Starfsmenn Alvotech tóku sig nýverið saman og söfnuðu alls 3,2 milljónum til styrktar UNICEF sem rennur beint í neyðarsjóð UNICEF á Indlandi. Helmingi var safnað af starfsmönnum, eða 1,6 milljón og svo bætti fyrirtækið við sömu upphæð.
Ein starfsmanna, Ritika Lakhotia, segir í samtali við Fréttablaðið að í fyrstu bylgju COVID-19 í Indlandi hafi Indland komist nokkuð vel út úr því.
Heilbrigðiskerfið kom ekki of illa út og fólk gat verið í „lockdown“, en þegar seinni bylgjan skall á þessu ári þá var það mjög slæmt. Veiran hafi stökkbreyst og bylgjan var skyndileg,“ segir Ritika sem er frá Indlandi og hefur starfað fyrir fyrirtækið í sex mánuði.
Hún og samstarfsmaður hennar, Jegadeesh Subramaniyam, eru tvö þeirra hundrað indverskra starfsmanna hjá Alvotech sem stóðu fyrir söfnuninni innan fyrirtækisins, ásamt öðrum starfsmönnum. Enn er þó hægt að styðja við söfnun UNICEF.
Hún segir að dauðsföllum hafi fljótt fjölgað seinni bylgju faraldursins á Indlandi og að þá hafi veiran haft verulega áhrif á börn og þungaðar konur, sem hún gerði ekki áður.
„Það var erfitt fyrir ríkisstjórnina að takast á við það. Mér finnst þau hafa staðið sig nokkuð vel. Indland er mjög fjölmennt land og ríkisstjórnin er að reyna að ná til allra en það eru tilfelli það sem þau gera það ekki,“ segir Ritaka.
Hvað varðar fréttir um það að heilbrigðiskerfið sé við það að bogna undan álagi segir Ritika að það sé auðvitað mikið álag en telur að miðað við mannfjölda hafi yfirvöldum gengið vel að ná til allra.
Hún segir að það séu enn mjög mörg tilfelli að greinast á hverjum degi og til að ná að annast alla sem þurfa á aðstoð að halda þá hafa mörg félagasamtök, eins og UNICEF, stigið inn til að ná til allra.
„Við erum langt að heiman, mjög langt og við getum ekki gert neitt hér núna. Allt sem við getum við gert er að safna fjármagni til að aðstoða þau sem eru að veita aðstoð á Indlandi,“ segir Ritaka.
Ekki í boði fyrir alla að halda sig heima
Hún segir að vegna bágra aðstæðna og fátæktar séu margir sem geti ekki verið heima, þau þurfi að vinna, og þau vilji með söfnuninni stuðla að því að allir Indverjar fái þá aðstoð sem þau þurfa á meðan faraldurinn geisar enn.
Jegadeesh segir að þótt svo að það sé gott heilbrigðiskerfi til staðar í Indlandi þá ráði það illa við það álag sem er vegna faraldursins.
„Til að takast á við þennan gríðarlega fjölda tilfella þá þarf Indland á aðstoð að halda,“ segir Jegedeesh og segir að það sé mikil þörf á allskyns heilbrigðisbúnaði eins og súrefniskútum, klæðnaði og öðru.
Hann segir að það séu mörg börn sem hafi misst foreldra sína sem þurfi á aðstoð að halda.
„Að aðstoða við að bjarga lífi einhvers er það besta sem þú getur gert, það er ekkert annað sem er meira göfugt,“ segir Jegedeesh.
Þau segja bæði að vegna mikils mannfjölda og hversu dreifbýlt landið er þá sé erfitt fyrir yfirvöld að ná til allra en samtök eins og UNICEF, sem staðsett eru víða um landið, vonast þau til þess að geta náð til fólks sem yfirvöld ná ekki til.
Þau ítreka að fjármagnið sem safnast fer allt í gegnum UNICEF og þannig sé tryggt að þau sem mest þurfa á því að halda fái fjármagnið.
„Við vonum til þess að allur heimurinn geti komið saman og hjálpað Indlandi á þessum tíma í neyð,“ segir Ritika að lokum.
Söfnun Alvotech er nú lokið en enn er hægt að styrkja söfnun UNICEF hér.
„Við erum starfsmönnum og stjórnendum Alvotech innilega þakklát fyrir þeirra frumkvæði og mikilvægt framlag í baráttuna gegn COVID-19. Stjórnlaus útbreiðsla veirunnar á Indlandi og í öðrum löndum í Suður-Asíu er mikið áhyggjuefni og glöggt dæmi um það hversu hratt veiran getur lamað heilbrigðiskerfi. Starfsfólk UNICEF vinnur nú í kappi við tímann, t.d að útvega súrefnisbirgðir, andlitsgrímur og skimunarbúnað, aðstoða við bólusetningar og sinna fræðslu um sóttvarnir og er stuðningur við neyðaraðgerðirnar því afar dýrmætur. Þetta er áskorun sem allur heimurinn þarf að bregðast við,“ segir Steinunn Jakobsdóttir, fjölmiðlafulltrúi UNICEF.
