Það hefur orðið samdráttur í framleiðslu á lambakjöti og það stefnir í að hann haldi áfram. Kjötafurðasvið Kaupfélags Skagfirðinga sér þó til þess að stórkaupendur hafi nægt kjöt fram að næstu sláturtíð og framleiðir alls kyns kjötvörur sem freista Íslendinga.

„Kjötafurðasvið Kaupfélags Skagfirðinga samanstendur af Kjötafurðastöð Kaupfélags Skagfirðinga, Sláturhúsi Kaupfélags Vestur-Húnvetninga á Hvammstanga, Sláturhúsinu á Hellu og svo Kjötvinnslunni Esju,“ segir Ágúst Andrésson forstöðumaður. „Saman vinna þessar einingar að því að framleiða gæða kjötvörur fyrir íslenska neytendur og útflutning, meðal annars besta lambakjöt í heimi.

Nú er sláturtíð nýafstaðin og í ár varð samdráttur í framleiðslu, annað árið í röð,“ segir Ágúst. „Það stefnir svo í enn meiri samdrátt á næsta ári. Vegna þessa samdráttar í framleiðslu hefur útflutningur líka farið minnkandi.

En það er enn nóg fyrir okkur Íslendinga og með viðskiptasamningum er búið að tryggja stórkaupendum eins og Högum íslenskt lambakjöt fram að næstu sláturtíð, en sá samningur samsvarar a.m.k. 1.000 tonnum af kjöti með beini,“ segir Ágúst. „Það sama var gert gagnvart Kjötkompaníinu, svo því hefur líka verið tryggt nægt íslenskt lambakjöt milli sláturtíða.

Sláturhús Kaupfélags Vestur-Húnvetninga vinnur hátíðarhangikjöt fyrir jólin úr íslensku lambakjöti.

Það er mikilvægt að standa undir eftirspurninni, því þegar kemur að lambakjöti þá er engin spurning hvað íslenskir neytendur vilja. Þeir velja besta lambakjöt í heimi, íslenska kjötið, því það eru gæði sem þeir geta treyst,“ útskýrir Ágúst.

Alls kyns vöruþróun

Þessar ólíku einingar og samstarfsaðilar þeirra eru sífellt að brydda upp á spennandi nýjungum.

„Hjá Högum er mikill áhugi á samstarfinu sem viðskiptasamningurinn býður upp á,“ segir Ágúst. „Þar er stöðugt unnið að nýjum réttum til að nýta framleiðsluna sem best og þar fer fram vöruþróun sem gengur út á að gera vöruna eins aðgengilega fyrir neytendur og hægt er.

Hjá Sláturhúsi Kaupfélags Vestur-Húnvetninga er svo verið að vinna gæða hangikjöt fyrir jólin úr þessu frábæra kjöti,“ segir Ágúst. „Það er selt undir merkjum Íslandslambs og er merkt sem hátíðarhangikjöt.

Esja sérhæfir sig síðan í að þjónusta veitingahús og mötuneyti og býður upp á mikið vöruúrval,“ segir Ágúst. „Aðaláherslan er samt á nautgripakjöt, enda er Esjan langstærsti einstaki vinnsluaðilinn á íslensku nautgripakjöti. Að jafnaði eru um 120 gripir skornir í hverri viku. Það veitir ekki af allri þessari framleiðslugetu, því eftirspurnin er mikil og Esjan flytur ekki inn neinar kjötvörur, heldur er öll áherslan lögð á íslenska framleiðslu.“