Spáð er vonsku­veðri hér á landi á fimmtu­dag en þá er væntan­leg upp að landinu afar kröpp lægð. Fjallað er um þetta á veður­vefnum Blika.is sem veður­fræðingurinn Einar Svein­björns­son heldur úti.

„Það eru senni­lega fáir aðrir en veður­fræðingar og mestu veður­á­huga­menn að hugsa um ó­veður á góð­viðris­degi sem þessum. En út­litið er annað,“ segir í um­fjölluninni.

Bent er á það að yfir suður­ríkjum Banda­ríkjanna sé núna lægð sem veldur miklu vetrar­veðri á austur­ströndinni í dag. Lægðin haldi svo á­fram upp með ströndinni og suður fyrir Ný­fundna­land. Þar mætir heit lægðin mjög köldu lofti og dýpkar hratt á mið­viku­dag.

„Á fimmtu­dags­morgun er lægðar­miðjunni svo spáð vestur af Faxa­flóa. Standist spárnar þá verður þrýstingur í lægðar­miðju í kringum 925 hPa. Svo djúpar lægðir eru afar fá­tíðar. Ef frá eru taldir felli­byljir, þar sem þrýstingur getur farið niður fyrir 900 hPa þá er ekki vitað um margar lægðir dýpri en þá sem við eigum von á. Sökum stað­setningu okkar á Ís­landi þá þekkjum við þessar dýpstu lægðir betur en flestir, enda verða þær flestar í ná­grenni við Ís­land.“

Í um­fjöllun Bliku eru nokkrar djúpar lægðir rifjaðar upp og bent á að um miðjan desember hafi komið lægð upp að landinu þar sem þrýstingur í lægðar­miðju fór niður í 914 hpa.

Sam­kvæmt sjálf­virku spá­korti Veður­stofu Ís­lands verður mjög hvasst á vestan­verðu landinu snemma á fimmtu­dags­morgun. Þannig gerir spáin ráð fyrir 20 metrum á sekúndu og rigningu í Reykja­vík og 22 metrum á sekúndu í Stykkis­hólmi klukkan 9 á fimmtu­dag.

Á vef Bliku kemur fram að ólíklegt sé að lægðin nú slái dýptarmetið en ekki sé útilokað að um verði að ræða dýpstu lægð aldarinnar.

„Lægðin kemur til með að dýpka mjög hratt og erfitt er að spá fyrir um hversu hvasst verður og hvar versta veðrið verður. Til þess er óvissan of mikil. Líklegt verður að teljast að veður verði mjög vont auk þess sem óvenju há sjávarstaða gæti valdið vandræðum. Við munum fjalla frekar um lægðina þegar nær dregur og spáin skýrist frekar,“ segir á vef Bliku.