Eitt ár er liðið frá því að íþróttavöruverslunin SPORT24 opnaði sína fyrstu verslun hér á landi við Sundaborg 1 í Reykjavík. Fyrir mánuði var þriðja verslun fyrirtækisins opnuð í Garðabæ en fyrirtækið opnaði verslun á Akureyri í febrúar. Fanney segir SPORT24 vera umsvifamesta söluaðila íþróttavara í Danmörku, með mikinn fjölda verslana undir sínum hatti. „Þrátt fyrir að vörumerkið sé ekki mjög þekkt hér á landi er SPORT24 stærsti seljandi íþróttavara í Danmörku en þar rekur fyrirtækið 186 verslanir vítt og breitt um landið.

Í SPORT24 er gott úrval af barnafötum á góðu verði. FRÉTTABLAÐIÐ/ANTON BRINK

Forstjóri fyrirtækisins heitir Henrik Bruun og starfaði áður hjá Intersport. Fyrirtækið var stofnað árið 2012 á grunni fjölda íþróttavöruverslana að því er fram kemur í Berlingske en höfuðstöðvar fyrirtækisins eru í Silkeborg,“ útskýrir Fanney. Þá sé fyrirtækið búið að vera að færa út kvíarnar jafnt og þétt. „Árið 2016 keypti SPORT24 verslanir Sportigan og sænsku íþróttavöruverslunina Stadium og er því óhætt að segja að fyrirtækið hafi verið í mikilli sókn á undanförnum árum en í fyrra störfuðu yfir 1.000 manns hjá fyrirtækinu.“

Íþróttaskórnir fást í SPORT24. FRÉTTABLAÐIÐ/ANTON BRINK

Afar hörð samkeppni

Fanney segir vissar áskoranir óneitanlega fylgja rekstri verslana af þessu tagi, ekki síst hvað varðar samkeppni við netverslanir. „Rekstrarumhverfi íþróttavöruverslana hefur aftur á móti verið afar krefjandi undanfarin ár, einna helst þegar kemur að samkeppni við stórar netverslanir.“

Staðsetning verslana sé einnig brýnt viðfangsefni. „Þá er einnig hart barist um bestu verslunarstaðsetningarnar og samkeppnin er mikil en SPORT24 er í dag til að mynda orðið umfangsmeira á dönskum markaði heldur en helsti keppinauturinn, Sportmaster,“ segir Fanney. Hún segir viðtökurnar við versluninni hér á landi hafa verið framar öllum vonum og að sala hafi verið vel fram yfir áætlanir á þessu ári.

Skór fyrir alla fjölskylduna. Sjón er sögu ríkari. FRÉTTABLAÐIÐ/ANTON BRINK

Opnun fyrstu verslunarinnar hafi því í sjálfu sér verið ákveðið tilraunaverkefni fyrst um sinn. „Við opnuðum fyrst niðri í Sundaborg til að prófa konseptið. Hvernig flutningaleiðirnar myndu virka og hvernig tölvukerfin myndu tala saman. Það er hæpið að fara í einhverja risafjárfestingu ef baklandið er ekki 100%. Það var hugmyndin með þessari búð,“ segir Fanney en verslunin hér á landi er beintengd við pantanakerfið hjá SPORT24 úti í Danmörku.

Þetta fyrirkomulag hefur hagstæð áhrif á starfsemi fyrirtækisins og gerir því kleift að bjóða upp á öll helstu merkin, með minni fyrirhöfn en ella. „Það hefur gríðarlega hagræðingu í för með sér fyrir okkar rekstur. Það fækkar utanlandsferðum hjá okkur og við fáum öll merkin í gegnum einn aðila,“ segir Fanney en fyrirtækið selur fjölda þekktra vörumerkja á borð við Nike, Hummel, Adidas , Puma, Speedo og Champion ásamt mörgum fleirum.

Í SPORT24 eru útivistarföt á alla fjölskylduna. FRÉTTABLAÐIÐ/ANTON BRINK

Frábært fyrir fjölskylduna

Ásamt því að selja útivistarfatnað fyrir unga sem aldna, úlpur, snjóbuxur og kuldagalla, leggur fyrirtækið einnig mikla áherslu á sölu almennra íþróttavara fyrir börn. „Það var það sem vantaði hingað til lands eftir að Intersport lokaði,“ segir Fanney, en Intersport var lokað sumarið 2017. Það sé áríðandi að fjölskyldur hér á landi hafi valmöguleika á borð við þennan, þar sem hægt sé að festa kaup á íþrótta- og útivistarfatnaði fyrir ört vaxandi börn á sanngjörnu verði. „Við leggjum mikla áherslu á að öll fjölskyldan geti komið og fundið eitthvað fyrir alla.“

Fanney segir SPORT24 taka sérstaklega vel á móti fjölskyldum og að öll umgjörð í kringum verslanirnar bæði einfaldi innkaupin og dragi úr óþarfa kostnaði. „Það er ekkert hlaupið að því að fara með 3-4 börn í verslunarmiðstöðvar,“ segir hún. „Eitt af því sem viðskiptavinir hafa verið ánægðir með, fyrir utan gott aðgengi og annað slíkt, er að það er ekkert annað í umhverfinu sem truflar og því lítið mál að taka börnin með.“

Það eru alltaf spennandi tilboð í gangi hjá SPORT24. FRÉTTABLAÐIÐ/ANTON BRINK

SPORT24 býður einnig upp á merkingar á fatnaði, til dæmis fyrir íþróttafélög og þá er fyrirtækið einnig með „outlet“-verslun innan nýrrar verslunar fyrirtækisins í Garðabæ, í Miðhrauni 2. Í outlet-versluninni er að finna íþróttavörur á 30-80% afslætti allt árið um kring. „Það er því tilvalið að gera sér ferð og skoða úrvalið,“ segir hún. „Við erum alltaf með einhver sértilboð í gangi á íþróttavörum.

Ég mæli líka með að fylgja okkur á Facebook undir SPORT24 Reykjavík , SPORT24Outlet og SPORT24 Akureyri. Þá sérð þú hvað er í gangi hjá SPORT24.“

Það er mikið úrval af íþróttaskóm í SPORT24. FRÉTTABLAÐIÐ/ANTON BRINK
Nýjasta verslun SPORT24 er til húsa í Miðhrauni 2. FRÉTTABLAÐIÐ/ANTON BRINK