„Þegar ég opnaði bloggið fyrst fyrir akkúrat fjórum árum var aðaláherslan hjá mér á að gefa góð ráð í framkvæmdum og sýna hvernig hægt væri að flippa húsi án þess að það kostaði of mikið, var meira í áttina að lífsstílsbloggi þar sem ég var líka með uppskrift og annan fróðleik,“ segir María aðspurð um tilkomu bloggsins.

Uppskriftirnar fengu fljótt meiri athygli á blogginu og fann María sömuleiðis fyrir sterkari áhuga í matardeildinni þegar fram liðu stundir og ákvað því að breyta bloggsíðunni alfarið í heimilis- og matarblogg.

Bloggið í höfuðið á ömmu

María segir engan vafa leika á því hvaðan ástríða hennar fyrir mat komi.

„Það er óhætt að segja að hún komi frá Spáni, en ég er hálfur Spánverji. Frænkur mínar og amma voru alltaf í eldhúsinu að elda þegar ég var sem barn úti hjá þeim, ef þær voru ekki að elda þá voru þær á matvörumarkaðnum að versla mat eða tala um hvað átti að vera í matinn daginn eftir og næstu daga. Ég lærði mest að elda af þeim, sérstaklega Paz, frænku minni, og ömmu Paz sem bloggið mitt er nefnt eftir.“

Fjölbreytni fyrir börnin

María er móðir fjögurra barna; Gabríelu sem er fædd árið 1999 en hún á jafnframt von á sínu fyrsta barni svo Maríu bíður brátt ömmutitillinn og segist hún hlakka mikið til.

„Svo kemur litla hrúgan eins og ég kalla hana sem fæddist 2013, 2014 og 2015 en það eru þau Reynir Leo, Mikael og Viktoría Alba,“ segir María og viðurkennir að það sé oft mikið fjör á heimilinu. Aðspurð hvað hún leggi helst áherslu á í mataræði barnanna segir hún fjölbreytni.

„Hér er allt leyfilegt í hófi. Ég held að ef maður banni of mikið eins og nammi sem dæmi þá verða börn bara enn sólgnari í það. Ég reyni líka alltaf að hafa grænmeti með hverri kvöldmáltíð.“

Pítsukvöldin heilög

María mælir með því að leyfa litlum puttum að taka þátt í því að undirbúa matinn fyrir fjölskylduna. „Ég leyfi þeim þegar hentar að skera niður grænmeti fyrir matinn, sem er sniðugt því þá eru þau líka að stinga því upp í sig í leiðinni og jafnvel búin að borða fullt af grænmeti fyrir matinn og svo meira með matnum,“ segir María.

Spurð um uppáhaldsmat barnanna segir hún steiktar grísalundir með sætkartöflufrönskum og sveppasósu vinsælasta réttinn um þessar mundir.

„Á föstudögum eigum við svo fast pítsukvöld eins og svo margir,“ segir María um hefð sem orðin er heilög hjá fjölskyldunni.

Stundum bara grjónagrautur

„Ég er alls ekki alltaf í stuði til að elda, sérstaklega ekki þegar ég hef verið í eldhúsinu við vinnu allan daginn að semja og prófa uppskriftir. Þá hef ég oft bara flatkökur og skyr, eða jafnvel bara tilbúinn grjónagraut í dollu og lifrarpylsu með, enda fá allir hvort eð er heita máltíð í hádeginu,“ segir hún spurð um vinsælasta skyndibitann á heimilinu.

„Einnig spila flatkökurnar stórt hlutverk sem nesti hjá okkur þegar við förum út að leika og bralla ásamt speltsnúðum, hnetum og rúsínum,“ segir María að lokum.

María útbýr hér ljúffengt pastasalat með bleikju og góðri ólífuolíu frá MUNA. MYND/ALDÍS PÁLSDÓTTIR

Muna – Bleikju pastasalat stútfullt af hollri fitu, prótíni og trefjum

250 g penne pasta frá Muna

1 box piccolo tómatar

Hnefafylli af ferskri basilíku

1 bleikjuflak

10-14 ferskar litlar mozzarellakúlur

1 stórt avókadó eða 2 lítil

Lífræn sítrónuolía frá Muna

Salt og pipar

Byrjið á setja vatn í pott og saltið það vel, á að vera nánast eins og sjóvatn á bragðið. Þegar suðan er komin upp setjið þá pastað ofan í og sjóðið skv. leiðbeiningum.

Hitið ofn í 200 °C og saltið og piprið bleikjuna. Setjið hana í heitan ofninn í 15-20 mínútur. Skerið næst avókadó í bita og tómatana og mozzarella kúlurnar í tvennt. Þegar pastað og bleikjan er til setjið þá pastað í fallega, grunna salatskál.

Dreifið næst avókadó, tómötum og mozzarella-kúlum fallega yfir pastað. Skerið svo bleikjuna niður og dreifið inn á milli. Toppið svo með því að dreifa saxaðri, ferskri basilíku yfir, hellið vel af sítrónuolíu yfir allt og saltið vel með grófu salti og pipar.

Fylgstu með Maríu Gomez hér: paz.is og instagram.com/paz.is