Undirstaðan í allri starfsemi og þjónustu Hersins felst í að breiða út kristilegan boðskap þar sem kærleikur og mannvirðing eru í hávegum höfð. Markmið starfsemi barna- og unglingastarfs Hjálpræðishersins er að mæta þeirri þörf sem er í samfélaginu hverju sinni.

Máltíðin mikilvæg

Meðal þess sem nú er boðið upp á er „Opið hús“, þar sem börnum gefst kostur á að fá heita máltíð, og aðstoð við heimanám, þar sem létt er undan álagi á barnafjölskyldur og þeim gert kleift að njóta fleiri gæðastunda saman.

Opnu húsin eru ekki með sama sniði í Reykjavík og á Akureyri. Á Akureyri er það fyrir börn á grunnskólaaldri og fjölskyldur þeirra. Markmiðið er að koma til móts við fjölskyldur með börn sem eru á grunnskólaaldri og létta undir álaginu sem fylgir gjarnan hversdagslífinu og ekki síst hinum alræmda úlfatíma. Þar er boðið upp á heitan mat og gefst fjölskyldum því kostur á að eiga saman afslappaða gæðastund.

Í Reykjavík er opna húsið hugsað fyrir börn og unglinga, frá 4. bekk og upp úr. Þar er vel tekið á móti börnunum, skipulögð dagskrá með leikjum og ýmsu skemmtilegu auk þess sem allir sem það vilja fá svo heita máltíð.

Heitu máltíðirnar hafa fengið frábærar viðtökur.

Aðstoð við heimanám

Börnum og unglingum stendur þá til boða að fá aðstoð við heimanám í Hjálpræðishernum í Reykjavík og er sú þjónusta ætluð öllum börnum sama á hvaða námsstigi, og fer hún fram tvisvar í viku.

Mörg börn búa við aðstæður þar sem enginn heima getur aðstoðað, eða foreldrarnir eru svo önnum kafnir að gæðastundirnar glatast, á kostnað togstreitunnar sem fylgt getur heimalærdómi. Úrræði af þessu tagi getur því bersýnilega haft veruleg áhrif á velferð fjölda barna og fjölskyldna þeirra.

Starfinu sinna sjálfboðaliðar á öllum aldri, margir kennaramenntaðir og jafnvel komnir á eftirlaun. Þá er stefnt að samstarfi við Háskóla Íslands, þar sem háskólanemendur koma að verkefninu.

Þessi þjónusta hefur til dæmis reynst afar vel í Breiðholti þar sem margir íbúar eru af erlendum uppruna og foreldrar oft með takmarkaða íslenskukunnáttu. Herinn leggur ríka áherslu á að veita þessum hópi sérstakan stuðning, en það getur verið snúið fyrir erlenda foreldra að hjálpa til með íslenskt heimanám.

Föndur og fermingar

Annað framtak sem hefur hlotið góðar undirtektir er hin svokallaða „Messy Church“ eða föndurkirkja, sem er einu sinni í mánuði og er hugsuð fyrir alla fjölskylduna að koma og gera eitthvað saman. Þar er lesin Biblíusaga og svo föndrað út frá henni á skapandi og fræðandi hátt. Að lokum er boðið upp á máltíð.

Þá er einnig hægt að fermast í Hjálpræðishernum, en þar er boðið upp á fermingarfræðslu sem er sambærileg þeirri sem fram fer í til dæmis Þjóðkirkjunni. Á haustin fara svo fermingarbörnin í ferð til Noregs í viku, en Hjálpræðisherinn á Íslandi tilheyrir sama umdæmi og Hjálpræðisherinn í Noregi og Færeyjum. Á haustin hefjast svo foreldramorgnar ásamt viðburðum af ýmsu tagi.

Í barna- og unglingastarfinu eru öll börn velkomin og eru mörg dæmi þess að börn sem finni sig ekki í annars konar tómstundum, íþróttum eða félagsmiðstöðvum, finni sig loks þar. Í starfinu fá börn óskipta athygli ásamt því að fá að vera þau sjálf, hitta vini sína, leika eða slappa af, en stundum bjóða fjölskylduaðstæður því miður ekki upp á það.

Barna- og unglingastarf Hjálpræðishersins er starfrækt í Reykjavík, á Akureyri og í Reykjanesbæ, en í Reykjanesbæ mun Hjálpræðisherinn hefja samstarf við KFUM og KFUK um unglingastarf á Ásbrú. Nálgast má frekari upplýsingar og dagskrá á heimasíðu Hjálpræðishersins, herinn.is.

Hér deila fjórir einstaklingar sinni upplifun af því að taka þátt í barna- og unglingastarfi Hjálpræðishersins.

Hvað er Hjálpræðisherinn fyrir þér?

Fatima hittir vini sína í Hernum og saman bralla þau allt á milli himins og jarðar.

Fatima: „Það er staður þar sem ég og vinir mínir hittast saman eftir hljómsveitaræfingu hjá mér. Við spilum, syngjum, gerum TikTok, horfum á bíómyndir og leikum okkur saman. Linda Björk, Didda, Almar, Hjördís, Valborg, Viktoría og Andrea eru ótrúlega skemmtileg og bjóða alla velkomna.“

Viktor hlakkar alltaf til að mæta í Herinn á miðvikudögum.

Viktor: „Hjálpræðisherinn er frábær staður sem ég og vinir mínir förum á, á öllum miðvikudögum. Það er geggjaður matur þarna og manni líður æðislega vel þarna, alltaf fullt að gera, alls konar leikir og margt annað. Starfsfólkið er yndislegt og tekur alltaf vel á móti manni, svolítið eins og stór systkini. Ég hlakka til allra miðvikudaga, því þá veit ég að það er Hjálpræðisherinn.“

Aníta segir Herinn hafa gert henni kleift að njóta fleiri gæðastunda með fjölskyldunni.

Aníta (sem á börn í starfinu): „Hjálpræðisherinn er staður sem hefur skapað tækifæri til að eiga gæðastundir með fjölskyldunni, kynnast fjölbreyttu fólki í samfélaginu og láta gott af sér leiða á sama tíma.“

Almar Ingi er afar þakklátur fyrir að hafa kynnst Hernum og segir hann sitt annað heimili.

Almar Ingi: „Fyrir mér þá er Hjálpræðisherinn seinna heimilið mitt. Staður sem er ávallt til staðar sama hvað er í gangi hjá manni. Mjög þakklátur á sínum tíma að hafa mætt í sunnudagsskóla og hef verið í Hjálpræðishernum síðan. Hjálpræðisherinn er og verður alltaf hluti af mér og staður sem hefur hjálpað mér að vaxa sem manneskja.“