Íslendingar eru mjög hrifnir af fiski og frönskum en fyrir Covid voru það þó erlendu ferðamennirnir sem streymdu að vagninum. Árni segist finna fyrir auknum áhuga ferðamanna á ný. Það sé ekki síst að þakka góðum umsögnum á erlendum vefjum, til dæmis YouTube. „Sumir ferðamenn sem koma eru með lista yfir matsölustaði sem þeir verða að heimsækja í Íslandsheimsókninni og við erum þar ofarlega á blaði,“ segir Árni og bætir við að Íslendingarnir komi frekar akandi og taki fisk og franskar með sér heim. „Við erum með mjög góðar umhverfisvænar umbúðir sem henta vel til að grípa með sér heim. Maturinn helst vel heitur á leiðinni,“ segir hann. „Allar umbúðir eru sérmerktar okkur. Við leggjum áherslu á umhverfisvernd og flokkum allt sorp sem fer frá okkur.“

Áhuginn alltaf að aukast

Áhugi Íslendinga hefur verið að aukast mjög mikið á svokölluðu „street food“, að versla beint við matarbíla- eða vagna. „Fish and Chips-vagninn hefur fast aðsetur við Vesturbugt og þar er hægt að ganga að okkur vísum allt frá apríl til septemberloka.“

Þetta er sjöunda árið sem Árni og fjölskylda hans reka Fish and Chips-vagninn. „Það hefur alltaf gengið vel hjá okkur, enda leggjum við metnað okkar í ferskt gæðahráefni. Fjölskylda konu minnar rekur fyrirtækið Fiskkaup, sem gerir út þrjá báta. Fiskurinn kemur alltaf til okkar nýveiddur og getur ekki verið ferskari,“ segir Árni.

Árni ásamt starfsstúlkum sínum bíður eftir að erlendum ferðamönnum fjölgi í Reykjavík. Fish and Chips-vagninn bar sigur úr býtum í fyrstu götubitakeppninni á Íslandi 2019.

Hann viðurkennir að Covid hafi vissulega haft áhrif á reksturinn þar sem stór hluti viðskiptavina sé ferðamenn. „Sem betur fer eigum við mjög stóran hóp af Íslendingum sem koma reglulega til okkar. Þess vegna höfum við séð okkur fært að hafa opið. Íslendingar eru hrifnir af þessum rétti, sérstaklega fólk á miðjum aldri. Unglingarnir eru hrifnari af pítsum. Það er mjög merkilegt að yngri Íslendingar koma lítið til okkar, en það gera hins vegar ungir ferðamenn sem eru mjög hrifnir af fiskinum okkar. Það eru einmitt þeir sem koma með lista yfir matsölustaði sem þeir vilja prófa og hafa séð umfjöllun um á netinu. Við höfum fengið mjög góða umsögn á TripAdvisor á hverju ári. Það er gaman að sjá að það er að lifna yfir bæjarlífinu og ferðamönnum að fjölga þessa dagana,“ segir Árni, hress í bragði.

Eins og allir vita er fish and chips breskur þjóðarréttur og afar vinsæll. Í Bretlandi er löng hefð fyrir því að fá sér fish and chips á næsta pöbb eða veitingastað. „Við hjónin kynntumst þessum áhuga í Bretlandi en við höfum átt mikil viðskipti þar. Hins vegar get ég nefnt að fish and chips var mjög vinsælt í Reykjavík á stríðsárunum. Ætli sá áhugi hafi ekki komið með bresku hermönnunum. Það voru allnokkrir staðir sem buðu upp á þennan rétt. Síðan lagðist þessi áhugi af og Íslendingar borðuðu soðna ýsu. Á undanförnum árum hefur áhuginn kviknað aftur. Fólki finnst það ómissandi að fá djúpsteiktan fisk og franskar,“ segir Árni.

Namm, girnilegt. Ferskur fiskur með frönskum og val um góðar sósur.

Sérsmíðaður í Bretlandi

„Við hjónin fengum okkur oft þennan rétt á ferðum okkar um Bretland og því datt okkur í hug að gaman væri að setja upp svona söluvagn hér á landi. Við sendum matreiðslumann á námskeið hjá National Federation of Fish Friers, en við erum aðili að þeim samtökum sem stofnuð voru árið 1913. Samtökin eru með stöðluð vinnubrögð og við förum eftir þeim. Vagninn sjálfur er smíðaður í Bretlandi og sérstaklega hannaður fyrir þennan rekstur, með stálinnréttingum.

Þorskurinn er sérskorinn fyrir okkur og sósurnar eru gerðar sérstaklega eftir okkar uppskriftum. Sósunum er pakkað inn í litlar og handhægar dollur. Fólk getur síðan valið um bragð. Flestir vilja tartarsósu en það hefur færst í aukana að beðið sé um remúlaði. Íslenska kokteilsósan er síðan alltaf vinsæl með frönskunum þótt hún þekkist ekki í Bretlandi. Nýlega bættum við chilli-mæjó sósu við sem margir eru hrifnir af. Yngra fólkið vill hafa matinn bragðmikinn,“ segir Árni. „Við bjóðum auk þess mjög góðar franskar kartöflur sem eru þykkari en gerist og gengur.“

„Lykilatriði að góðum mat er ferskt og gott hráefni. Við leggjum því mikla áherslu á það. Margir Bretar sem koma til okkar hafa á orði að maturinn okkar sé betri en í heimalandi þeirra. Það er frábært að fá slíkt hrós, en ég hef bent á að fiskurinn hér sé mun betri en sá sem fæst í Bretlandi.“

Umbúðirnar eru umhverfisvænar og þægilegt að grípa mat með sér heim.

Fiskur úr sjó í maga

Árni segir að Fish and Chips-vagninn sé skemmtileg hliðargrein við fiskútgerðina. „Það má segja að við fylgjum vörunni úr hlaði og það er ánægjulegt að sjá hversu vel henni er tekið af viðskiptavinum. Það er ótrúlegt að yfir ein milljón manna hafi skoðað myndband á YouTube þar sem fjallað er um vagninn,“ segir hann. „Við erum greinilega mjög myndræn því vagninn er mikið myndaður.“

Hjónin standa oft vaktina sjálf í vagninum, en að auki eru tveir starfsmenn sem gætu orðið fleiri í sumar þegar ferðamönnum fjölgar mikið. „Grandinn hefur verið að byggjast upp undanfarin ár og oft er líf og fjör í kringum okkur. Fish and Chips-vagninn er staðsettur á frábærum stað þar sem eru næg bílastæði.“

Vagninn er opinn alla daga í hádeginu og aftur frá kl. 18-20. Hægt er að fræðast um starfsemina á heimasíðunni fishandchipsvagninn.is og einnig á Facebook.