Fyrirtækið dk hugbúnaður þróar og selur langútbreiddasta viðskiptakerfið á Íslandi fyrir allar greinar atvinnulífsins og býður upp á alls kyns sérlausnir fyrir verslanir og þjónustu. „dk hugbúnaður er leiðandi í viðskiptahugbúnaði hér á landi fyrir allar stærðir og gerðir fyrirtækja, hann er þróaður á Íslandi fyrir íslenskar aðstæður,“ segir Dagbjartur Pálsson, en hann er framkvæmdastjóri hjá fyrirtækinu ásamt bróður sínum, Magnúsi Pálssyni. „Fyrirtækið framleiðir alhliða viðskiptahugbúnað og verður 22 ára í ár.“

„dk hugbúnaður hefur lagt mikla áherslu á sjálfvirknivæðingu í kerfum sínum undanfarin misseri. Markaðurinn kallar á sjálfsafgreiðslukerfi og dk hefur svarað því með fjölbreyttum lausnum,“ segir Hafsteinn Róbertsson, kerfisfræðingur hjá dk hugbúnaði. „Sjálfsafgreiðslukerfi flýta afgreiðslu og auka ánægju viðskiptavina ásamt því að lækka kostnað fyrirtækja töluvert. Sjálfsafgreiðsla er einföld, hraðvirk og tengjanleg við margs konar sérkerfi og vefþjónustur. Allar sölur færast rafrænt milli kerfa yfir í dk sölukerfi og dk fjárhagsbókhald. Sjálfsafgreiðslulausnir dk keyra bæði á hefðbundnum PC tölvubúnaði og sérhæfðum afgreiðslutölvum. Einnig er hægt að fá lausnir í spjaldtölvur eins og iPad. Flestar tegundir af posum og prenturum eru tengjanlegar við kerfin,“ upplýsir Hafsteinn.

„Við bjóðum bæði upp á afgreiðslu- og sjálfsafgreiðslukerfi fyrir alla almenna verslun og þjónustu,“ segir Hafsteinn Róbertsson, sérfræðingur í afgreiðslukerfum fyrirtækisins. FRÉTTABLAÐIÐ/ERNIR

Heilbrigðisstofnanir

Hafsteinn segir að fyrir heilbrigðisþjónustu hefur dk hugbúnaður gert fullkomið sjálfsafgreiðslukerfi sem tengist hinum ýmsu sérkerfum sem heilbrigðisþjónusta þarf að nota. „Þar má nefna sérhæfð læknakerfi, Sjúkratryggingar Íslands og raðarkerfi frá Qmatic. Heilsugæslur og heilbrigðisstofnanir sjá mikinn hag í að innleiða þessi kerfi hjá sér við móttöku sjúklinga. Læknavaktin er ein þeirra heilbrigðisstofnana sem nota sjálfsafgreiðslukerfi frá dk hugbúnaði og hefur reynslan þar verið afar góð svo ekki sé meira sagt,“ segir hann.

Verslanir & ferðaþjónusta

Í dag þykir það sjálfsagt mál að afgreiða sig sjálfur í almennri verslun. „Lindex á Íslandi og í Danmörku nota bæði sjálfsafgreiðslukerfi frá dk í verslunum sínum. Mikilvægt er að sjálfsafgreiðslukerfið sé einfalt fyrir þann sem þarf að nota það og að kerfið leiði viðskiptavininn áfram alveg þangað til hann greiðir fyrir vörur í posa. Ferðaþjónustufyrirtæki reiða sig á bókunarkerfi fyrir einstaklings- og hópabókanir. Sjálfsafgreiðslukerfi dk tengjast bókunarkerfi Bókunar ehf. Perlan er eitt þeirra fyrirtækja sem nýta sér sjálfsafgreiðslukerfi á iPad. Einfalt er að koma slíkum kerfum upp þar sem þau taka mjög lítið pláss. Þróun á sjálfsafgreiðslukerfum heldur áfram hjá dk og verið er að vinna í frekari lausnum fyrir veitingastaði svo það má segja að það séu spennandi tímar fram undan,“ segir Hafsteinn enn fremur og bætir við að þjónusta við viðskiptavini sé mikilvægur hluti af starfsemi dk hugbúnaðar.