„Bjórböðin eru þau einu sinnar tegundar á Íslandi og öllum Norðurlöndunum, en þau urðu fimm ára 1. júní síðastliðinn. Eins og nafnið gefur til kynna bjóðum við upp á bjórbað, þar sem gestir okkar liggja í baði sem er fyllt með vatni, bjór og geri, en við erum einnig með útipotta,“ segir Ragnheiður Ýr Guðjónsdóttir, rekstrarstjóri Bjórbaðanna. „Þeir eru mjög skemmtilegir, enda er gríðarleg náttúrufegurð hérna allt um kring og fallegt útsýni yfir í Hrísey, Kaldbak og Þorvaldsdal.

Við erum líka með frábæran veitingastað þar sem flestir réttirnir eru tengdir við bjór á einhvern hátt, svo það er hægt að koma til okkar í dekur, slökun og njóta þess svo að fá sér frábæran mat,“ bætir Ragnheiður við. „Við leggjum áherslu á fallegt og rólegt umhverfi, góðan bjór og góðan mat.“

Bað, slökun og dekur í fallegu umhverfi

„Öllum finnst gaman að prófa eitthvað nýtt og öðruvísi og við bjóðum svo sannarlega upp á öðruvísi og um leið einstaka upplifun,“ segir Ragnheiður. „Eftir bjórbaðið er svo boðið upp á sérstakt slökunarherbergi til að ná fullkominni hvíld og mörgum finnst það toppurinn af upplifuninni.

Á veitingastaðnum er boðið upp á mat sem er gerður úr gæðahráefni frá svæðinu og bjór er mikið notaður í ýmsa rétti.

Við mælum svo með því að sleppa því að fara í sturtu í minnst fjórar klukkustundir eftir baðið, svo að bjórinn og gerið fái sinn tíma til að vinna almennilega á húðinni og hárinu, en bæði verður mjúkt samstundis og heldur svo áfram að mýkjast þegar líður á,“ útskýrir Ragnheiður.

Matur úr gæðahráefni frá svæðinu

„Á veitingastaðnum okkar leggjum við áherslu á að bjóða mat sem er gerður úr gæðahráefni frá svæðinu, eins og fiski frá Hauganesi og kjöti frá B. Jensen. Við reynum líka að tengja matinn við alls konar bjór og notum hann mikið í ýmsa rétti,“ segir Ragnheiður. „Kaldaborgarinn okkar er til dæmis bjórleginn og gríðarlega vinsæll. Hann er einn af okkar upprunalegu réttum og klikkar aldrei.“

Snyrtivörur sem hjálpa húðinni

Bjórböðin bjóða líka upp á ýmsar sérgerðar snyrtivörur sem hægt er að kaupa á staðnum eða panta í vefversluninni og í gegnum síma og tölvupóst.

Útipottarnir eru mjög skemmtilegir, enda er gríðarleg náttúrufegurð allt í kringum Bjórböðin og fallegt útsýni yfir í Hrísey, Kaldbak og Þorvaldsdal.

„Sápurnar okkar koma frá Tékklandi, en þetta eru vörur sem við kynntumst í ferðalagi um landið. Baðsaltið og baðolíurnar eru svo þær sömu og við notum í böðin, þær gefa frá sér góða lykt og örlitla froðu,“ segir Ragnheiður. „Vörurnar eru unnar úr bjór, geri og humlum og eru stútfullar af B-vítamíni sem hjálpar húðinni að endurnýja sig og róar um leið kláða í húð og hársverði.“

Einstök upplifun í himnaríki baðunnenda

„Ísland er sannkallað himnaríki fyrir baðunnendur og ég held að enginn fari skítugur heim eftir ferðalag um landið okkar. Hjá okkur er hægt að fá alveg einstaka upplifun á þessu sviði og bjórböðin okkar eru fyrir alla. Það er ekkert áfengi í bjórnum sem fer í baðið, svo það geta allir komið í heimsókn til okkar,“ útskýrir Ragnheiður. „Hingað kemur ótrúlega mikið af fjölskyldum með börn, sem er bara frábært.

Í Bjórböðunum er hægt að fá einstaka upplifun og fullkomna slökun. Bjórböðin henta líka öllum, því það er ekkert áfengi í bjórnum sem er notaður í böðin.

Bjórbað er líka alls ekki bara fyrir bjóráhugafólk. Þetta er fyrst og fremst heilsulind og hér fá gestir fullkomna slökun og fara héðan endurnærðir,“ segir Ragnheiður. „Fyrir einhverja er það auðvitað plús að það er hægt að drekka bjór á meðan þú ert í heimsókn, en áherslan er frekar á einstaka upplifun og góða þjónustu.“

Stanslausar hugmyndir um stækkanir

„Við erum svo líka með stanslausar hugmyndir um alls kyns stækkanir og breytingar. Núna næst erum við að opna gistingu, en það verður byrjað á fimm herbergjum og svo förum við í stækkun þegar líður á árið,“ segir Ragnheiður. „Við erum líka komin af stað með hugmyndir um frekari stækkun Bjórbaðanna, en við látum duga að gera eitt verkefni í einu.“


Bjórböðin eru opin frá kl. 12-22 alla daga nema sunnudaga, en þá lokar kl. 21. Boðið er upp á tvær rútuferðir frá Akureyri alla opnunardaga kl. 11 og kl. 16. Mikilvægt að bóka sig í þær í gegnum bookings@bjorbodin.is. Nánari upplýsingar fást í síma 414 2828 og á www.bjorbodin.is.