlegu mynstri.

Viðbót fyrir ullarbændur

Ágúst telur íslensku ullareinangrunina geta orðið upphaf að nýju skeiði fyrir íslenska ullarbændur og sauðfjárbúskap.

„Ég hef sagt þeim bændum sem ég þekki að vera þolinmóðir því það sé ekki langt í að þetta verði mjög stórt og gæti farið í veldisvöxt eftir tvö til þrjú ár. Ef öll ull í landinu væri notuð í úlpur þá erum við að tala um að við værum með efni í framleiðslu á um einni og hálfri milljón ullarúlpna á ári, en þess má geta að ein rolla skilar af sér um tveimur kílóum af ull á ári og í úlpur fara um 500 grömm.

Ég sé fyrir mér að sauðfjárbændur sjái hag sínum vel borgið með því að framleiða ull, því þegar kemur að aukinni eftirspurn hefur engin ull í heiminum þá einstöku eiginleika og sú íslenska,“ segir Ágúst.

Hann heldur áfram:

„Kostirnir við íslensku ullina eru margþættir og finnst mér ekki ólíklegt að íslenska ullareinangrunin eigi eftir að fá á sig þann gæðastimpil að vera ein sú besta einangrun sem völ er á í útivistarflíkur. Því eins og ég nefndi áðan þá heldur flíkin áfram yl og léttleika þó að hún blotni og ef á hana kæmi gat þá lekur einangrunin ekki út eins gerist til dæmis í dúnflíkum. Ull er einnig einn sá vistvænasti kostur sem völ er á fyrir útivistarflíkur.“

Hönnun Icewear tekur mið af íslenskum aðstæðum og veðurfari.

Gefandi að skapa

Það eru 50 ár síðan Icewear var stofnað utan um útflutningsvörur úr íslenskri ull.

„Sem ungan dreng dreymdi mig um að verða atvinnurekandi og forstjóri. Ég var nýútskrifaður viðskiptafræðingur þegar ég byrjaði að vinna hjá Icewear, sem ég keypti svo seinna meir.

Ég heillaðist af sköpuninni sem fylgir ullinni, því mig hafði alltaf dreymt um að vinna í skapandi geira og í ullinni erum við alltaf að skapa eitthvað nýtt, eins og íslensku ullareinangrunina núna. Viðskiptafræðin reyndist mér góð blanda við sköpunarvinnuna. Ekki óraði mig þó fyrir þeim ævintýralega vexti sem fyrirtækið hefur farið í gegnum síðastliðin ár. En umfram allt hef ég virkilega gaman af því að vera í brúnni,“ segir Ágúst.

Ágúst hefur alltaf heillast af sköpuninni sem fylgir íslensku ullinni og hefur ullin alltaf verið kjarninn í vörulínu Icewear.

Lenti fyrir tilviljun í ullarbransanum

Lokaritgerð Ágústs í viðskiptafræði árið 1983 var einmitt um útflutning íslenskra ullarvara.

„Þá var ullariðnaðurinn risastór en ég spáði að hann myndi ekki lifa af sökum þess hve ullin væri einhæf vara og á þeim tíma var flísið að koma. Síðan sá ég þennan nýja vinkil sem ullareinangrunin er, sem gæti orðið svo miklu stærri en ullin var nokkurn tímann áður. Íslenska lopapeysan er alltaf góð en það er örmarkaður, en með útivistarfatnaði erum við komin út í hinn stóra útivistarheim. Þar að auki er Ísland kalt land og mikill trúverðugleiki fylgir því að það sem er gott fyrir Íslendinga sé líka gott fyrir heiminn.“

Merkileg framþróun

Icewear rekur alls 23 verslanir ásamt netverslun sem selur útivistarfatnað um allan heim.

„Nú þegar er íslensk ullareinangrun komin í úlpur, kápur, buxur, vettlinga, vesti og kuldagalla fyrir börn og fullorðna,“ segir Ágúst.

Hans uppáhalds Icewear-flíkur eru jakkarnir Reykjavík og Langjökull, báðir með íslenskri ullareinangrun.

„Íslenska ullareinangrunin er í raun ótrúleg uppgötvun og á sama tíma ótrúlegt að þetta hafi ekki verið gert fyrr. Ég tel að þetta sé það merkilegasta sem Icewear hefur gert hingað til. Það er mikill heiður fyrir Icewear að vera þátttakandi í þessu ævintýri, en að baki eru auðvitað allir sauðfjárbændur landsins og íslenska sauðkindin, að ógleymdu metnaðarfullu starfsfólki Icewear.“

Sjá nánar og skoðið vefverslun Icewear á icewear.is