VR lýsti í gærkvöldi, fimmtudaginn 24. nóvember 2022, yfir árangursleysi í kjaraviðræðum við Samtök atvinnulífsins. Þetta kemur fram í yfirlýsingu frá félaginu. Þar kemur fram að frá því að kjaraviðræðunum var vísað til ríkissáttasemjara þann 14. Nóvember hafi viðræðurnar snúist um gerð kjarasamnings til skamms tíma með áherslu á launaliðinn og það markmið að ná niður verðbólgu og lækka vexti.

Ragnar Þór Ingólfsson formaður VR segir í samtali við Fréttablaðið að ekkert röklegt samhengi sé milli hávaxta hér og verðbólgu. Hann nefnir sem dæmi að stýrivextir í Þýskalandi séu 1,5 til 2 prósent en hér eru þeir sex prósent og komnir út yfir þolmörk tekjulágra og skuldugra.

„Viðræður hafa þokast í rétta átt síðustu daga en nú er ljóst að forsendur fyrir áframhaldandi samtali eru brostnar. Ákvörðun Seðlabanka Íslands um að hækka stýrivexti í 6%, setti viðræður í uppnám og tilboð SA um launahækkanir hingað til standa engan veginn undir hækkunum verðlags og vaxta sem dunið hafa á launafólki í landinu. Frekari hækkanir eru nú fyrirsjáanlegarm“ segir í yfirlýsingunni.

Þar kemur enn fremur fram að viðræðunefnd VR hafi ekki skynjað nokkurn vilja hjá samninganefnd SA um að hækka sitt tilboð frá því sem boðið var þegar deilunni var vísað til ríkissáttasemjara og því hafi ekki verið neinn sjáanlegur tilgangur í því að halda viðræðum áfram að óbreyttu.

Yfirlýsing um árangursleysi viðræðna felur í sér að VR mun nú kynna ákvörðunina fyrir félagsfólki og meta næstu skref.

Samkvæmt lögum ber ríkissáttasemjara að gera tilraun til að ná sáttum ef annar aðili óskar þess eða sáttasemjari telur það heppilegt. Ríkissáttasemjara ber þó ætíð að leita sátta innan 14 sólarhringa frá síðustu samningatilraunum.

Fréttin hefur verið uppfærð eftir að yfirlýsing barst frá VR um málið. Uppfærð 25.11.2022 klukkan 11:05