Stjórn Ferðafélags Íslands furðar sig á yfirlýsingu Önnu Dóru Sæþórsdóttur, fráfarandi forseta félagsins, sem greindi frá afsögn sinni í dag, og sagði ástæðuna meðal annars vera það hvernig stjórn félagsins hefði þaggað niður í málum er vörðuðu kynferðisofbeldi og áreitni. Þá er Önnu Dóru kennt um samskiptavanda innan stjórnar félagsins.

„Stjórn Ferðafélags Íslands lýsir yfir vonbrigðum og furðu með hvernig fráfarandi forseti lýsir viðskilnaði sínum við félagið. Stjórnin vísar algjörlega á bug þeim ásökunum og lýsingum sem hún setur fram í yfirlýsingu sinni.“ segir í yfirlýsingu sem stjórn Ferðafélags Íslands gaf út vegna málsins. Þar segir að tekið hafi verið á öllum málum af þessu tagi með faglegum hætti.

Yfirlýsing stjórnarinnar er stíluð á Önnu Vilbergsdóttur, varaforseta Ferðafélags Íslands.
Fréttablaðið/Anton Brink

„Hjá Ferðafélagi Íslands hafa verið til staðar fagleg ferli og viðmið um hvernig tekið skal á málum sem koma upp í samskiptum innan félagsins, þar með talið mál er varða kynferðislega áreitni. Tekið hefur verið á öllum málum af þessu tagi með faglegum og skipulögðum hætti og þau leidd til lykta.“ segir í yfirlýsingunni.

Þá heldur stjórn félagsins því fram að samskiptavandi sem hafi verið innan stjórnar félagsins hafi verið tilkominn vegna stjórnarhátta Önnu Dóru. „Stjórn Ferðafélagsins getur staðfest að til staðar hafa verið vandamál í samskiptum innan stjórnar við fráfarandi forseta. Þessi samskiptavandi er tilkominn vegna stjórnarhátta hennar og framkomu við framkvæmdastjóra félagsins.“

Þá er tekið fram að allt stjórnarfólk í félaginu hafni lýsingum Önnu Dóru.