Fjölnir Sæmundsson, formaður Landssambands lögreglumanna, vonast til að hinsegin samfélagið á Íslandi og lögreglan taki höndum saman í baráttunni fyrir jafnara samfélagi þar sem hinsegin fólk nýtur sömu viðhorfa og þjónustu innan lögreglunnar og í samfélaginu og aðrir.

Fjölnir segist hafa orðið fyrir vonbrigðum með dræmar undirtektir aðila sem starfa að málefnum hinsegin fólks þegar hann spurðist fyrir um hvort Landssamband lögreglumanna gæti með einhverjum hætti lagt sitt að mörkum til Hinsegin daga.

Þetta kemur fram í aðsendri grein Fjölnis sem birtist á vef Vísis í dag.

Viss vonbrigði

„Þegar ég bar þessa hugmynd upp varð ég strax var við ákveðna tortryggni hjá aðilum sem starfa að málefnum hinsegin fólks.

Mér var vel tekið af öllum þeim sem ég ræddi við en var tjáð að þátttaka félags sem á einhvern hátt tengdist lögreglunni yrði líklega ekki vel séð inna hinsegin samfélagsins,“ segir Fjölnir og bætir við að þetta hafi verið viss vonbrigði því hann hafi séð þetta sem tækifæri til að veita hinsegin lögreglumönnum aukinn stuðning og gera þá betur sýnilega innan lögreglunnar.

Fjölbreyttur hópur

Að sögn Fjölnis telja margir lögregluna einsleitan hóp, „sem er auðvitað alls ekki rétt heldur starfar þar fjölbreyttur hópur fólks með mismunandi kyn, kynhneigð, þarfir og langanir.

Það eru mér auðvitað líka vonbrigði að hópur hinsegin fólks í samfélaginu skuli líta á lögregluna sem einhverskonar andstæðing sinn.

Auðvitað er ég ekki svo blindur eða gleyminn að ég viti ekki að mjög víða í samfélaginu hafa á síðustu árum og áratugum verið fordómar gagnvart hinsegin fólki, bæði hjá ýmsum ríkisstofnunum og hjá einstaklingum í samfélaginu og því má telja fullvíst að líka hafi verið fordómar meðal sumra lögreglumanna í gegnum tíðina,“ segir Fjölnir jafnframt. Hann segist sannfærður um að stjórnendur lögreglunnar séu tilbúnir að biðjast afsökunar á framferði lögreglunnar í þeim dæmum sem hún hafi brotið á fólki vegna kynhneigðar.

Lögreglan sé fyrir alla

Fjölnir segir áríðandi að koma því á framfæri að lögreglan sé fyrir alla.

„Öll eiga að fá sömu þjónustu hjá lögreglunni óháð kyni eða kynhneigð og öll eiga að geta starfað innan lögreglunnar óháð kyni eða kynhneigð. Lögreglumenn er sú starfsstétt sem á að tryggja að farið sé að lögum og að lýðræði og mannréttindi séu virt í hvívetna í samfélaginu öllu,“ segir Fjölnir og bætir við að það sé hans einlæga trú að hinsegin samfélagið og lögreglan taki höndum saman í baráttunni fyrir jafnara samfélaginu.