Vítalía Lazareva hefur beðist afsökunar á því að hafa brugðist öðrum þolendum og biðst afsökunar á að hafa ekki vitað betur.

Í afsökunarbeiðni sinni, sem hún birti í kvöld á Twitter, vísar hún til þess að í mars greindi hún frá því að hún hafi lagt fram bréf til kærumóttöku kynferðisbrota en eins og hefur verið greint frá í vikunni þá hefur engin kæra verið formlega lögð fram.

Vítalía segir í færslu sinni á Twitter að hún geti ekki borið ábyrgð á fréttaflutningi um málið en að hún hafi lagt fram bréfið og birti svo mynd af því á Twitter til staðfestingar. Hún segir að hún hafi ávallt haldið að það „þýddi eitthvað“ en að hún hafi ekki mætt í skýrslutöku og hafi aldrei haldið öðru fram.

„Ég biðst afsökunar. Afsökunar á að vita ekki betur,“ segir hún að lokum.

Kærð fyrir tilraun til fjárkúgunar

Vítalía hefur í vikunni verið nokkuð í fréttum eftir að hún og Arnar Grant voru bæði kærð fyrir tilraun til fjárkúgunar. Hún hefur ekki svarað ítrekuðum símtölum eða skilaboðum Fréttablaðsins en birti þessi skilaboð á Twitter í kvöld eftir að hafa opnað síðu sína á samfélagsmiðlinum aftur en hún lokaði öllum sínum samfélagsmiðlum fyrir stuttu.

Kær­endur eru Ari Edwald, Hregg­viður Jóns­son og Þórður Már Jóhannes­son. Málið á rót að rekja til sam­kvæmis í sumar­bú­stað í Skorra­dal í októ­ber 2020. Ari sagði í gær í fréttum að það hefði verið erfið ákvörðun að leggja fram kæruna. Arnar Grant sagði fyrr í dag að kæra mannanna væri afleit tilraun til að afvegaleiða umræðuna.