„Við sérhæfum okkur í hugbúnaðarlausnum fyrir fyrirtæki í Microsoft 365 viðskiptaumhverfi og leggjum megináherslu á stafræna ferla og hagræðingu með lausnum sem fyrirtækin eiga nú þegar, en nánast öll fyrirtæki eru í þessu umhverfi Microsoft 365 en átta sig kannski ekki alltaf á því hvernig er hægt að nýta það,“ útskýrir Sigurjón Hákonarson, framkvæmdastjóri OZIO. „Í sumum tilvikum eru þau jafnvel að kaupa lausnir frá öðrum sem er að finna þarna inni. Við viljum hjálpa fyrirtækjum að finna hvernig má nýta umhverfið betur og þar með ná fram töluverðri hagræðingu með upplýsingatækni.“

Mjög oft svipaðar áskoranir

„Við búum yfir áralangri reynslu og þekkingu á verkferlum fyrirtækja, óháð stærð og eðli starfsemi þeirra,“ segir Sigurjón. „Við erum búnir að leysa alls konar vandamál og í raun eru alltaf sömu verkferlar hjá fyrirtækjum, hvort sem fyrirtækin eru 15-20 manna eða 2-300 manna. Fyrirtæki eru mikið að glíma við svipaðar áskoranirnar, umfangið er bara mismikið.

Samningakerfið sem við bjóðum upp á er ágætis dæmi um kosti þjónustunnar okkar. Við erum með samningakerfi sem er innbyggt í Microsoft 365 umhverfið og getur haldið utan um samninga, allt frá samningagerð til undirritunar,“ segir Sigurjón. „Kerfið inniheldur tengingu við undirritunarþjónustu, þannig að það er hægt að vinna samninginn, senda hann til undirritunar og fá undirritað skjal til baka, allt innan kerfisins, svo það þarf ekki að fara neinar krókaleiðir.“

Getur sparað mikið fé

„Margir telja að upplýsingatækni sé dýr, en tilgangurinn með því að fjárfesta í henni er að spara og hagræða,“ segir Sigurjón. „Það kostar mögulega tvær milljónir að fá heildstæða lausn, en mikilvægt er að átta sig á hvað slík lausn getur sparað á móti. Þegar kemur að því að skoða fjárfestingar í upplýsingatækni þarf því að huga að því hvaða kostnaður fer út, sem er ekki bara fjármagn heldur líka tími.

Umræðan er oft villandi og segir að það að eyða í upplýsingatækni snúist um að fækka starfsfólki, en þetta snýst ekki um það, heldur hagræðingu í fjármagni og/eða tíma,“ segir Sigurjón. „Það getur samt hins vegar þýtt að fólk færist til í starfi eða geti eytt tímanum í skemmtilegri verkefni, því við viljum bjóða lausnir sem gera óþarft að hafa fullt af fólki að vinna handavinnu.“ ■