Margrét Grímsdóttir, framkvæmdastjóri hjúkrunar, segir mjög breiðan aldurshóp koma til dvalar á Heilsustofnun og að hópur dvalargesta sé sífellt að yngjast. Þangað komi fólk í endurhæfingu meðal annars vegna langvinnra verkja, offitu- og efnaskiptasjúkdóma, streitu, kulnunar og geðrænna vandamála eins og kvíða og þunglyndis.

„Það má segja að COVID hafi umpólað streituhópnum. Fólk sem var að koma inn vegna mikillar streitu hefur verið alsælt með að þurfa að hægja á, en á móti höfum við séð fólk sem hafði lífið í góðum takti lenda í vanda,“ segir Margrét. „Við það að þurfa að vinna heima hafa komið upp samskiptavandamál við maka eða innan fjölskyldunnar, það hefur verið meira álag við að standa sig vel í starfi á sama tíma og að sjá um börn og heimili og laun hafa jafnvel lækkað. Fólk glímir við svefntruflanir, lifnaðarhættir hafa versnað auk þess að finna fyrir auknum kvíða og streitu.

Starfsfólkið okkar er duglegt að afla sér nýrrar þekkingar í endurhæfingu og hluti af meðferðinni núna er til dæmis samkenndarmiðuð nálgun, sem tengist inn á núvitund,“ segir Margrét. „Hér er mjög öflug sjúkraþjálfun og nuddmeðferðir auk ýmissa annarra meðferða sem stuðlar að góðum árangri í endurhæfingunni.

Við mælum árangurinn af endurhæfingunni með ýmsum mælitækjum og sjáum að árangurinn er mjög góður, bæði andlega og líkamlega,“ segir Margrét. „Í yfir 95% tilfella er hægt að sjá mælanlegan jákvæðan árangur.

Hér dvelur fólk allan sólarhringinn og margir tala um hvað það skipti miklu máli að stíga út úr krefjandi amstri daglegs lífs inn í aðstæður þar sem þú hefur tækifæri til að vinna markvisst með sjálfan þig í 4-6 vikur,“ segir Margrét. „Það hjálpar til dæmis fólki sem glímir við streitu gríðarlega að stíga út úr þeim aðstæðum sem komu því í kulnun. Fólk nær að hlaða batteríin og safna orku, sem er forsenda þess að hægt sé að takast á við vandamálið. Það er mjög ánægjulegt að sjá einstaklinga ná betri tökum á sínum vanda og fara héðan með aukinn styrk út í lífið.“

Jón Rúnar fór í endurhæfingu á Heilsustofnun og segir að það ætti að vera skylda að fara þangað einu sinni á ári eftir fertugt. FRÉTTABLAÐIÐ/ERNIR

Ætti að vera skylda fyrir alla

Jón Rúnar Arilíusson fór í endurhæfingu á Heilsustofnun og segir reynsluna ólýsanlega.

„Það er ólýsanlegur bróðurkærleikur á þessum einstaka stað. Stjórnendur hafa náð ótrúlegum árangri í starfsmannahaldi. Þú kemur inn og allt starfsfólkið tekur mjög vel utan um þig í dvölinni,“ segir Jón.

Það ætti að vera eins og herskylda að fara þarna einu sinni á ári eftir fertugt. Þetta er hraðhleðslustöð, andlega og líkamlega,“ segir Jón. „Eftir tvær vikur var ég farinn að finna rosalegan líkamlegan mun á mér á allri þessari hreyfingu og mataræðinu enda er mikill metnaður lagður í fjölbreyttan og heilsusamlegan mat.

Það var líka afskaplega gagnlegt að kynnast jóga og núvitund til þess að takast á við afleiðingar af streitu og miklu álagi, það eru stórmagnaðir hlutir og þú uppskerð ótrúlega mikið í dvöl á Heilsustofnun ,“ segir Jón. „Þetta stokkaði spilin upp á nýtt og breytti öllu fyrir mig.“​