Undirbúningsnefnd kjörbréfanefndar Alþingis mætti á lögreglustöðina í Borgarnesi rétt upp úr klukkan níu í morgun.
Þetta er þriðja vettvangsferð nefndarinnar í Borgarnes frá því að nefndin tók við störfum eftir kosningar.
Birgir Ármannsson, formaður nefndarinnar, kveðst vona að þetta sé síðasta vettvangsferð nefndarinnar í Borganes.
Hann segir nefndina vera fara yfir flokkun gagnanna í kjölfar spurninga sem hafa komið upp í starfi nefndarinnar. „Reyna átta okkur betur á atriðum sem hafa verið óljós í þessum fyrri ferðum okkar.“
Að sögn Birgis sé ekki á dagskrá á að telja nein atkvæði heldur einungis skoða flokkun þeirra.
Aðspurður hvort verið væri að fara sérstaklega yfir þau atkvæði sem yfirkjörstjórn í Norðvesturkjördæmi endurtaldi áður en talningarfólk mætti til talningar á Hótel Borgarnesi á sunnudeginum 26. september þegar ljóst var að ráðast þyrfti í endurtalningu atkvæða sagði Birgir svo ekki vera.
„Við erum ekki að fara telja atkvæði, við erum að fara yfir flokkun og fá betri tilfinningu fyrir því hvernig hún er. Í ljósi spurninga sem hafa komið upp í störfum okkar á undanförnum dögum,“ segir Birgir.
Hann segir engan ágreining hafa verið uppi hjá nefndinni um að fara í þriðju vettvangsferðina.
„Til þess að fá þá svör við þeim spurningum sem höfðu komið upp í okkar samtölum.“
Betra væri að gera það fyrr en síðar.
Aðspurður hvort gilda atkvæðið sem fannst verði til skoðunar hjá nefndinni í dag segir Birgir að það verði skoðað í leiðinni, „en það hafi ekki verið neinn vafi um tilvist hans. Hann væri ekki vandamál í sjálfu sér.“
