Unnur María er elst í hópnum en í næstu viku ætlar hún að þreyta inntökupróf í læknisfræði við Háskóla Íslands. Sigríður Lára og Katla eru báðar nemendur á náttúrulíffræðibraut í Verzlunarskóla Íslands. Þær koma allar úr grunnskólum Kópavogs, Lindaskóla, Vatnsendaskóla og Smáraskóla.

Unnur María segir að hver grunnskóli velji fulltrúa í ungmennaráðið á hverju ári. Tveir koma úr Menntaskólanum í Kópavogi og síðan koma fulltrúar úr öðrum framhaldsskólum með lögheimili í bænum. Þær koma allar inn sem fulltrúar Molans, sem er félagsheimili ungmenna á aldrinum 16-25 ára. Unnur María er formaður ráðsins. Alls er ráðið skipað 15 fulltrúum.

Fara á fund bæjarstjórnar

„Við mætum á ungmennaráðsfund einu sinni í mánuði þar sem farið er yfir ýmis mál tengd börnum og ungmennum í bænum. Tilgangurinn er að veita ungu fólki vettvang til að koma skoðunum sínum á framfæri við rétta aðila. Einnig fáum við fyrirlestra og þjálfun, auk þess að gæta hagsmuna barna og ungmenna í Kópavogi. Við mætum síðan á fund með bæjarstjórn og förum yfir þau mál sem til okkar hafa borist sem geta verið margvísleg. Öll málefni tengjast börnum og ungmennum í grunnskólum bæjarins,“ útskýrir Unnur.

Unnur María, Sigríður og Katla hafa mikinn áhuga á að hafa áhrif þegar kemur að barnvænu samfélagi og eru ánægðar með að Kópavogur hafi tekið þetta skref. FRÉTTABLAÐIÐ/VALLI

Fagleg fræðsla

„Við skrifum umsagnir um alls kyns málefni sem koma á borð ráðsins og fáum fræðslu. Til dæmis var Borgarlínan kynnt fyrir okkur um daginn. Auk þess fáum við kynningu á heimsmarkmiðum Sameinuðu þjóðanna. Utanaðkomandi fagfólk kemur þá til okkar með fyrirlestra. Við komum með ábendingar varðandi innleiðingu Barnasáttmála Sameinuðu þjóðanna og komum með tillögur að úrbótum fyrir bæinn,“ segja þær.

Innleiðingarferli Barnasáttmálans er búið að vera í gangi frá árinu 2018, en þá sendum við tvo fulltrúa til að vera í stýrihóp sem hafa tekið þátt í vinnunni. Í þeim hópi eru líka tveir grunnskólanemendur og fulltrúar frá bæjarstjórn. Við í Ungmennaráðinu getum gert athugasemdir við tillögur stýrihópsins og höfum því mikil áhrif,“ segir Katla. „Við fáum að láta skoðanir okkar í ljós sem er afar mikilvægt,“ bætir Sigríður við.

Fulltrúar Ungmennaráðs á bæjarstjórnarfundi í Kópavogi.

Vilja skólasálfræðing

„Á Ungmennaþingi fáum við auk þess að heyra frá fulltrúum grunnskólans sem hafa ýmislegt fram að færa um bætta starfsemi, til dæmis að aðgengi að skólasálfræðingi verði aukið. Covid hafði vissulega áhrif á andlega líðan margra barna.“

Stelpurnar segja að mun meira sé gert í sambandi við barnvænt sveitarfélag í dag, en var þegar þær voru í grunnskóla. Sigríður vill þó meina að almennt hafi skólarnir staðið sig mjög vel og hennar skóli var meðal annars með UNICEF-ráð. Framfarir á þessu sviði séu þó alltaf að verða meiri og aðbúnaður betri. „Það er mun meira hugsað um að börnum líði vel í skólanum en áður. Börnin hafa fengið rödd og þau skipta máli. Einnig þau börn sem eru með annað móðurmál en íslensku. Þau þurfa líka athygli og aðstoð við hæfi,“ segja þær.

Krakkarnir eru mjög áhugasamir um málefnin.

Jákvætt að hafa áhrif

Þegar stelpurnar eru spurðar hvort þetta sé skemmtilegt verkefni eru þær fljótar að svara því játandi. Unnur María er búin að vera í ráðinu í fimm ár, sem segir sitt. „Það er alltaf jákvætt að fá að hafa áhrif á samfélagið,“ segir Katla, sem verður áfram í ráðinu á næsta ári. Þær vilja þó ekki meina að þetta sé pólitík, segjast ekki hafa neinn sérstakan áhuga á henni.

Hvað finnst þeim merkilegast við starfið?

„Mér finnst skemmtilegast að vera þátttakandi í að móta bætt umhverfi barna og ungmenna. Það skiptir miklu máli að við unga fólkið fáum að taka þátt í samfélagslegri uppbyggingu þar sem við erum nær börnunum í aldri en þeir sem eru eldri,“ segir Sigríður.

Fulltrúar Ungmennaráðs á bæjarstjórnarfundi í Kópavogi.

Vettvangur fyrir skoðanir

Á hverju ári er haldið ungmennaþing þar sem nemendur úr öllum skólum Kópavogs taka þátt. „Þetta hafa verið fjölsóttir viðburðir utan í fyrra þegar þingið fór fram á netinu vegna Covid. Á ungmennaþinginu fengum við fullt af góðum tillögum um skólamál, umhverfismál, félagsmál og forvarnir. Síðan tókum við þessar tillögur saman og fórum með þær á bæjarstjórnarfund fyrir viku,“ segja þær.

Eitt af hlutverkum ungmennaþings er að skapa ungu fólki vettvang og leiðir til að koma skoðunum sínum og tillögum á framfæri til viðeigandi aðila.

„Innleiðing Barnasáttmála Sameinuðu þjóðanna er mjög þarft og gott verkefni hjá Kópavogi. Þetta er ekki búið, verkefnið heldur áfram næstu ár. Í bígerð er að halda barnaþing 2022 sem verður ætlað yngstu kynslóðinni. Kópavogur er annað sveitarfélagið sem fær viðurkenningu sem barnvænt sveitarfélag, svo það er mjög margt að gerast hér. Það má þakka öllum þeim sem hafa komið að þessu verkefni, ungmennaráði, bæjarstjórninni, stýrihópnum, sem var sextán manna og skipaður börnum og ungmennum. Sömuleiðis hefur Anna Elísabet Ólafsdóttir stýrt þessu verkefni af mikilli fagmennsku, en hún stendur jafnframt að uppbyggingu á stofnun Geðræktarhúss í bænum sem verður opnað í haust. Þá hefur Amanda K. Ólafsdóttir, deildarstjóri frístundadeildar menntasviðs verið okkur innan handar og er rosalega dugleg. Það eru því margir sem koma að þessu og það er mikið að gerast í Kópavogi.“

Ungmennaráðið er vel skipað.